ਮਾਂਟਰੀਅਲ, 18 ਫਰਵਰੀ (ਪੋਸਟ ਬਿਊਰੋ) : ਬ੍ਰਿਟਿਸ਼ ਕੋਲੰਬੀਆ ਵਿੱਚ ਐਲਐਨਜੀ ਪਾਈਪਲਾਈਨ ਦੇ ਵਿਰੋਧ ਵਿੱਚ ਮੁਜ਼ਾਹਰਾ ਕਰ ਰਹੇ ਲੋਕਾਂ ਕਾਰਨ ਪਿਛਲੇ ਹਫਤੇ ਰੱਦ ਹੋਈਆਂ 400 ਤੋਂ ਵੀ ਵੱਧ ਰੇਲ ਗੱਡੀਆਂ ਤੋਂ ਬਾਅਦ ਸੀਐਨ ਰੇਲ ਵੱਲੋਂ ਪੂਰਬੀ ਕੈਨੇਡਾ ਦੇ ਆਪਣੇ ਆਪਰੇਸ਼ਨਜ਼ ਨਾਲ ਜੁੜੇ 450 ਕਾਮਿਆਂ ਦੀ ਛੱੁਟੀ ਕੀਤੀ ਜਾ ਰਹੀ ਹੈ।
ਇਨ੍ਹਾਂ ਛਾਂਗੀਆਂ ਨਾਲ ਈਸਟਰਨ ਪੈਸੇਜ ਵਿੱਚ ਆਟੋਪੋਰਟ, ਮੌਂਕਟੌਨ, ਚਾਰਨੀ ਤੇ ਮਾਂਟਰੀਅਲ ਵਿੱਚ ਕੰਮ ਕਰਦੇ ਆਪਰੇਸ਼ਨਲ ਸਟਾਫ ੳੱੁਤੇ ਅਸਰ ਪਵੇਗਾ। ਮਾਂਟਰੀਅਲ ਸਥਿਤ ਰੇਲਵੇ ਦਾ ਕਹਿਣਾ ਹੈ ਕਿ ਇਹ ਬਹੁਤ ਹੀ ਅਫਸੋਸਜਨਕ ਸਥਿਤੀ ਹੈ ਕਿਉਂਕਿ ਮੁਜ਼ਾਹਰਿਆਂ ਕਾਰਨ ਅਰਥਚਾਰੇ ਤੇ ਸਾਡੇ ਮੁਲਾਜ਼ਮਾਂ ਉੱਤੇ ਪੈਣ ਵਾਲਾ ਪ੍ਰਭਾਵ ਸੀਐਨ ਦੀਆਂ ਗਤੀਵਿਧੀਆਂ ਨਾਲ ਸਬੰਧਤ ਨਹੀਂ ਹੈ ਤੇ ਨਾ ਹੀ ਸਾਡੇ ਵੱਸ ਵਿੱਚ ਹੈ।
ਸੀਐਨ ਨੇ ਆਖਿਆ ਕਿ ਇਹ ਫੈਸਲਾ ਅਗਾਂਹਵਧੂ ਤੇ ਵਿਵਸਥਿਤ ਢੰਗ ਨਾਲ ਲਿਆ ਗਿਆ ਹੈ। ਅਜਿਹਾ ਇਹ ਯਕੀਨੀ ਬਣਾਉਣ ਲਈ ਕੀਤਾ ਗਿਆ ਹੈ ਕਿ ਇਸ ਨੂੰ ਉਦੋਂ ਸ਼ੁਰੂ ਕੀਤਾ ਜਾ ਸਕੇ ਜਦੋਂ ਇਸ ਤਰ੍ਹਾਂ ਰਾਹ ਰੋਕਣ ਦੀਆਂ ਘਟਨਾਵਾਂ ਪੂਰੀ ਤਰ੍ਹਾਂ ਬੰਦ ਹੋ ਜਾਣਗੀਆਂ। ਜਿ਼ਕਰਯੋਗ ਹੈ ਕਿ ਕੋਸਟਲ ਗੈਸਲਿੰਕ ਵੱਲੋਂ ਪਾਈਪਲਾਈਨ ਰੂਟ ਦੇ ਨਾਲ 20 ਚੋਣਵੀਆਂ ਬੈਂਡ ਕਾਉਂਸਲਜ਼ ਨਾਲ ਸਮਝੌਤਾ ਕੀਤਾ ਸੀ, ਜਿਸ ਵਿੱਚ ਵੈਟਸੂਵੈਟਨ ਫਰਸਟ ਨੇਸ਼ਨ ਦੀ ਕਾਉਂਸਲ ਵੀ ਸ਼ਾਮਲ ਸੀ।
ਪਰ ਵੈਟਸੂਵੈਟਨ ਦੇ ਹੈਰੇਡਿਟਰੀ ਚੀਫਜ਼ ਇਸ ਪ੍ਰੋਜੈਕਟ ਦੇ ਖਿਲਾਫ ਹਨ ਤੇ ਉਨ੍ਹਾਂ ਦਾ ਕਹਿਣਾ ਹੈ ਕਿ ਕਾਉਂਸਲ ਕੋਲ ਸਬੰਧਤ ਜ਼ਮੀਨ ਦਾ ਅਧਿਕਾਰ ਨਹੀਂ ਹੈ।