ਐਡਮੰਟਨ, 13 ਅਗਸਤ (ਪੋਸਟ ਬਿਊਰੋ) : ਵੈਸਟ ਸੈਂਟਰਲ ਅਲਬਰਟਾ ਵਾਟਰਫਾਲ ਉੱਤੇ ਇੱਕੋ ਪਰਿਵਾਰ ਦੇ ਜਿਨ੍ਹਾਂ ਤਿੰਨ ਵਿਅਕਤੀਆਂ ਦੀ ਡੁੱਬਣ ਕਾਰਨ ਮੌਤ ਹੋਈ ਸੀ ਉਨ੍ਹਾਂ ਦੀ ਪਛਾਣ ਪਤੀ, ਪਤਨੀ ਤੇ ਉਨ੍ਹਾਂ ਦੇ ਭਤੀਜੇ ਵਜੋਂ ਹੋਈ ਹੈ|
ਐਡਮੰਟਨ ਵਾਸੀ 38 ਸਾਲਾ ਡਾæ ਪਰਤਬ ਰਾਇ ਓਡ, ਉਨ੍ਹਾਂ ਦੀ ਪਤਨੀ 38 ਸਾਲਾ ਵੇਨਝਾਰ ਓਡ ਤੇ ਉਨ੍ਹਾਂ ਦੇ ਭਤੀਜੇ 25 ਸਾਲਾ ਅਨੂਪ ਕੁਮਾਰ ਓਡ ਦੀ ਨੌਰਡੈਗ, ਅਲਬਰਟਾ ਤੋਂ ਪੱਛਮ ਵੱਲ ਕ੍ਰੀਸੈਂਟ ਫਾਲ ਉੱਤੇ ਵਾਪਰੀ ਇਸ ਤ੍ਰਾਸਦਿਕ ਘਟਨਾ ਵਿੱਚ ਮੌਤ ਹੋ ਗਈ|
ਪਰਿਵਾਰਕ ਮੈਂਬਰ ਵਕਾਸ ਓਡ ਨੇ ਦੱਸਿਆ ਕਿ ਉਸ ਦਾ ਚਚੇਰਾ ਭਰਾ ਅਨੂਪ ਪਾਕਿਸਤਾਨ ਤੋਂ ਯੂਨੀਵਰਸਿਟੀ ਆਫ ਅਲਬਰਟਾ ਵਿਖੇ ਐਕਸਚੇਂਜ ਵਿਦਿਆਰਥੀ ਵਜੋਂ ਇੰਜੀਨੀਅਰਿੰਗ ਦੀ ਪੜ੍ਹਾਈ ਕਰ ਰਿਹਾ ਸੀ| ਸਭ ਤੋਂ ਪਹਿਲਾਂ ਤੈਰਾਕੀ ਕਰਦਿਆਂ ਹੋਇਆਂ ਉਹੀ ਪਾਣੀ ਨਾਲ ਵਹਿ ਕੇ ਝਰਨੇ ਦੇ ਹੇਠਾਂ ਪਹੁੰਚਿਆ|
ਪਰਤਬ ਤੇ ਵੇਨਝਾਰ ਵੱਲੋਂ ਫਿਰ ਅਨੂਪ ਨੂੰ ਬਚਾਉਣ ਦੀ ਕੋਸ਼ਿਸ਼ ਸੁæਰੂ ਕੀਤੀ ਗਈ ਪਰ ਉਹ ਵੀ ਪਾਣੀ ਦੇ ਤੇਜ਼ ਵਹਾਅ ਨਾਲ ਝਰਨੇ ਦੇ ਹੇਠਾਂ ਵਹਿ ਗਏ| ਬਾਹਰ ਖੜ੍ਹੇ ਉਨ੍ਹਾਂ ਦੇ 3, 6 ਤੇ 10 ਸਾਲਾਂ ਦੇ ਬੱਚਿਆਂ ਨੇ ਕਿਨਾਰੇ ਤੋਂ ਰੌਲਾ ਪਾ ਕੇ ਮਦਦ ਮੰਗੀ|