ਓਟਵਾ, 26 ਅਕਤੂਬਰ (ਪੋਸਟ ਬਿਊਰੋ) : ਟੋਰਾਂਟੋ ਵਿੱਚ ਪੀਅਰਸਨ ਏਅਰਪੋਰਟ ਉੱਤੇ ਬਿਨਾਂ ਮਾਸਕ ਦੇ ਨਜ਼ਰ ਆਉਣ ਤੋਂ ਬਾਅਦ ਫੈਡਰਲ ਸਿਹਤ ਮੰਤਰੀ ਪੈਟੀ ਹਾਜ਼ਦੂ ਨੇ ਸਫਾਈ ਦਿੰਦਿਆਂ ਆਖਿਆ ਕਿ ਉਨ੍ਹਾਂ ਸਿਰਫ ਖਾਣਾ ਖਾਣ-ਪੀਣ ਲਈ ਹੀ ਆਪਣਾ ਮਾਸਕ ਉਤਾਰਿਆ ਸੀ|
ਜ਼ਿਕਰਯੋਗ ਹੈ ਕਿ ਹਾਜ਼ਦੂ ਦੀ ਬਿਨਾਂ ਮਾਸਕ ਵਾਲੀ ਪੋਸਟ ਅਲਬਰਟਾ ਦੇ ਐਡਵਾਂਸਡ ਐਜੂਕੇਸ਼ਨ ਮੰਤਰੀ ਦੇ ਅਖੌਤੀ ਸਹਾਇਕ ਵੱਲੋਂ ਐਤਵਾਰ ਸ਼ਾਮ ਨੂੰ ਟਵਿੱਟਰ ਉੱਤੇ ਪਾਈ ਗਈ ਸੀ| ਇਸ ਵਿੱਚ ਨਜ਼ਰ ਆ ਰਿਹਾ ਹੈ ਕਿ ਹਾਜ਼ਦੂ ਏਅਰਪੋਰਟ ਦੀ ਕੁਰਸੀ ਉੱਤੇ ਬੈਠੀ ਹੈ ਤੇ ਉਨ੍ਹਾਂ ਕੋਲ ਸਮਾਨ ਪਿਆ ਹੈ ਤੇ ਉਹ ਜਾਂ ਤਾਂ ਗੱਲ ਕਰ ਰਹੀ ਹੈ ਤੇ ਜਾਂ ਫਿਰ ਮੁਸਕਰਾ ਰਹੀ ਹੈ|
ਹਾਜ਼ਦੂ ਵੱਲੋਂ ਦਿੱਤੇ ਗਏ ਜਵਾਬ ਮੁਤਾਬਕ ਉਨ੍ਹਾਂ ਵੱਲੋਂ ਨਿਯਮਾਂ ਦੀ ਉਲੰਘਣਾ ਨਹੀਂ ਕੀਤੀ ਗਈ ਹੈ ਜਦਕਿ ਉਨ੍ਹਾਂ ਦੇ ਕੋਲ ਖਾਣ ਪੀਣ ਲਈ ਕੋਈ ਵੀ ਸਮਾਨ ਨਜ਼ਰ ਨਹੀਂ ਆ ਰਿਹਾ, ਹਾਲਾਂਕਿ ਇੱਕ ਪੇਪਰ ਬੈਗ ਕੈਮਰੇ ਤੋਂ ਦੂਰ ਹਾਜ਼ਦੂ ਦੇ ਇੱਕ ਪਾਸੇ ਉੱਤੇ ਨਜ਼ਰ ਜ਼ਰੂਰ ਆ ਰਿਹਾ ਹੈ| ਇਸੇ ਤਰ੍ਹਾਂ ਦੀ ਹੀ ਇੱਕ ਘਟਨਾ ਜੁਲਾਈ ਵਿੱਚ ਹੋਈ ਸੀ ਤੇ ਉਸ ਸਮੇਂ ਤਤਕਾਲੀ ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਤੇ ਮੈਨੀਟੋਬਾ ਦੇ ਪ੍ਰੀਮੀਅਰ ਬ੍ਰਾਇਨ ਪੈਲਿਸਤਰ ਵੀ ਪੀਅਰਸਨ ਏਅਰਪੋਰਟ ਉੱਤੇ ਮਾਸਕ ਤੋਂ ਬਿਨਾਂ ਡਿਪਾਰਚਰ ਏਰੀਆ ਵਿੱਚ ਗੱਲਾਂ ਕਰਦੇ ਪਾਏ ਗਏ ਸਨ| ਬਾਅਦ ਵਿੱਚ ਪੈਲਿਸਤਰ ਵੱਲੋਂ ਮੁਆਫੀ ਵੀ ਮੰਗੀ ਗਈ ਸੀ|