ਓਟਵਾ, 17 ਸਤੰਬਰ (ਪੋਸਟ ਬਿਊਰੋ) : ਸਿਹਤ ਸਬੰਧੀ ਸੈæਡੋ ਮੰਤਰੀ ਮਿਸੇæਲ ਰੈਂਪਲ ਗਾਰਨਰ ਵੱਲੋਂ ਕੈਨੇਡਾ ਵਿੱਚ ਕੋਵਿਡ-19 ਟੈਸਟਿੰਗ ਸਬੰਧੀ ਹੋਰ ਬਦਲਾਂ ਨੂੰ ਮਨਜ਼ੂਰੀ ਦੇਣ ਵਿੱਚ ਦੇਰ ਕਰਨ ਦੇ ਮਾਮਲੇ ਵਿੱਚ ਟਰੂਡੋ ਸਰਕਾਰ ਨੂੰ ਲੰਮੇਂ ਹੱਥੀਂ ਲਿਆ ਗਿਆ|
ਉਨ੍ਹਾਂ ਆਖਿਆ ਕਿ ਕੈਨੇਡਾ ਭਰ ਵਿੱਚ ਕਰੋਨਾਵਾਇਰਸ ਦੇ ਮਾਮਲਿਆਂ ਵਿੱਚ ਇਸ ਸਮੇਂ ਮੁੜ ਵਾਧਾ ਵੇਖਣ ਨੂੰ ਮਿਲ ਰਿਹਾ ਹੈ ਅਜਿਹੇ ਵਿੱਚ ਜਸਟਿਨ ਟਰੂਡੋ ਨੂੰ ਇਹ ਸਪਸ਼ਟ ਕਰਨਾ ਚਾਹੀਦਾ ਹੈ ਕਿ ਉਨ੍ਹਾਂ ਵੱਲੋਂ ਘਰਾਂ ਵਿੱਚ ਟੈਸਟਿੰਗ ਅਤੇ ਬਦਲਵੀਆਂ ਟੈਸਟਿੰਗ ਡਿਵਾਇਸਿਜ਼ ਦੇ ਮੁਲਾਂਕਣ ਦੇ ਮਾਮਲੇ ਵਿੱਚ ਐਨੀ ਢਿੱਲ ਕਿਉਂ ਵਰਤੀ ਜਾ ਰਹੀ ਹੈ|
ਉਨ੍ਹਾਂ ਆਖਿਆ ਕਿ ਹੋਰ ਮੁਲਕ ਇਸ ਮਾਮਲੇ ਵਿੱਚ ਸਾਡੇ ਤੋਂ ਅੱਗੇ ਲੰਘ ਗਏ ਹਨ| ਯੂਕੇ ਵੱਲੋਂ ਘਰਾਂ ਵਿੱਚ ਮੁਫਤ ਟੈਸਟ ਦੀ ਸਹੂਲਤ ਦਿੱਤੀ ਜਾ ਰਹੀ ਹੈ| ਯੂਐਸ ਫੂਡ ਐਂਡ ਡਰੱਗ ਐਡਮਨਿਸਟ੍ਰੇਸ਼ਨ ਨੇ ਤਾਂ ਅਪਰੈਲ ਵਿੱਚ ਹੀ ਹੋਮ ਟੈਸਟ ਕਿੱਟ ਨੂੰ ਹਰੀ ਝੰਡੀ ਦੇ ਦਿੱਤੀ ਸੀ| ਜਰਮਨੀ ਵੱਲੋਂ ਵੀ ਕਮਰਸ਼ੀਅਲ ਟੈਸਟ ਆਨਲਾਈਨ ਮੁਹੱਈਆ ਕਰਵਾਏ ਗਏ ਹਨ| ਜੇ ਹੋਰ ਦੇਸ਼ ਅਜਿਹਾ ਕਰ ਸਕਦੇ ਹਨ ਤਾਂ ਫਿਰ ਇਸ ਪਾਸੇ ਕੈਨੇਡਾ ਵਿੱਚ ਦੇਰ ਕਿਉਂ ਹੋ ਰਹੀ ਹੈ? ਟਰੂਡੋ ਨੂੰ ਇਨ੍ਹਾਂ ਟੈਸਟਸ ਨੂੰ ਬਲਾਕ ਕਰਨ ਦੀ ਲੋੜ ਕਿਉਂ ਮਹਿਸੂਸ ਹੋ ਰਹੀ ਹੈ ਜਦੋਂ ਹੋਰ ਵਿਕਸਤ ਦੇਸ਼ਾਂ ਵੱਲੋਂ ਅਜਿਹਾ ਨਹੀਂ ਕੀਤਾ ਜਾ ਰਿਹਾ|
ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਦੇ ਹਿਸਾਬ ਨਾਲ ਟਰੂਡੋ ਸਿਆਸੀ ਤਾਣੇ ਬਾਣੇ ਵਿੱਚ ਉਲਝੇ ਹੋਏ ਹਨ| ਮਿਸਾਲ ਵਜੋਂ ਜੂਨ ਵਿੱਚ ਟਰੂਡੋ ਸਰਕਾਰ ਨੇ ਆਖਿਆ ਸੀ ਕਿ ਉਹ ਹੋਮ ਟੈਸਟ ਕਿੱਟਸ ਬਾਰੇ ਵਿਚਾਰ ਨਹੀਂ ਕਰ ਰਹੇ| ਪਿਛਲੇ ਹਫਤਿਆਂ ਵਿੱਚ ਟਰੂਡੋ ਨੇ ਆਖਿਆ ਕਿ ਹੁਣ ਉਹ ਹੋਮ ਟੈਸਟਸ ਕਿੱਟਸ ਮੁਹੱਈਆ ਕਰਵਾਉਣ ਬਾਰੇ ਸਥਿਤੀ ਦਾ ਮੁਲਾਂਕਣ ਕਰ ਰਹੀ ਹੈ| ਬਾਰਡਰ ਕੰਟਰੋਲਜ਼ ਤੇ ਮਾਸਕਸ ਵਾਂਗ ਹੀ ਟਰੂਡੋ ਬਿਨਾਂ ਕਿਸੇ ਕਾਰਨ ਸਾਰਿਆਂ ਦਾ ਸਮਾਂ ਬਰਬਾਦ ਕਰ ਰਹੇ ਹਨ ਤੇ ਜਿਸ ਕਾਰਨ ਵਾਇਰਸ ਤੇਜ਼ੀ ਨਾਲ ਦੁਬਾਰਾ ਫੈਲ ਰਿਹਾ ਹੈ| ਉਨ੍ਹਾਂ ਦੇ ਇਸ ਤਰ੍ਹਾਂ ਦੇ ਮਾਰੂ ਫੈਸਲਿਆਂ ਕਾਰਨ ਕੈਨੇਡੀਅਨਾਂ ਦੀਆਂ ਕੀਮਤੀ ਜਾਨਾਂ ਜਾ ਰਹੀਆਂ ਹਨ|
ਟਰੂਡੋ ਸਰਕਾਰ ਦੀਆਂ ਅਸਫਲਤਾਵਾਂ ਦਾ ਖਮਿਆਜਾ ਕੈਨੇਡੀਅਨਾਂ ਨੂੰ ਭੁਗਤਣਾ ਪੈ ਰਿਹਾ ਹੈ| ਕੈਨੇਡੀਅਨਜ਼ ਨੂੰ ਹੁਣ ਨਵੇਂ ਪਲੈਨ ਦੀ ਲੋੜ ਹੈ| ਟਰੂਡੋ ਨੂੰ ਆਪਣੇ ਬਿਊਰੋਕ੍ਰੈਟਸ ਉੱਤੇ ਟੇਕ ਰੱਖਣ ਦੀ ਥਾਂ ਹੁਣ ਇਸ ਸਮੱਸਿਆ ਦਾ ਸੇਫ ਹੱਲ ਕੱਢਣ ਵੱਲ ਧਿਆਨ ਦੇਣਾ ਚਾਹੀਦਾ ਹੈ|