ਓਟਵਾ, 31 ਮਾਰਚ (ਪੋਸਟ ਬਿਊਰੋ) : ਭਾਰਤ ਵਿੱਚ ਫਸੇ ਕੈਨੇਡੀਅਨਾਂ ਨੂੰ ਕੈਨੇਡਾ ਪਰਤਣ ਲਈ ਵਿਸ਼ੇਸ਼ ਫਲਾਈਟ ਮੁਹੱਈਆ ਕਰਵਾਉਣ ਦਾ ਬਦਲ ਦਿੱਤਾ ਜਾ ਰਿਹਾ ਹੈ। ਪਰ ਫੈਡਰਲ ਸਰਕਾਰ ਅਨੁਸਾਰ ਉਨ੍ਹਾਂ ਨੂੰ ਇਸ ਲਈ 2,900 ਡਾਲਰ ਦੇਣੇ ਹੋਣਗੇ।
ਸਰਕਾਰ ਵੱਲੋਂ ਭਾਰਤ ਵਿੱਚ ਰਜਿਸਟਰਡ ਕੈਨੇਡੀਅਨਾਂ ਨੂੰ ਪਿੱਛੇ ਜਿਹੇ ਭੇਜੀ ਗਈ ਇੱਕ ਈਮੇਲ ਵਿੱਚ ਆਖਿਆ ਗਿਆ ਕਿ ਉਨ੍ਹਾਂ ਨੂੰ ਕੈਨੇਡਾ ਵਾਪਿਸ ਲਿਆਉਣ ਲਈ ਵਿਸ਼ੇਸ਼ ਫਲਾਈਟਜ਼ ਉਪਲਬਧ ਹਨ। ਇਸ ਈਮੇਲ ਵਿੱਚ ਕੈਨੇਡੀਅਨਾਂ ਨੂੰ ਇਸ ਸੁਨਹਿਰੇ ਮੌਕੇ ਦਾ ਲਾਹਾ ਲੈਣ ਲਈ ਹੱਲਾਸ਼ੇਰੀ ਵੀ ਦਿੱਤੀ ਗਈ ਪਰ ਇਸ ਲਈ ਨਾਲ ਹੀ ਉਨ੍ਹਾਂ ਨੂੰ 2900 ਡਾਲਰ ਪ੍ਰਤੀ ਯਾਤਰੀ ਦੇਣ ਲਈ ਵੀ ਸਪਸ਼ਟ ਕੀਤਾ ਗਿਆ।
ਇਸ ਸਮੇਂ ਭਾਰਤ ਤੋਂ ਆਉਣ ਵਾਲੀ ਫਲਾਈਟ ਦੇ 2000 ਡਾਲਰ ਤੋਂ ਵੀ ਘੱਟ ਲੱਗਦੇ ਹਨ ਤੇ 2900 ਡਾਲਰ ਦਾ ਇਹ ਟੈਗ ਕਿਤੇ ਜਿ਼ਆਦਾ ਮਹਿੰਗਾ ਹੈ। ਭਾਰਤ ਵਿੱਚ ਆਪਣੇ ਪਤੀ ਤੇ ਬੱਚੇ ਨਾਲ ਫਸੀ ਕੈਨੇਡੀਅਨ ਮਲੀਸਾ ਚੱਡਾ ਨੇ ਆਖਿਆ ਕਿ ਸਾਨੂੰ ਇਸ ਗੱਲ ਦੀ ਖੁਸ਼ੀ ਹੈ ਕਿ ਸਾਨੂੰ ਫਲਾਈਟਸ ਮਿਲ ਰਹੀਆਂ ਹਨ ਤੇ ਅਸੀਂ ਜਲਦ ਘਰ ਪਹੁੰਚਾਂਗੇ ਪਰ ਜਿਹੜੀ ਕੀਮਤ ਉਹ ਆਖ ਰਹੇ ਹਨ ਉਹ ਕਾਫੀ ਜਿ਼ਆਦਾ ਹੈ। ਸਾਨੂੰ ਇੰਜ ਲੱਗ ਰਿਹਾ ਹੈ ਕਿ ਇਹ ਵਾਧੂ ਪੈਸਾ ਦੇਣ ਲਈ ਸਾਡੇ ਨਾਲ ਧੱਕੇਸ਼ਾਹੀ ਕੀਤੀ ਜਾ ਰਹੀ ਹੈ।
ਗਲੋਬਲ ਅਫੇਅਰਜ਼ ਕੈਨੇਡਾ ਦੇ ਬੁਲਾਰੇ ਨੇ ਆਖਿਆ ਕਿ ਇਹ ਸੱਭ ਤੋਂ ਘੱਟ ਕੀਮਤ ਹੈ ਜਿਸਦੀ ਪੇਸ਼ਕਸ਼ ਕਿਸੇ ਏਅਰਲਾਈਨ ਵੱਲੋਂ ਕੈਨੇਡਾ ਨੂੰ ਕੀਤੀ ਗਈ ਹੈ। ਉਨ੍ਹਾਂ ਆਖਿਆ ਕਿ ਇਹ ਏਅਰਲਾਈਨ ਕੈਨੇਡੀਅਨ ਵੀ ਨਹੀਂ ਹੈ। ਉਨ੍ਹਾਂ ਆਖਿਆ ਕਿ ਮੌਜੂਦਾ ਹਾਲਾਤ ਕਾਰਨ ਇਸ ਸਮੇਂ ਉਡਾਨਾਂ ਕਾਫੀ ਮਹਿੰਗੀਆਂ ਹਨ ਕਿਉਂਕਿ ਏਅਰਲਾਈਨਜ਼ ਨੂੰ ਵੀ ਕੋਈ ਮੁਨਾਫਾ ਨਹੀਂ ਹੋ ਰਿਹਾ। ਸਰਕਾਰ ਵੱਲੋਂ ਦੇਸ਼ ਪਰਤਣ ਲਈ ਤਿਆਰ ਕੈਨੇਡੀਅਨਾਂ ਦੀ ਵਿੱਤੀ ਮਦਦ ਵਾਸਤੇ 5000 ਡਾਲਰ ਦਾ ਲੋਨ ਵੀ ਮੁਹੱਈਆ ਕਰਵਾਇਆ ਜਾ ਰਿਹਾ ਹੈ। ਹੋਰਨਾਂ ਦੇਸ਼ਾਂ ਜਿਵੇਂ ਕਿ ਪੇਰੂ, ਸਪੇਨ, ਹੌਂਡੂਰਾਸ, ਇਕੁਆਡੋਰ, ਐਲ ਸੈਲਵਾਡੋਰ ਤੇ ਗੁਆਟੇਮਾਲਾ ਵਰਗੇ ਦੇਸ਼ਾਂ ਵਿੱਚ ਫਸੇ ਕੈਨੇਡੀਅਨਾਂ ਦੀ ਮਦਦ ਦੀ ਵੀ ਸਰਕਾਰ ਵੱਲੋਂ ਕੋਸਿ਼ਸ਼ ਕੀਤੀ ਜਾ ਰਹੀ ਹੈ।