ਰਿਚਮੰਡ ਹਿੱਲ ਪੌਂਡ ਵਿੱਚੋਂ ਮਿਲੀ ਲਾਪਤਾ ਵਿਅਕਤੀ ਦੀ ਲਾਸ਼

ਟੋਰਾਂਟੋ, 5 ਅਗਸਤ (ਪੋਸਟ ਬਿਊਰੋ) : ਯੌਰਕ ਰੀਜਨਲ ਪੁਲਿਸ ਦੀ ਮਰੀਨ ਯੂਨਿਟ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਰਿਚਮੰਡ ਹਿੱਲ ਪੌਂਡ ਵਿੱਚੋਂ ਇੱਕ ਵਿਅਕਤੀ ਦੀ ਲਾਸ਼ ਮਿਲੀ ਹੈ|ਇਨ੍ਹਾਂ ਅਧਿਕਾਰੀਆਂ ਦਾ ਇਹ ਵੀ ਆਖਣਾ ਹੈ ਕਿ ਇਹ ਵਿਅਕਤੀ ਸਟੌਰਮ ਟਨਲ ਸਿਸਟਮ ਰਾਹੀਂ ਰਿਚਮੰਡ ਹਿੱਲ ਪੌਂਡ ਵਿੱਚ ਪਹੁੰਚਿਆ ਲੱਗਦਾ ਹੈ|
ਕਿਸੇ ਵਿਅਕਤੀ ਦੇ ਡੁੱਬਣ ਦੀ ਖਬਰ ਦੇ ਕੇ ਪੁਲਿਸ ਨੂੰ ਮੰਗਲਵਾਰ ਸ਼ਾਮੀਂ 5:30 ਵਜੇ  ਮੇਜਰ ਮੈਕੈਂਜ਼ੀ ਡਰਾਈਵ ਤੇ ਫਰੈਂਕ ਐਂਡੀਅਨ ਰੋਡ ਸੱਦਿਆ ਗਿਆ| ਮੌਕੇ ਉੱਤੇ ਪਹੁੰਚੀ ਪੁਲਿਸ ਨੇ ਟੋਰਾਂਟੋ ਦੇ ਇੱਕ 26 ਸਾਲਾ ਵਿਅਕਤੀ ਨੂੰ ਸਟੌਰਮ ਡਰੇਨ ਟਨਲ ਵਿੱਚ ਪਾਇਆ, ਜਿਹੜੀ ਨੇੜਲੇ ਪੌਂਡ ਨਾਲ ਜੁੜੀ ਹੋਈ ਹੈ| ਉਸ ਨੂੰ ਪਾਣੀ ਵਿੱਚੋਂ ਤਾਂ ਕੱਢ ਲਿਆ ਗਿਆ ਤੇ ਸੌæਕ ਲੱਗਣ ਦੇ ਇਲਾਜ ਲਈ ਹਸਪਤਾਲ ਦਾਖਲ ਕਰਵਾਇਆ ਗਿਆ|
ਪੁਲਿਸ ਨੇ ਦੱਸਿਆ ਕਿ ਉਸ ਵਿਅਕਤੀ ਨੇ ਉਨ੍ਹਾਂ ਨੂੰ ਦੱਸਿਆ ਕਿ ਉਹ ਅਤੇ ਉਸ ਦਾ ਦੋਸਤ ਟਨਲ ਸਿਸਟਮ ਵਿੱਚ ਹੀ ਸਨ ਜਦੋਂ ਮੀਂਹ ਕਾਰਨ ਪਾਣੀ ਦਾ ਪੱਧਰ ਵਧਣਾ ਸ਼ੁਰੂ ਹੋਇਆ| ਫਿਰ ਟਨਲ ਪੂਰੀ ਤਰ੍ਹਾਂ ਪਾਣੀ ਨਾਲ ਭਰ ਗਈ ਤੇ ਉਸ ਦਾ ਦੋਸਤ ਰੁੜ੍ਹ ਕੇ ਨੇੜਲੇ ਪੌਂਡ ਵਿੱਚ ਜਾ ਡਿੱਗਿਆ| ਉਸ ਨੇ ਆਪਣੇ ਦੋਸਤ ਦੀ ਪਛਾਣ ਰਿਚਮੰਡ ਹਿੱਲ ਦੇ 30 ਸਾਲਾ ਵਿਅਕਤੀ ਵਜੋਂ ਦੱਸੀ|
ਬੁੱਧਵਾਰ ਨੂੰ ਦੁਪਹਿਰੇ 1:00 ਵਜੇ ਤੋਂ ਪਹਿਲਾਂ ਮਰੀਨ ਯੂਨਿਟ ਨੂੰ ਪੌਂਡ ਵਿੱਚੋਂ ਪਾਣੀ ਵਿੱਚ ਡੁਬੀ ਲਾਸ਼ ਮਿਲ ਗਈ| ਮ੍ਰਿਤਕ ਦੀ ਪਛਾਣ ਕਰਨ ਲਈ ਕੌਰੋਨਰ ਵੀ ਮੌਕੇ ਉੱਤੇ ਪਹੁੰਚੇ|