ਨਾਬਾਲਗ Aੁੱਤੇ ਜਿਨਸੀ ਹਮਲਾ ਕਰਨ ਵਾਲੇ
ਅਧਿਆਪਕ ਨੂੰ ਕੀਤਾ ਗਿਆ ਚਾਰਜ
ਟੋਰਾਂਟੋ, 4 ਅਗਸਤ (ਪੋਸਟ ਬਿਊਰੋ) : ਟੋਰਾਂਟੋ ਪੁਲਿਸ ਵੱਲੋਂ ਇੱਕ ਨਾਬਾਲਗ ਉੱਤੇ ਜਿਨਸੀ ਹਮਲਾ ਕਰਨ ਵਾਲੇ ਅਧਿਆਪਕ ਨੂੰ ਚਾਰਜ ਕੀਤਾ ਗਿਆ ਹੈ| ਪੁਲਿਸ ਦਾ ਕਹਿਣਾ ਹੈ ਕਿ ਇਸ ਅਧਿਆਪਕ ਦਾ ਸ਼ਿਕਾਰ ਹੋਰ ਬੱਚੇ ਵੀ ਹੋਏ ਹੋ ਸਕਦੇ ਹਨ|
ਪੁਲਿਸ ਨੇ ਦੱਸਿਆ ਕਿ ਇਸ ਅਧਿਆਪਕ ਨੇ ਸਬੰਧਤ ਨਾਬਾਲਗ ਲੜਕੇ ਨਾਲ ਪਹਿਲਾ ਟੈਕਸਟ ਤੇ ਸੋਸ਼ਲ ਮੀਡੀਆ ਰਾਹੀਂ ਗੱਲ ਕਰਨੀ ਸ਼ੁਰੂ ਕੀਤੀ ਤੇ ਫਿਰ ਉਸ ਨੂੰ ਨਿਜੀ ਤੌਰ ਉੱਤੇ ਮਿਲਣ ਲਈ ਸੱਦਿਆ| ਇਸ ਸਮੇਂ ਹੀ ਲੜਕੇ ਉੱਤੇ ਅਧਿਆਪਕ ਵੱਲੋਂ ਜਿਨਸੀ ਹਮਲਾ ਕੀਤਾ ਗਿਆ| ਇਹ ਹਮਲਾ 7 ਜੁਲਾਈ ਨੂੰ ਕੀਤਾ ਗਿਆ ਤੇ ਅਧਿਆਪਕ ਨੂੰ 28 ਜੁਲਾਈ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ|
43 ਸਾਲਾ ਅਧਿਆਪਕ ਤਾਹਿਰ ਸੈਫੂਦੀਨ ਨੂੰ 18 ਸਾਲ ਤੋਂ ਘੱਟ ਉਮਰ ਦੇ ਬੱਚੇ ਉੱਤੇ ਜਿਨਸੀ ਹਮਲਾ ਕਰਨ, ਜਿਨਸੀ ਸ਼ੋਸ਼ਣ ਕਰਨ, ਨਾਬਾਲਗ ਨੂੰ ਭਰਮਾਉਣ ਤੇ ਉਸ ਨਾਲ ਲੱਚਰ ਤਸਵੀਰਾਂ ਸਾਂਝੀਆਂ ਕਰਨ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ| ਉਸ ਨੂੰ 11 ਸਤੰਬਰ ਨੂੰ ਅਦਾਲਤ ਸਾਹਮਣੇ ਪੇਸ਼ ਕੀਤਾ ਜਾਵੇਗਾ|