ਓਨਟਾਰੀਓ, 20 ਅਕਤੂਬਰ (ਪੋਸਟ ਬਿਊਰੋ) : ਉਹ ਓਨਟਾਰੀਓ ਦੀ ਪਹਿਲੀ ਮਹਿਲਾ ਪ੍ਰੀਮੀਅਰ ਸੀ ਤੇ ਉਨ੍ਹਾਂ 19 ਸਾਲ ਵਿਧਾਨਸਭਾ ਦੀ ਸੇਵਾ ਕੀਤੀ| ਪਰ ਮੰਗਲਵਾਰ ਨੂੰ ਕੈਥਲੀਨ ਵਿੰਨ ਨੇ ਐਲਾਨ ਕੀਤਾ ਕਿ ਉਹ ਅਗਲੀਆਂ ਚੋਣਾਂ ਵਿੱਚ ਖੜ੍ਹੀ ਨਹੀਂ ਹੋਵੇਗੀ|
ਵਿੰਨ ਦੇ ਇਸ ਫੈਸਲੇ ਤੋਂ ਬਾਅਦ ਸਰਕਾਰੀ ਅਧਿਕਾਰੀਆਂ ਵੱਲੋਂ ਪ੍ਰਤੀਕਿਰਿਆ ਪ੍ਰਗਟਾਈ ਗਈ| ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਵੀ ਇਸ ਮਾਮਲੇ ਵਿੱਚ ਪਿੱਛੇ ਨਹੀਂ ਰਹੇ| ਫੋਰਡ ਨੇ ਆਖਿਆ ਕਿ ਉਹ ਸਿਆਸਤ ਤੇ ਇਨਸਾਨ ਵਿੱਚ ਫਰਕ ਕਰਨਾ ਜਾਣਦੇ ਹਨ| ਕੈਥਲੀਨ ਵਿੰਨ ਬਹੁਤ ਹੀ ਚੰਗੀ ਇਨਸਾਨ ਹੈ| ਉਨ੍ਹਾਂ ਆਖਿਆ ਕਿ ਪ੍ਰੋਵਿੰਸ ਦੇ ਇਤਿਹਾਸ ਵਿੱਚ 25 ਹੋਰ ਅਜਿਹੇ ਸ਼ਖਸ ਹਨ ਜਿਹੜੇ ਇਸ ਅਹੁਦੇ ਉੱਤੇ ਰਹਿ ਕੇ ਕੰਮ ਕਰਨ ਦੀ ਅਹਿਮੀਅਤ ਸਮਝ ਸਕਦੇ ਹਨ|
ਜਦੋਂ ਵਿੰਨ ਤੋਂ ਇਹ ਪੁੱਛਿਆ ਗਿਆ ਕਿ ਉਨ੍ਹਾਂ ਨੂੰ ਕੀ ਲੱਗਦਾ ਹੈ ਕਿ ਫੋਰਡ ਵੱਲੋਂ ਹੁਣ ਤੱਕ ਮਹਾਂਮਾਰੀ ਨੂੰ ਕਿਸ ਤਰ੍ਹਾਂ ਸਾਂਭਿਆ ਜਾ ਰਿਹਾ ਹੈ ਤਾਂ ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਫੋਰਡ ਦਾ ਕੱਦ ਇਸ ਦੌਰਾਨ ਕਾਫੀ ਵੱਡਾ ਹੋਇਆ ਹੈ| ਵਿੰਨ ਨੇ ਆਖਿਆ ਕਿ ਕਈ ਹੋਰ ਮਾਮਲਿਆਂ ਵਿੱਚ ਜੋ ਕੁੱਝ ਵੀ ਫੋਰਡ ਨੇ ਕੀਤਾ ਉਸ ਵਿੱਚ ਦਿੱਕਤਾਂ ਹੋ ਸਕਦੀਆਂ ਹਨ ਪਰ ਜਦੋਂ ਸਵੇਰੇ ਤੜ੍ਹਕੇ 3:00 ਵਜੇ ਜਾਗ ਕੇ ਪ੍ਰੋਵਿੰਸ ਨੂੰ ਸਾਂਭਣਾ ਪੈਂਦਾ ਹੈ ਉਹ ਉਸ ਜ਼ਿੰਮੇਵਾਰੀ ਨੂੰ ਸਮਝ ਸਕਦੀ ਹੈ ਕਿਉਂਕਿ ਉਹ ਵੀ ਇਸ ਅਹੁਦੇ ਉੱਤੇ ਰਹਿ ਚੁੱਕੀ ਹੈ|
ਇੱਥੇ ਦੱਸਣਾ ਬਣਦਾ ਹੈ ਕਿ ਮੰਗਲਵਾਰ ਨੂੰ ਜਦੋਂ ਪ੍ਰੀਮੀਅਰ ਫੋਰਡ ਵਿਧਾਨਸਭਾ ਵਿੱਚ ਵਿੰਨ ਨੂੰ ਸਨਮਾਨਿਤ ਕਰ ਰਹੇ ਸਨ ਤਾਂ ਐਨਡੀਪੀ ਤੇ ਉਨ੍ਹਾਂ ਦੀ ਆਗੂ ਐਂਡਰੀਆ ਹੌਰਵਥ ਤਰ੍ਹਾਂ ਤਰ੍ਹਾਂ ਦੇ ਸਵਾਲ ਕਰਕੇ ਮਾਹੌਲ ਨੂੰ ਭਾਰੀ ਕਰ ਰਹੇ ਸਨ| ਓਨਟਾਰੀਓ ਦੇ ਮੌਜੂਦਾ ਲਿਬਰਲ ਆਗੂ ਸਟੀਵਨ ਡੈਲ ਡੂਕਾ ਨੇ ਟਵੀਟ ਕਰਕੇ ਪਬਲਿਕ ਆਫਿਸ ਵਿੱਚ ਗੁਜ਼ਾਰੇ ਸਮੇਂ ਲਈ ਵਿੰਨ ਦਾ ਧੰਨਵਾਦ ਕੀਤਾ ਤੇ ਬਾਅਦ ਵਿੱਚ ਟੋਰਾਂਟੋ ਦੇ ਮੇਅਰ ਜੌਹਨ ਟੋਰੀ ਨੇ ਵੀ ਵਿੰਨ ਦਾ ਧੰਨਵਾਦ ਕੀਤਾ| ਟੋਰੀ ਨੇ ਟਵੀਟ ਕਰਕੇ ਆਖਿਆ ਕਿ ਸਿਆਸੀ ਵਿਰੋਧੀ ਤੇ ਚੰਗੀ ਦੋਸਤ ਵਜੋਂ ਕੈਥਲੀਨ ਵਿੰਨ ਨੂੰ ਜਾਨਣ ਦਾ ਮੌਕਾ ਉਨ੍ਹਾਂ ਨੂੰ ਮਿਲਿਆ, ਜਦੋਂ ਉਹ ਪ੍ਰੀਮੀਅਰ ਸੀ ਤਾਂ ਉਹ ਟੋਰਾਂਟੋ ਦੀ ਮਜ਼ਬੂਤ ਸਹਿਯੋਗੀ ਸੀ| ਉਨ੍ਹਾਂ 2022 ਤੋਂ ਅਗਾਂਹ ਆਉਣ ਵਾਲੇ ਸਾਲਾਂ ਲਈ ਵੀ ਵਿੰਨ ਨੂੰ ਸੁæੱਭਕਾਮਨਾਵਾਂ ਦਿੱਤੀਆਂ|