ਟੋਰਾਂਟੋ, 3 ਫਰਵਰੀ (ਪੋਸਟ ਬਿਊਰੋ) : ਮੈਡਰਿਡ ਤੋਂ ਟੋਰਾਂਟੋ ਜਾਣ ਵਾਲੇ ਏਅਰ ਕੈਨੇਡਾ ਦੇ ਜਹਾਜ਼ ਨੂੰ ਉਡਾਨ ਭਰਨ ਤੋਂ ਕੁੱਝ ਦੇਰ ਬਾਅਦ ਹੀ ਐਮਰਜੰਸੀ ਐਲਾਨੇ ਜਾਣ ਮਗਰੋਂ ਸੁਰੱਖਿਅਤ ਢੰਗ ਨਾਲ ਉਤਾਰ ਲਿਆ ਗਿਆ।
ਏਅਰ ਕੈਨੇਡਾ ਦੀ ਉਡਾਨ 837 ਦਿਨ ਵੇਲੇ ਅਡੋਲਫੋ ਸੁਆਰੇਜ਼-ਬਾਰਾਜਾਸ ਇੰਟਰਨੈਸ਼ਨਲ ਏਅਰਪੋਰਟ ਤੋਂ ਰਵਾਨਾ ਹੋਈ। ਇਸ ਜਹਾਜ਼ ਦੇ ਦੁਪਹਿਰੇ 3:40 ੳੱੁਤੇ ਟੋਰਾਂਟੋ ਉਤਰਨ ਦੀ ਉਮੀਦ ਸੀ। ਇੱਕ ਬਿਆਨ ਵਿੱਚ ਏਅਰ ਕੈਨੇਡਾ ਨੇ ਆਖਿਆ ਕਿ ਉਡਾਨ ਭਰਨ ਤੋਂ ਕੁੱਝ ਦੇਰ ਬਾਅਦ ਹੀ ਜਹਾਜ਼ ਦੇ ਇੰਜਣ ਵਿੱਚ ਕੋਈ ਗੜਬੜ ਹੋ ਗਈ। ਜਹਾਜ਼ ਵਿੱਚ 128 ਯਾਤਰੀ ਤੇ ਅਮਲੇ ਦੇ ਅੱਠ ਮੈਂਬਰ ਸਵਾਰ ਸਨ। ਇਸ ਘਟਨਾ ਵਿੱਚ ਕੋਈ ਵੀ ਜ਼ਖ਼ਮੀ ਨਹੀਂ ਹੋਇਆ ਹੈ।
ਏਅਰ ਕੈਨੇਡਾ ਨੇ ਦੱਸਿਆ ਕਿ ਪਾਇਲਟ ਨੇ ਮੈਡਰਿਡ ਪਰਤਣ ਨੂੰ ਤਰਜੀਹ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਬੋਇੰਗ 767-300 ਜਹਾਜ਼ ਇੱਕ ਇੰਜਣ ਉੱਤੇ ਚਲਾਏ ਜਾਣ ਲਈ ਵੀ ਡਿਜ਼ਾਈਨ ਕੀਤਾ ਗਿਆ ਹੈ ਤੇ ਸਾਡੇ ਪਾਇਲਟ ਇਸ ਲਈ ਪੂਰੀ ਤਰ੍ਹਾਂ ਸਿੱਖਿਅਤ ਹਨ। ਫਲਾਈਟ ਨੂੰ ਟਰੈਕ ਕਰਨ ਵਾਲੇ ਵੈੱਬਸਾਈਟ ਫਲਾਈਟਰਡਾਰ24 ਵਿੱਚ ਨਜ਼ਰ ਆਇਆ ਕਿ ਦੁਪਹਿਰੇ 3:00 ਵਜੇ ਉਡਾਨ ਭਰਨ ਤੋਂ ਬਾਅਦ ਜਹਾਜ਼ ਮੈਡਰਿਡ ਦੇ ਉੱਪਰ ਚਾਰ ਘੰਟੇ ਤੱਕ ਚੱਕਰ ਲਾਉਂਦਾ ਰਿਹਾ।
ਸਪੇਨ ਦੀ ਏਅਰ ਨੇਵੀਗੇਸ਼ਨ ਅਥਾਰਟੀ ਦੇ ਬੁਲਾਰੇ ਨੇ ਆਖਿਆ ਕਿ ਟੇਕ ਆਫ ਕਰਨ ਤੋਂ ਬਾਅਦ ਜਹਾਜ਼ ਦਾ ਲੈਂਡਿੰਗ ਗੇਅਰ ਚੰਗੀ ਤਰ੍ਹਾਂ ਫੋਲਡ ਨਹੀਂ ਸੀ ਹੋਇਆ ਤੇ ਇਸ ਦੇ ਇੱਕ ਹਿੱਸੇ ਕਾਰਨ ਹੀ ਇੱਕ ਇੰਜਣ ਦਾ ਹਿੱਸਾ ਨੁਕਸਾਨਿਆ ਗਿਆ। ਸਪੇਨ ਦੇ ਰੱਖਿਆ ਮੰਤਰਾਲੇ ਨੇ ਆਖਿਆ ਕਿ ਨੇੜਲੇ ਏਅਰਪੋਰਟ ਤੋਂ ਐਫ 18 ਫਾਈਟਰ ਜੈੱਟ ਨੂੰ ਕਿਸੇ ਵੀ ਤਰ੍ਹਾਂ ਦੀ ਗੜਬੜੀ ਦਾ ਪਤਾ ਲਾਉਣ ਤੇ ਸਹਿਯੋਗ ਲਈ ਤੁਰੰਤ ਹੀ ਡਿਸਪੈਚ ਕਰ ਦਿੱਤਾ ਗਿਆ ਸੀ।