ਟੋਰਾਂਟੋ, 2 ਮਾਰਚ (ਪੋਸਟ ਬਿਊਰੋ) : ਕੈਨੇਡੀਅਨ ਆਪਣੀ ਸਰਕਾਰ ਤੋਂ ਆਸ ਕਰਦੇ ਹਨ ਕਿ ਉਹ ਸਾਡੇ ਵਾਤਾਵਰਣ ਨੂੰ ਬਚਾਉਣ ਲਈ ਉਤਸ਼ਾਹੀ ਕਾਰਵਾਈ ਕਰੇ ਤੇ ਇਸ ਦੇ ਨਾਲ ਹੀ ਸਾਡੇ ਅਰਥਚਾਰੇ ਦੇ ਵਿਕਾਸ ਵੱਲ ਵੀ ਧਿਆਨ ਦੇਵੇ। ਇਸ ਤੋਂ ਇਲਾਵਾ ਰੋਜ਼ਗਾਰ ਦੇ ਨਵੇਂ ਮੌਕੇ ਪੈਦਾ ਕਰਨ ਦੇ ਨਾਲ ਨਾਲ ਵਰਕਰਜ਼ ਤੇ ਕਾਰੋਬਾਰੀਆਂ ਲਈ ਨਵੇਂ ਮੌਕੇ ਮੁਹੱਈਆ ਕਰਾਵੇ।
ਅਜਿਹਾ ਕਰਨ ਲਈ ਸਾਨੂੰ ਕੈਨੇਡਾ ਦੀ ਸਵੱਛ ਊਰਜਾ ਤਬਦੀਲੀ ਵਿੱਚ ਵਾਧਾ ਕਰਨ ਵਾਸਤੇ ਅਪਣਾਏ ਜਾਣ ਵਾਲੇ ਮਾਪਦੰਡਾਂ ਦਾ ਸਮਰਥਨ ਕਰਨਾ ਹੋਵੇਗਾ ਤੇ ਇਸ ਵਿੱਚ ਮਦਦ ਕਰਨੀ ਹੋਵੇਗੀ ਕਿ ਸਾਡੇ ਕਾਰੋਬਾਰ ਭਵਿੱਖ ਵਿੱਚ ਟਿਕਾਊ ਤਕਨਾਲੋਜੀ ਨੂੰ ਅਪਣਾ ਸਕਣ। ਪ੍ਰੌਸਪੈਕਟਰਜ਼ ਐਂਡ ਡਿਵੈਲਪਰਜ਼ ਐਸੋਸਿਏਸ਼ਨ ਆਫ ਕੈਨੇਡਾ ਵੱਲੋਂ ਆਯੋਜਿਤ ਗਲੋਬਲ ਮਿਨਰਲ ਐਕਸਪਲੋਰੇਸ਼ਨ ਐਂਡ ਮਾਈਨਿੰਗ ਕਨਵੈਨਸ਼ਨ ਵਿੱਚ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਐਲਾਨ ਕੀਤਾ ਕਿ ਸਰਕਾਰ ਇੱਕ ਨਵਾਂ ਇਨਸੈਂਟਿਵ ਪੇਸ਼ ਕਰਨ ਜਾ ਰਹੀ ਹੈ ਜੋ ਕਿ ਕੈਨੇਡੀਅਨ ਕਾਰੋਬਾਰੀਆਂ ਨੂੰ ਜ਼ੀਰੋ ਐਮਿਸ਼ਨ ਵਾਲੇ ਵਾਹਨ ਅਤੇ ਆਟੋਮੋਟਿਵ ਇਕੁਇਪਮੈਂਟ ਕਿਫਾਇਤੀ ਢੰਗ ਨਾਲ ਤਿਆਰ ਕਰਨ ਵਿੱਚ ਮਦਦ ਕਰੇਗਾ।
ਟਰੂਡੋ ਨੇ ਆਖਿਆ ਕਿ ਕੈਨੇਡਾ ਆਪਣੇ ਕਲਾਈਮੇਟ ਸਬੰਧੀ ਟੀਚੇ ਪੂਰੇ ਕਰ ਸਕੇ ਇਸ ਵਿੱਚ ਮਦਦ ਕਰਨ ਲਈ ਤੇ ਮੁਕਾਬਲੇਬਾਜ਼ੀ ਦੇ ਇਸ ਦੌਰ ਵਿੱਚ ਆਪਣੀਆਂ ਇੰਡਸਟਰੀਜ਼ ਨੂੰ ਕਾਇਮ ਰੱਖਣ ਲਈ ਕੈਨੇਡਾ ਸਰਕਾਰ ਮੌਜੂਦਾ ਜ਼ੀਰੋ ਐਮਿਸ਼ਨ ਵ੍ਹੀਕਲ ਇਨਸੈਂਟਿਵ ਨੂੰ ਆਮ ਵਾਹਨਾਂ ਤੱਕ ਲਿਜਾਣਾ ਚਾਹੁੰਦੀ ਹੈ। ਇਹ ਨਵਾਂ ਇਨਸੈਂਟਿਵ, ਮਾਈਨਿੰਗ, ਟਰਾਂਸਪੋਰਟੇਸ਼ਨ ਤੇ ਖੇਤੀਬਾੜੀ ਸਮੇਤ ਹੋਰਨਾਂ ਕਾਰੋਬਾਰਾਂ ਨੂੰ ਨਵੀਆਂ ਤੇ ਸਵੱਛ ਤਕਨਾਲੋਜੀਜ਼ ਨੂੰ ਅਪਨਾਉਣ ਦਾ ਮੌਕਾ ਦੇਵੇਗਾ।