ਟੋਰਾਂਟੋ, 11 ਜੂਨ (ਪੋੋਸਟ ਬਿਊਰੋ) : ਅੰਦਾਜ਼ਨ 190,000 ਕੈਨੇਡੀਅਨਾਂ ਨੂੰ 3 ਜੂਨ ਤੱਕ ਆਪਣੇ ਕੈਨੇਡਾ ਐਮਰਜੰਸੀ ਰਿਸਪਾਂਸ ਬੈਨੇਫਿਟ ਚੈੱਕ ਮੋੜਨੇ ਹੀ ਪੈਣਗੇ। ਇਹ ਖੁਲਾਸਾ ਕੈਨੇਡਾ ਰੈਵਨਿਊ ਏਜੰਸੀ ਵੱਲੋਂ ਕੀਤਾ ਗਿਆ।
ਫੈਡਰਲ ਸਰਕਾਰ ਨੇ ਕੋਵਿਡ-19 ਮਹਾਂਮਾਰੀ ਕਾਰਨ ਕੰਮ ਨਾ ਕਰ ਸਕਣ ਵਾਲੇ ਕੈਨੇਡੀਅਨਾਂ ਦੀ ਮਦਦ ਕਰਨ ਲਈ ਮਾਰਚ ਵਿੱਚ ਸੀਈਆਰਬੀ ਪ੍ਰੋਗਰਾਮ ਕਾਇਮ ਕੀਤਾ ਸੀ। ਇਸ ਤਹਿਤ ਚਾਰ ਮਹੀਨਿਆਂ ਲਈ ਕੈਨੇਡੀਅਨਾਂ ਨੂੰ ਪ੍ਰਤੀ ਮਹੀਨਾ 2000 ਡਾਲਰ ਦੇਣ ਦੀ ਪੇਸ਼ਕਸ਼ ਕੀਤੀ ਗਈ ਸੀ। ਸਰਕਾਰ ਵੱਲੋਂ ਇਹ ਚੈੱਕ ਉਨ੍ਹਾਂ ਲੋਕਾਂ ਨੂੰ ਮੋੜਨ ਲਈ ਆਖਿਆ ਜਾ ਰਿਹਾ ਹੈ ਜਿਹੜੇ ਇਸ ਬੈਨੇਫਿਟ ਲਈ ਯੋਗ ਨਹੀਂ ਹਨ। ਇਹ ਵੀ ਹੋ ਸਕਦਾ ਹੈ ਕਿ ਉਨ੍ਹਾਂ ਨੂੰ ਇਹ ਪਤਾ ਹੀ ਨਾ ਹੋਵੇ ਕਿ ਉਹ ਕਿਸੇ ਹੋਰ ਕੋਵਿਡ-19 ਫੈਡਰਲ ਏਡ ਪ੍ਰੋਗਰਾਮ ਤਹਿਤ ਕਵਰ ਹੋ ਰਹੇ ਹੋਣ, ਉਨ੍ਹਾਂ ਨੂੰ ਸੀਈਆਰਬੀ ਹਾਸਲ ਕਰਦੇ ਸਮੇਂ ਮੁੜ ਨੌਕਰੀ ਉੱਤੇ ਰੱਖ ਲਿਆ ਗਿਆ ਹੋਵੇ, ਜਾਂ ਫਿਰ ਉਨ੍ਹਾਂ ਪ੍ਰੋਗਰਾਮ ਦੇ ਸ਼ੁਰੂਆਤੀ ਦਿਨਾਂ ਦੌਰਾਨ ਕਿਸੇ ਤਰ੍ਹਾਂ ਦੇ ਭੰਬਲਭੂਸੇ ਦੇ ਚੱਲਦਿਆਂ ਇਸ ਪ੍ਰੋਗਰਾਮ ਲਈ ਅਪਲਾਈ ਕਰ ਦਿੱਤਾ ਹੋਵੇ।
ਸੀਆਰਏ ਨੇ ਇਹ ਵੀ ਆਖਿਆ ਕਿ ਸੀਈਆਰਬੀ ਬੈਨੇਫਿਟਜ਼ ਦੀ ਕਥਿਤ ਤੌਰ ਉੱਤੇ ਹੋ ਰਹੀ ਦੁਰਵਰਤੋਂ ਦੀ ਵੀ ਸੂਹ ਮਿਲੀ ਹੈ। ਇਸ ਤਰ੍ਹਾਂ ਦੀਆਂ ਰਿਪੋਰਟਾਂ 3 ਜੂਨ ਤੋਂ ਉਦੋਂ ਆਉਣੀਆਂ ਸੁ਼ਰੂ ਹੋਈਆਂ ਜਦੋਂ ਤੋਂ ਸਰਕਾਰ ਨੇ ਫਰਾਡ ਦੇ ਮਾਮਲੇ ਸਾਹਮਣੇ ਲਿਆਉਣ ਲਈ ਕੈਨੇਡੀਅਨਾਂ ਵਾਸਤੇ ਖਾਸ ਲਾਈਨ ਸ਼ੁਰੂ ਕੀਤੀ ਹੈ।
ਇਸ ਬਾਰੇ ਗੱਲ ਕਰਦਿਆਂ ਇੰਪਲੌਇਮੈਂਟ, ਵਰਕਫੋਰਸ ਡਿਵੈਲਪਮੈਂਟ ਤੇ ਡਿਸਐਬਿਲਿਟੀ ਇਨਕਲੂਸ਼ਨ (Employment, Workforce Development and Disability Inclusion) ਮੰਤਰੀ ਕਾਰਲਾ ਕੁਆਲਤਰੋ ਨੇ ਆਖਿਆ ਕਿ ਸੀਈਆਰਬੀ ਲਈ ਅਪਲਾਈ ਕਰਨ ਵਾਲੇ 8.4 ਮਿਲੀਅਨ ਕੈਨੇਡੀਅਨਾਂ ਵਿੱਚੋਂ 1 ਤੇ 2 ਫੀ ਸਦੀ ਕੈਨੇਡੀਅਨਾਂ ਨੇ ਅਜਿਹਾ ਫਰਾਡ ਵਜੋਂ ਕੀਤਾ ਹੈ।