ਬਰੈਂਪਟਨ, ਪੋਸਟ ਬਿਉਰੋ: ਸਿੱਖ ਮੋਟਰ ਸਾਈਕਲ ਦਾ ਗਾਲਾ ਡਿੱਨਰ ਬੀਤੇ ਦਿਨੀਂ ਚਾਂਦਨੀ ਬੈਂਕੁਇਟ ਹਾਲ ਵਿੱਚ ਆਯੋਜਿਤ ਕੀਤਾ ਗਿਆ। ਇਸ ਸਾਲ ਇਹ ਗਾਲਾ ਡਿਨਰ ਉਂਟੇਰੀਓ ਵਿੱਚ ਦਸਤਾਰ ਦੀ ਪੂਰਨ ਮਾਨਤਾ ਲਈ ਮੋਟਰ ਸਾਈਕਲ ਚਲਾਉਣ ਵਾਸਤੇ ਹੈਲਮਟ ਪਹਿਨਣ ਤੋਂ ਛੋਟ ਦੇ ਸੰਘਰਸ਼ ਦੀ ਜਿੱਤ ਨੂੰ ਸਮ੍ਰਪਿੱਤ ਸੀ। ਸਿੱਖ ਭਾਈਚਾਰੇ ਦੇ ਉਤਸ਼ਾਹਿਤ ਮੈਂਬਰਾਂ ਨਾਲ ਖਚਾਖਚ ਭਰੇ ਕਰਾਈਸਲਰ ਡਰਾਈਵ ਉੱਤੇ ਸਥਿਤ ਚਾਂਦਨੀ ਬੈਂਕੁਇਟ ਹਾਲ ਵਿੱਚ ਤਿਲ ਸੁੱਟਣ ਨੂੰ ਥਾਂ ਨਹੀਂ ਸੀ।

ਇਸ ਗਾਲਾ ਡਿੱਨਰ ਵਿੱਚ ਸਿਆਸੀ ਸਫ਼ਾਂ ਤੋਂ ਉੱਤੇ ਉੱਠ ਕੇ ਹਰ ਪਾਰਟੀ ਦੇ ਆਗੂ ਨੇ ਹਿੱਸਾ ਲਿਆ ਅਤੇ ਉਂਟੇਰੀਓ ਵਿੱਚ ਸਿੱਖ ਭਾਈਚਾਰੇ ਦੀ ਲੰਬੇ ਚਿਰਾਂ ਤੋਂ ਚੱਲਦੀ ਆ ਰਹੀ ਦਸਤਾਰ ਪਹਿਨ ਕੇ ਮੋਟਰ ਸਾਈਕਲ ਚਲਾਉਣ ਦੀ ਮੰਗ ਦੇ ਜਸ਼ਨਾਂ ਵਿੱਚ ਹਿੱਸਾ ਲਿਆ। ਇਸ ਮੌਕੇ ਉਂਟੇਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਮੁੱਖ ਮਹਿਮਾਨ ਸਨ। ਸਿੱਖਾਂ ਦੀ ਦਸਤਾਰ ਨੂੰ ਬਣਦਾ ਸਨਮਾਨ ਦੇਣ ਲਈ ਟੋਰੀ ਸਰਕਾਰ ਦੇ ਉੱਦਮ ਲਈ ਧੰਨਵਾਦ ਵਜੋਂ ਡੱਗ ਫੋਰਡ ਦਾ ਗੋਲਡ ਮੈਡਲ ਦੇ ਕੇ ਸਨਮਾਨ ਕੀਤਾ ਗਿਆ। ਆਪਣੇ ਭਾਸ਼ਣ ਵਿੱਚ ਪ੍ਰੀਮੀਅਰ ਫੋਰਡ ਨੇ ਕਿਹਾ ਕਿ ਉਂਟੇਰੀਓ ਵਿੱਚ ਸਿੱਖ ਭਾਈਚਾਰੇ ਦੀ ਵੱਡੀ ਦੇਣ ਹੈ ਜਿਸਨੂੰ ਕਦਾਚਿਤ ਅੱਖੋਂ ਉਹਲੇ ਨਹੀਂ ਕੀਤਾ ਜਾ ਸਕਦਾ। ਉਹਨਾਂ ਕਿਹਾ ਕਿ ਹੈਲਮਟ ਤੋਂ ਛੋਟ ਦੇ ਕੇ ਸਰਕਾਰ ਨੇ ਆਪਣਾ ਵਾਅਦਾ ਪੂਰਾ ਕੀਤਾ ਹੈ ਜਿਸ ਉੱਤੇ ਉਹਨਾਂ ਨੂੰ ਮਾਣ ਹੈ। ਫੋਰਡ ਨੇ ਸਟੇਜ ਤੋਂ ਸਮੂਹ ਐਮ ਪੀ ਪੀਆਂ ਦੇ ਨਾਮ ਲੈ ਕੇ ਉਹਨਾਂ ਦੀ ਹਾਜ਼ਰੀ ਨੂੰ ਕਬੂਲ ਕੀਤਾ ਅਤੇ ਹੈਲਮਟ ਤੋਂ ਛੋਟ ਬਾਰੇ ਬਿੱਲ ਨੂੰ ਸਾਥ ਦੇਣ ਲਈ ਧੰਨਵਾਦ ਕੀਤਾ। ਇਸ ਵਿੱਚ ਐਨ ਡੀ ਪੀ ਦੇ ਐਮ ਪੀ ਪੀ ਗੁਰਰਤਨ ਸਿੰਘ ਅਤੇ ਸਾਰਾਹ ਸਿੰਘ ਦੇ ਨਾਮ ਉਹਨਾਂ ਉਚੇਚੇ ਕਰਕੇ ਲਏ।

ਪ੍ਰੀਮੀਅਰ ਫੋਰਡ ਨੂੰ ਗੋਲਡ ਮੈਡਲ ਕਲੱਬ ਦੇ ਅਹੁਦੇਦਾਰਾਂ ਇੰਦਰਜੀਤ ਸਿੰਘ ਜਗਰਾਉਂ, ਰਾਮਪਾਲ ਸਿੰਘ ਢਿੱਲੋਂ, ਲਖਵਿੰਦਰ ਸਿੰਘ ਧਾਲੀਵਾਲ, ਅਤੇ ਬਲਕਰਨ ਗਿੱਲ ਨੇ ਸਾਂਝੇ ਤੋਰ ਉੱਤੇ ਅਰਪਿਤ ਕੀਤਾ।

ਪ੍ਰੀਮੀਅਰ ਡੱਗ ਫੋਰਡ ਨੇ ਕਿਹਾ ਕਿ ਉਹ ਜਲਦੀ ਹੀ ਸਸਕੈਚਵਨ ਦੇ ਪ੍ਰੀਮੀਅਰ ਸਕਾਟ ਮੋਅ ਨੂੰ ਫੋਨ ਕਰਕੇ ਉੱਥੇ ਵੀ ਦਸਤਾਰ ਬੰਨ ਕੇ ਮੋਟਰ ਸਾਈਕਲ ਚਲਾਉਣ ਦੀ ਆਗਿਆ ਲਈ ਗੱਲ ਕਰੇਗਾ। ਇਸ ਤਰੀਕੇ ਬ੍ਰਿਟਿਸ਼ ਕੋਲੰਬੀਆ ਤੋਂ ਉਂਟੇਰੀਓ ਤੱਕ ਸਿੱਖ ਦਸਤਾਰਧਾਰੀ ਚਾਲਕ ਬਿਨਾ ਰੋਕ ਟੋਕ ਤੋਂ ਯਾਤਰਾ ਕਰ ਸੱਕਣਗੇ।

ਇਸ ਮੌਕੇ ਫੈਡਰਲ ਕੰਜ਼ਰਵੇਟਿਵ ਪਾਰਟੀ ਦੇ ਲੀਡਰ ਐਂਡਰੀਊ ਸ਼ੀਅਰ ਦਾ ਵੀਡੀਓ ਸੁਨੇਹਾ ਵੀ ਵਿਖਾਇਆ ਗਿਆ ਜਿਸ ਵਿੱਚ ਉਹਨਾਂ ਨੇ ਮੁਬਾਰਕਵਾਦ ਸਾਂਝੀ ਕਰਨ ਤੋਂ ਇਲਾਵਾ ਸਿੱਖ ਭਾਈਚਾਰੇ ਦੀ ਕੈਨੇਡਾ ਨੂੰ ਦੇਣ ਬਾਰੇ ਜਿ਼ਕਰ ਕੀਤਾ। ਉਹਨਾਂ ਇਹ ਵੀਡੀਓ ਸੁਨੇਹਾ ਸਿੱਖ ਮੋਟਰ ਸਾਈਕਲ ਕਲੱਬ ਦੇ ਪ੍ਰਧਾਨ ਇੰਦਰਜੀਤ ਸਿੰਘ ਜਗਰਾਉਂ ਦੇ ਘਰ ਹੋਏ ਇੱਕ ਸਮਾਗਮ ਦੌਰਾਨ ਰਿਕਾਰਡ ਕਰਵਾਇਆ ਸੀ।

ਦਸਤਾਰ ਨੂੰ ਉਂਟੇਰੀਓ ਵਿੱਚ ਮਿਲੀ ਮਾਨਤਾ ਦੀ ਜਸ਼ਨਾਂ ਵਿੱਚ ਸ਼ਾਮਲ ਹੋਣ ਲਈ ਬ੍ਰਿਟਿਸ਼ ਕੋਲੰਬੀਆ ਸਿੱਖ ਮੋਟਰ ਸਾਈਕਲ ਕਲੱਬ ਦੇ ਕਈ ਮੈਂਬਰ ਉਚੇਚਾ ਕਰਕੇ ਪੁੱਜੇ ਹੋਏ ਸਨ।

ਇਸ ਮੌਕੇ ਦਸਤਾਰ ਬਾਰੇ ਇੱਕ ਵੀਡੀਓ ਵਿਖਾਈ ਗਈ ਜਿਸ ਵਿੱਚ ਵਿਸ਼ਵ ਜੰਗ ਤੋਂ ਲੈ ਕੇ ਵਰਤਮਾਨ ਸਮੇਂ ਤੱਕ ਦੀ ਦਸਤਾਰ ਪਹਿਨਣ ਦੀ ਕਹਾਣੀ ਨੂੰ ਬਾਖੂਬੀ ਬਿਆਨਿਆ ਗਿਆ ਹੈ। ਸਮਾਗਮ ਦੌਰਾਨ ਵੱਖ 2 ਸਿੱਖ ਸਕਾਲਰਾਂ ਨੇ ਆਪਣੇ ਵਿਚਾਰ ਰੱਖੇ। ਸਟੇਜ ਸਕੱਤਰ ਦੀ ਜੁੰਮੇਵਾਰੀ ਖੁਸ਼ਵੰਤ ਸਿੰਘ ਬਾਜਵਾ ਅਤੇ ਜਗਦੀਪ ਸਿੰਘ ਨੇ ਸਾਂਝੇ ਤੌਰ ਉੱਤੇ ਨਿਭਾਈ। ਬੀ ਸੀ ਮੋਟਰ ਸਾਈਕਲ ਕਲੱਬ ਦੇ ਮੈਂਬਰ ਵੀ ਸੀ।