ਚੇਨਸਾਅਜ਼ ਨਾਲ ਜ਼ਖ਼ਮੀ ਹਾਲਤ ਵਿੱਚ ਟੋਰਾਂਟੋ ਦੇ ਬੀਚ
ਉੱਤੇ ਘੁੰਮ ਰਹੇ ਦੋ ਵਿਅਕਤੀ ਗ੍ਰਿਫਤਾਰ
ਟੋਰਾਂਟੋ, 11 ਅਗਸਤ (ਪੋਸਟ ਬਿਊਰੋ) : ਟੋਰਾਂਟੋ ਦੇ ਚੈਰੀ ਬੀਚ ਇਲਾਕੇ ਵਿੱਚੋਂ ਦੋ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ| ਇਨ੍ਹਾਂ ਵਿਅਕਤੀਆਂ ਕੋਲ ਚੇਨਸਾਅਜ਼ ਸਨ ਤੇ ਉਹ ਦੋਵੇਂ ਜ਼ਖ਼ਮੀ ਵੀ ਸਨ|
ਇੱਕ ਜੌਗਰ ਨੇ ਦੱਸਿਆ ਕਿ ਉਹ ਐਤਵਾਰ ਸਵੇਰੇ ਬੀਚ ਤੇ ਰੇਗਾਟਾ ਰੋਡ ਦਰਮਿਆਨ ਚੈਰੀ ਸਟਰੀਟ ਉੱਤੇ ਜੌਗਿੰਗ ਕਰ ਰਹੀ ਸੀ ਕਿ ਉਸ ਨੇ ਇੱਕ ਨਿੱਕੇ ਲੜਕੇ ਨੂੰ ਉਸ ਦੇ ਅੱਗਿਓਂ ਭੱਜਦਿਆਂ ਵੇਖਿਆ| ਫਿਰ ਉਸ ਨੇ ਥੋੜ੍ਹੀ ਦੂਰੀ ਉੱਤੇ ਦੋ ਵਿਅਕਤੀਆਂ ਨੂੰ ਵੇਖਿਆ ਜਿਨ੍ਹਾਂ ਦੇ ਹੱਥਾਂ ਵਿੱਚ ਚੇਨਸਾਅਜ਼ ਸਨ, ਉਨ੍ਹਾਂ ਦੇ ਸਿਰ, ਬਾਹਵਾਂ, ਧੜਾਂ ਉੱਤੇ ਖੂਨ ਹੀ ਖੂਨ ਸੀ| ਇਹ ਵੇਖ ਕੇ ਉਹ ਨੇੜੇ ਹੀ ਡਰ ਦੀ ਮਾਰੀ ਰੁੱਖਾਂ ਪਿੱਛੇ ਲੁਕ ਗਈ|
ਥੋੜ੍ਹੇ ਸਮੇਂ ਬਾਅਦ ਉਸ ਨੇ ਝਾਤੀ ਮਾਰ ਕੇ ਵੇਖਿਆ ਤਾਂ ਦੋਵੇਂ ਵਿਅਕਤੀ ਉਸ ਵੱਲ ਹੀ ਵੱਧ ਰਹੇ ਸਨ ਤੇ ਆਪਣੀਆਂ ਚੇਨਸਾਅਜ਼ ਦੇ ਇੰਜਣ ਸਟਾਰਟ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਸਨ| ਫਿਰ ਉਹ ਉੱਥੋਂ ਭੱਜ ਨਿਕਲੀ ਤੇ ਉਸ ਨੇ 911 ਉੱਤੇ ਫੋਨ ਕੀਤਾ| ਟੋਰਾਂਟੋ ਪੁਲਿਸ ਨੇ ਦੱਸਿਆ ਕਿ ਉਹ ਸਵੇਰੇ 9:49 ਉੱਤੇ ਮੌਕੇ ਉੱਤੇ ਪਹੁੰਚੇ| ਕਾਂਸਟੇਬਲ ਕੈਰੋਲਿਨ ਡੀ ਕਲੋਏ ਨੇ ਦੱਸਿਆ ਕਿ ਦੋ ਵਿਅਕਤੀ ਇੱਕ ਵੱਡੇ ਗਰੁੱਪ ਦੇ ਲੋਕਾਂ ਨਾਲ ਲੜਾਈ ਕਰ ਰਹੇ ਸਨ ਤੇ ਇਸ ਕਾਰਨ ਹੀ ਉਹ ਜ਼ਖ਼ਮੀ ਹੋਏ ਸਨ|
ਫਿਰ ਉਹ ਮੌਕੇ ਉੱਤੇ ਹਥਿਆਰ ਲੈ ਕੇ ਪਰਤੇ| ਪੁਲਿਸ ਨੇ ਦੱਸਿਆ ਕਿ ਦੁਬਾਰਾ ਘਟਨਾ ਵਾਲੀ ਥਾਂ ਉੱਤੇ ਪਹੁੰਚਣ ਉੱਤੇ ਪੁਲਿਸ ਨੇ ਦੋਵਾਂ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਤੇ ਉਨ੍ਹਾਂ ਉੱਤੇ ਚਾਰਜ ਵੀ ਲਾਏ ਗਏ| ਪੁਲਿਸ ਅਧਿਕਾਰੀਆਂ ਨੇ ਚਸ਼ਮਦੀਦਾਂ ਦੇ ਬਿਆਨ ਵੀ ਲਏ ਹਨ ਤੇ ਵੀਡੀਓ ਸਬੂਤ ਵੀ ਹਾਸਲ ਕੀਤੇ ਹਨ| ਮੇਅਰ ਜੌਹਨ ਟੋਰੀ ਨੇ ਆਖਿਆ ਕਿ ਚੈਰੀ ਬੀਚ Aੁੱਤੇ ਹੋਣ ਵਾਲੀਆਂ ਪਾਰਟੀਆਂ ਉੱਤੇ ਸਿਟੀ ਵੱਲੋਂ ਪੂਰੀ ਨਜ਼ਰ ਰੱਖੀ ਜਾਵੇਗੀ|