ਵਾਸਿੰਗਟਨ, 14 ਨਵੰਬਰ (ਪੋਸਟ ਬਿਊਰੋ) : ਉੱਤਰੀ ਅਮਰੀਕਾ ਵਿੱਚ ਉਦੋਂ ਤੱਕ ਆਰਥਿਕ ਅਸਥਿਰਤਾ ਦਾ ਖਤਰਾ ਮੰਡਰਾਉਂਦਾ ਰਹੇਗਾ ਜਦੋਂ ਤੱਕ ਕਾਂਗਰਸ, ਜੋ ਕਿ ਪਹਿਲਾਂ ਹੀ ਵੰਡੀ ਹੋਈ ਹੈ, ਯੂਐਸ-ਮੈਕਸਿਕੋ-ਕੈਨੇਡਾ ਅਗਰੀਮੈਂਟ (ਯੂਐਸਐਮਸੀਏ) ਉੱਤੇ ਸਹੀ ਨਹੀਂ ਪਾਉਂਦੀ। ਦੋਵਾਂ ਦੇਸ਼ਾਂ ਦੇ ਟਰੇਡ ਮਾਹਿਰਾਂ ਨੇ ਇਹ ਪੇਸ਼ੀਨਿਗੋਈ ਕੀਤੀ ਹੈ ਕਿ ਮੁੜ ਤਕੜੇ ਹੋਏ ਡੈਮੋਕ੍ਰੈਟਸ ਨੇ ਇਸ ਡੀਲ ਉੱਤੇ ਮੋਹਰ ਨਾ ਲਾਉਣ ਦਾ ਤਹੱਈਆ ਪ੍ਰਗਟਾਇਆ ਹੈ।
ਇਸ ਸਮਝੌਤੇ ਉੱਤੇ 30 ਨਵੰਬਰ ਨੂੰ ਦਸਤਖ਼ਤ ਕੀਤੇ ਜਾਣ ਦੀ ਸੰਭਾਵਨਾ ਹੈ ਜਦੋਂ ਤਿੰਨਾਂ ਮੁਲਕਾਂ ਦੇ ਆਗੂ ਬਿਊਨਸ ਏਅਰਜ਼ ਵਿੱਚ ਜੀ 20 ਸਿਖਰ ਵਾਰਤਾ ਵਿੱਚ ਦੋ ਦਿਨਾਂ ਲਈ ਇੱਕਠੇ ਹੋਣਗੇ। ਪਰ ਜੇ ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਵੱਲੋਂ ਲਾਏ ਗਏ ਸਟੀਲ ਤੇ ਐਲੂਮੀਲੀਅਮ ਟੈਰਿਫਜ਼ ਉੱਤੇ ਖੜੋਤ ਇਸੇ ਤਰ੍ਹਾਂ ਜਾਰੀ ਰਹੀ ਤਾਂ ਇਸ ਵਾਰਤਾ ਵਿੱਚ ਉੱਚ ਪੱਧਰੀ ਆਗੂ ਹਿੱਸਾ ਨਹੀਂ ਲੈਣਗੇ।
ਪਰ ਇਸ ਡੀਲ ਦੇ ਰਾਹ ਵਿੱਚ ਆਉਣ ਵਾਲਾ ਇਹ ਇੱਕਲਾ ਅੜਿੱਕਾ ਨਹੀਂ ਹੈ। ਰਸਮੀ ਤੌਰ ਉੱਤੇ ਦਸਤਖ਼ਤ ਕੀਤੇ ਜਾਣਾ ਵਿਧਾਨਕ ਪੁਸ਼ਟੀ ਤੋਂ ਘੱਟ ਅਹਿਮ ਹੈ। ਜਨਵਰੀ ਵਿੱਚ ਹਾਊਸ ਆਫ ਰਿਪਰਜੈ਼ਂਟੇਟਿਵਸ ਵਿੱਚ ਵਧੇਰੇ ਸੀਟਾਂ ਹਾਸਲ ਕਰਨ ਜਾ ਰਹੇ ਡੈਮੋਕ੍ਰੈਟਸ ਨੇ ਵੀ ਇਸ ਮਾਮਲੇ ਵਿੱਚ ਢਿੱਲੀ ਮੱਠੀ ਪਹੁੰਚ ਅਪਨਾਉਣ ਦਾ ਫੈਸਲਾ ਕੀਤਾ ਹੈ।