ਟੋਰਾਂਟੋ, 14 ਅਗਸਤ (ਪੋਸਟ ਬਿਊਰੋ) : ਵ੍ਹਿਟਬੀ ਦੀ ਮਹਿਲਾ ਉੱਤੇ ਬੇਰਹਿਮੀ ਨਾਲ ਹਮਲਾ ਕਰਨ ਦੇ ਸਬੰਧ ਵਿੱਚ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ| ਪਿਛਲੇ ਮਹੀਨੇ ਸਬੰਧਤ ਮਹਿਲਾ ਆਪਣੇ ਨੇੜਲੇ ਇਲਾਕੇ ਵਿੱਚ ਸੈਰ ਲਈ ਗਈ ਸੀ ਕਿ ਕਿਸੇ ਨੇ ਉਸ ਉੱਤੇ ਹਮਲਾ ਕਰਕੇ ਉਸ ਨੂੰ ਇੱਕ ਨਾਲੇ ਦੇ ਕੋਲ ਮਰਨ ਵਾਸਤੇ ਛੱਡ ਦਿੱਤਾ|
ਜਾਂਚਕਾਰਾਂ ਦਾ ਕਹਿਣਾ ਹੈ ਕਿ ਘਟਨਾ ਦੀ ਸ਼ਿਕਾਰ ਹੋਈ ਮਹਿਲਾ ਆਪਣੀ ਰੁਟੀਨ ਮੁਤਾਬਕ 28 ਜੁਲਾਈ ਸ਼ਾਮ ਨੂੰ ਵ੍ਹਿਟਬੀ ਦੇ ਆਪਣੇ ਘਰ ਨੇੜੇ ਹੀ ਇੱਕਲੀ ਸੈਰ ਲਈ ਗਈ ਸੀ| ਪਰ ਜਦੋਂ ਆਪਣੇ ਰੋਜ਼ ਵਾਲੇ ਸਮੇਂ ਉੱਤੇ ਉਹ ਘਰ ਨਾ ਪਰਤੀ ਤਾਂ ਉਸ ਦੇ ਪਰਿਵਾਰ ਨੇ ਪੁਲਿਸ ਨਾਲ ਸੰਪਰਕ ਕੀਤਾ| ਸ਼ੁੱਕਰਵਾਰ ਸਵੇਰੇ ਦਰਹਾਮ ਪੁਲਿਸ ਚੀਫ ਪਾਲ ਮਾਰਟਿਨ ਨੇ ਇੱਕ ਨਿਊਜ਼ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਆਖਿਆ ਕਿ ਪਰਿਵਾਰ ਇਸ ਲਈ ਪਰੇਸ਼ਾਨ ਸੀ ਕਿਉਂਕਿ ਲੇਟ ਹੋਣਾ ਉਸ ਦੀ ਫਿਤਰਤ ਵਿੱਚ ਨਹੀਂ ਸੀ|
ਲੰਮੀਂ ਖੋਜਬੀਣ ਤੋਂ ਬਾਅਦ ਇਹ ਮਹਿਲਾ ਟੌਂਟਨ ਰੋਡ ਈਸਟ ਤੇ ਐਂਡਰਸਨ ਸਟਰੀਟ ਇਲਾਕੇ ਵਿੱਚ ਨਾਲੇ ਕੋਲੋਂ ਜ਼ਖ਼ਮੀ ਹਾਲਤ ਵਿੱਚ ਮਿਲੀ| ਫਿਰ ਇਸ ਮਹਿਲਾ ਨੂੰ ਏਅਰ ਐਂਬੂਲੈਂਸ ਰਾਹੀਂ ਨਾਜ਼ੁਕ ਹਾਲਤ ਵਿੱਚ ਟਰੌਮਾ ਸੈਂਟਰ ਲਿਜਾਇਆ ਗਿਆ| ਇਸ ਹਮਲੇ ਤੋਂ ਕੁੱਝ ਹਫਤੇ ਬਾਅਦ ਪੁਲਿਸ ਨੇ ਇੱਕ ਵਿਅਕਤੀ ਦਾ ਵੀਡੀਓ ਜਾਰੀ ਕੀਤਾ| ਮਾਰਟਿਨ ਨੇ ਆਖਿਆ ਕਿ ਸਾਡੇ ਮੀਡੀਆ ਅਤੇ ਕਮਿਊਨਿਟੀ ਮੈਂਬਰਜ਼ ਦੀ ਮਦਦ ਨਾਲ ਇਸ ਵਿਅਕਤੀ ਨੂੰ ਪਛਾਨਣ ਵਿੱਚ ਮਦਦ ਮਿਲੀ ਤੇ ਅਸੀਂ ਜਾਣ ਗਏ ਕਿ ਇਹੋ ਹੀ ਸਾਡਾ ਮਸ਼ਕੂਕ ਹੈ|
ਪੁਲਿਸ ਨੇ ਦੱਸਿਆ ਕਿ ਇਹ ਮਸ਼ਕੂਕ 21 ਸਾਲਾਂ ਦਾ ਵ੍ਹਿਟਬੀ ਵਾਸੀ ਐਂਥਨੀ ਡੌਇਰੌਨ-ਫਰਾਂਸਿਜ਼ ਹੈ| ਪੁਲਿਸ ਨੇ ਓਟਵਾ ਵਿੱਚ ਇਸ ਨੂੰ ਗ੍ਰਿਫਤਾਰ ਕਰ ਲਿਆ ਤੇ ਉਸ ਨੂੰ ਜ਼ਮਾਨਤ ਦੀ ਸੁਣਵਾਈ ਲਈ ਅਜੇ ਹਿਰਾਸਤ ਵਿੱਚ ਹੀ ਰੱਖਿਆ ਗਿਆ ਹੈ| ਫਰਾਂਸਿਜ਼ ਉੱਤੇ ਕਤਲ ਦੀ ਕੋਸ਼ਿਸ਼ ਕਰਨ, ਗੁੱਸੇ ਵਿੱਚ ਹਮਲਾ ਕਰਨ ਤੇ ਜਿਨਸੀ ਹਮਲਾ ਕਰਨ ਦੇ ਚਾਰਜ ਲਾਏ ਗਏ ਹਨ|