ਸਿੰਗਾਪੁਰ, 14 ਨਵੰਬਰ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ 10 ਦੱਖਣ ਏਸ਼ੀਆਈ ਮੁਲਕਾਂ ਨੂੰ ਇਹ ਸਪਸ਼ਟ ਕੀਤਾ ਹੈ ਕਿ ਕੈਨੇਡਾ ਫਰੀ ਟਰੇਡ ਡੀਲ ਬਾਰੇ ਉਨ੍ਹਾਂ ਨਾਲ ਚੰਗੀ ਤਰ੍ਹਾਂ ਵਿਸਥਾਰ ਪੂਰਬਕ ਗੱਲ ਕਰਨੀ ਚਾਹੁੰਦਾ ਹੈ।
ਆਸੀਆਨ, ਜਿਨ੍ਹਾਂ ਦੀ ਸਾਂਝੀ ਆਬਾਦੀ 650 ਮਿਲੀਅਨ ਹੈ ਤੇ ਸਾਂਝਾ ਅਰਥਚਾਰਾ 2.8 ਟ੍ਰਿਲੀਅਨ ਡਾਲਰ ਹੈ, ਸਿਖਰ ਵਾਰਤਾ ਦੌਰਾਨ ਦਿੱਤੇ ਲੰਚ ਵਿੱਚ ਟਰੂਡੋ ਨੇ ਕੈਨੇਡਾ ਦਾ ਪੱਖ ਸਪਸ਼ਟ ਕੀਤਾ। ਇੱਥੇ ਦੱਸਣਾ ਬਣਦਾ ਹੈ ਕਿ ਆਸੀਆਨ ਮੁਲਕ ਪਹਿਲਾਂ ਹੀ ਕੈਨੇਡਾ ਦੇ ਛੇਵੇਂ ਸੱਭ ਤੋਂ ਵੱਡੇ ਕਾਰੋਬਾਰੀ ਭਾਈਵਾਲ ਹਨ।
ਟਰੂਡੋ ਚਾਹੁੰਦੇ ਹਨ ਕਿ ਜਲਦ ਤੋਂ ਜਲਦ ਆਸੀਆਨ ਤੇ ਕੈਨੇਡਾ ਦੇ ਵਾਰਤਾਕਾਰ ਇਸ ਮੁਕਤ ਵਪਾਰ ਸਮਝੌਤੇ ਬਾਰੇ ਗੱਲ ਕਰਨੀ ਸ਼ੁਰੂ ਕਰਨ। ਇਸ ਤੋਂ ਇਲਾਵਾ ਟਰੂਡੋ ਨੇ ਇਸ ਮੌਕੇ ਆਖਿਆ ਕਿ ਉਹ ਆਸੀਆਨ ਦੇਸ਼ਾਂ ਨੂੰ ਇਹ ਅਪੀਲ ਕਰਦੇ ਹਨ ਕਿ ਸੰਯੁਕਤ ਰਾਸ਼ਟਰ ਦੀ ਸੁਰੱਖਿਆ ਕਾਉਂਸਲ ਵਿੱਚ ਕੈਨੇਡਾ ਨੂੰ ਸੀਟ ਦਿੱਤੇ ਜਾਣ ਦੀ ਉਨ੍ਹਾਂ ਦੀ ਕੋਸਿ਼ਸ਼ ਦਾ ਸਮਰਥਨ ਕਰਨ। ਟਰੂਡੋ ਦੋ ਦਿਨ ਤੋਂ ਸਿੰਗਾਪੁਰ ਵਿੱਚ ਆਸੀਆਨ ਮੁਲਕਾਂ ਨੂੰ ਇਹ ਜਤਾਉਣ ਲਈ ਮੌਜੂਦ ਹਨ ਕਿ ਏਸ਼ੀਆਈ ਕੰਪਨੀਆਂ ਲਈ ਅਮਰੀਕਾ ਨਾਲੋਂ ਕੈਨੇਡਾ ਵਿੱਚ ਨਿਵੇਸ਼ ਕਰਨਾ ਵਧੇਰੇ ਫਾਇਦੇਮੰਦ ਸੌਦਾ ਹੈ।
ਬੁੱਧਵਾਰ ਨੂੰ ਟਰੂਡੋ ਨੇ ਚੀਨ ਦੇ ਪ੍ਰੀਮੀਅਰ ਲੀ ਕੇਕੀਆਂਗ ਨਾਲ ਵੀ ਇਸ ਆਸ ਨਾਲ ਮੁਲਾਕਾਤ ਕੀਤੀ ਕਿ ਦੋਵਾਂ ਦੇਸਾਂ ਦਰਮਿਆਨ ਜਲਦ ਤੋਂ ਜਲਦ ਮੁਕਤ ਵਪਾਰ ਸਮਝੌਤਾ ਅੱਗੇ ਵੱਧ ਸਕੇ। ਟਰੂਡੋ ਨੇ ਮੁਲਾਕਾਤ ਦੀ ਸ਼ੁਰੂਆਤ ਇਹ ਕਹਿੰਦਿਆਂ ਹੋਇਆਂ ਕੀਤੀ ਕਿ ਉਮੀਦ ਹੈ ਕਿ ਅਸੀਂ ਸਾਰੇ ਪੱਖ ਖੁੱਲ੍ਹੇ ਰੱਖ ਕੇ ਗੱਲਬਾਤ ਕਰਾਂਗੇ।