ਟੋਰਾਂਟੋ, 7 ਜੁਲਾਈ (ਪੋਸਟ ਬਿਊਰੋ) : ਗ੍ਰੇਟਰ ਟੋਰਾਂਟੋ ਏਰੀਆ ਵਿੱਚ ਘਰਾਂ ਦੀ ਵਿੱਕਰੀ ਦੇ ਕੰਮ ਵਿੱਚ ਕੋਵਿਡ-19 ਮਹਾਂਮਾਰੀ ਦੇ ਬਾਵਜੂਦ ਤੇਜ਼ੀ ਆਈ ਹੈ ਤੇ ਇਨ੍ਹਾਂ ਦੀਆਂ ਕੀਮਤਾਂ ਵਿੱਚ ਵਾਧਾ ਦਰਜ ਕੀਤਾ ਗਿਆ ਹੈ। ਪਰ ਪਿਛਲੇ ਸਾਲ ਦੇ ਮੁਕਾਬਲੇ ਇਸ ਵਾਰੀ ਮੁਕੰਮਲ ਲੈਣ-ਦੇਣ ਜ਼ਰਾ ਘੱਟ ਹੈ।

ਮੰਗਲਵਾਰ ਨੂੰ ਟੋਰਾਂਟੋ ਰੀਜਨਲ ਰੀਅਲ ਅਸਟੇਟ ਬੋਰਡ ਨੇ ਆਖਿਆ ਕਿ ਜੂਨ ਵਿੱਚ ਰੀਜਨ ਵਿੱਚ ਵਿਕੇ ਘਰ ਇੱਕ ਸਾਲ ਪਹਿਲਾਂ ਕਾਇਮ ਰਿਕਾਰਡ ਨਾਲੋਂ ਥੋੜ੍ਹਾ ਘੱਟ ਹਨ। ਜੂਨ 2019 ਦੇ ਮੁਕਾਬਲੇ ਘਰਾਂ ਦੀ ਵਿੱਕਰੀ ਦੀ ਔਸਤ ਕੀਮਤ ਵਿੱਚ 12 ਫੀ ਸਦੀ ਦਾ ਵਾਧਾ ਦਰਜ ਕੀਤਾ ਗਿਆ। ਟੀਆਰਆਰਈਬੀ ਦੀ ਪ੍ਰੈਜ਼ੀਡੈਂਟ ਲੀਜ਼ਾ ਪਟੇਲ ਨੇ ਇੱਕ ਬਿਆਨ ਵਿੱਚ ਆਖਿਆ ਕਿ ਅਸੀਂ ਹਾਲਾਤ ਪਹਿਲਾਂ ਵਰਗੇ ਹੋਣ ਦੇ ਸ਼ੁਰੂਆਤੀ ਦੌਰ ਵਿੱਚ ਹਾਂ ਪਰ 2020 ਦੀ ਦੂਜੀ ਛਿਮਾਹੀ ਵਿੱਚ ਮਾਰਕਿਟ ਦੇ ਮਜ਼ਬੂਤ ਹੋਣ ਦੀ ਸੰਭਾਵਨਾ ਹੈ।

ਕੋਵਿਡ-19 ਮਹਾਂਮਾਰੀ ਕਾਰਨ ਘਰਾਂ ਦੀ ਵਿੱਕਰੀ ਵਿੱਚ ਇਸ ਸਾਲ ਦੇ ਸ਼ੁਰੂ ਵਿੱਚ ਕਾਫੀ ਗਿਰਾਵਟ ਦਰਜ ਕੀਤੀ ਗਈ। ਪਰ ਕਾਰੋਬਾਰਾਂ ਦੇ ਮੁੜ ਖੁੱਲ੍ਹਣ ਨਾਲ ਘਰਾਂ ਦੀ ਵਿੱਕਰੀ ਦੇ ਕੰਮ ਵਿੱਚ ਵੀ ਤੇਜ਼ੀ ਆਈ ਹੈ। ਰੀਅਲ ਅਸਟੇਟ ਬੋਰਡ ਨੇ ਦੱਸਿਆ ਕਿ ਜੂਨ ਦੇ ਮਹੀਨੇ ਵਿੱਚ 8701 ਘਰਾਂ ਦੀ ਵਿੱਕਰੀ ਹੋਈ, ਜੋ ਕਿ ਪਿਛਲੇ ਸਾਲ ਇਸੇ ਮਹੀਨੇ ਹੋਈ ਵਿੱਕਰੀ ਨਾਲੋਂ 1.4 ਫੀ ਸਦੀ ਘੱਟ ਹੈ। ਪਰ ਜੇ ਇਸ ਸਾਲ ਮਈ ਦੀ ਗੱਲ ਕੀਤੀ ਜਾਵੇ ਤਾਂ ਜੂਨ ਵਿੱਚ ਉਸ ਹਿਸਾਬ ਨਾਲ 84 ਫੀ ਸਦੀ ਵਾਧਾ ਹੋਇਆ।

ਜੂਨ 2019 ਦੇ ਮੁਕਾਬਲੇ ਘਰਾਂ ਦੀ ਔਸਤ ਕੀਮਤ 930,869 ਸੀ, ਜੋ ਕਿ 11.9 ਫੀ ਸਦੀ ਵੱਧ ਹੈ। ਪਟੇਲ ਨੇ ਆਖਿਆ ਕਿ ਉਨ੍ਹਾਂ ਨੂੰ ਪੂਰੀ ਆਸ ਹੈ ਕਿ ਕੋਵਿਡ-19 ਤੋਂ ਉਭਰ ਕੇ ਰੀਅਲ ਅਸਟੇਟ ਮਾਰਕਿਟ ਮੁੜ ਪੈਰਾਂ ਸਿਰ ਹੋਣ ਵਿੱਚ ਕਾਮਯਾਬ ਹੋਵੇਗੀ।