*ਮਿਲੇ ਪਾਬੰਦੀਸ਼ੁਦਾ ਹਥਿਆਰ ਤੇ ਗੋਲੀ ਸਿੱਕਾ
ਬਰੈਂਪਟਨ, 3 ਫਰਵਰੀ (ਪੋਸਟ ਬਿਊਰੋ) : ਸ਼ਨਿੱਚਰਵਾਰ ਨੂੰ ਸੈਂਟਰਲ ਬਰੈਂਪਟਨ ਪਾਰਕ ਵਿੱਚ ਚੱਲੀ ਗੋਲੀ ਤੋਂ ਕੁਝ ਸਮੇਂ ਬਾਅਦ ਹੀ ਦੋ ਵਿਅਕਤੀਆਂ ਨੂੰ ਪੁਲਿਸ ਨੇ ਕਈ ਹਥਿਆਰ ਰੱਖਣ ਦੇ ਦੋਸ਼ ਵਿੱਚ ਗ੍ਰਿਫਤਾਰ ਕਰ ਲਿਆ। ਇਨ੍ਹਾਂ ਵਿਅਕਤੀਆਂ ਕੋਲੋਂ ਹੈਂਡਗੰਨਜ਼, ਅਸਾਲਟ ਰਾਈਫਲਾਂ ਤੇ ਅਸਲਾ ਆਦਿ ਹਾਸਲ ਹੋਇਆ ਹੈ।
ਸ਼ਨਿੱਚਰਵਾਰ ਨੂੰ ਪੀਲ ਰੀਜਨਲ ਪੁਲਿਸ ਨੇ ਆਖਿਆ ਕਿ ਤੜ੍ਹਕੇ 1:37 ਉਤੇ ਮੇਨ ਸਟਰੀਟ ਦੇ ਪੱਛਮ ਵੱਲ ਸਥਿਤ ਇੰਗਲਿਸ਼ ਸਟਰੀਟ ਪਾਰਕ ਵਿੱਚ ਇੱਕ ਪੁਰਸ਼ ਤੇ ਮਹਿਲਾ ਦਾਖਲ ਹੋਏ। ਕੁਝ ਸਮੇਂ ਬਾਅਦ ਹੀ ਉਨ੍ਹਾਂ ਨੂੰ ਪਾਰਕ ਵਿੱਚ ਗੋਲੀ ਚੱਲਣ ਦੀਆਂ ਅਵਾਜ਼ਾਂ ਸੁਣਾਈ ਦਿੱਤੀਆਂ। ਇਸ ਤੋਂ ਬਾਅਦ ਉਹ ਪੁਰਸ਼ ਤੇ ਮਹਿਲਾ ਕਾਰ ਵਿੱਚ ਇਲਾਕੇ ਤੋਂ ਫਰਾਰ ਹੋ ਗਏ।
ਅਧਿਕਾਰੀਆਂ ਨੇ ਕਾਰ ਦਾ ਪਿੱਛਾ ਕੀਤਾ ਤੇ ਬਾਅਦ ਵਿੱਚ ਮਸ਼ਕੂਕ ਪੁਰਸ਼ ਦੇ ਘਰ ਦੀ ਤਲਾਸ਼ੀ ਲਈ। ਉੱਥੋਂ ਉਨ੍ਹਾਂ ਨੂੰ ਕਥਿਤ ਤੌਰ ਉੱਤੇ ਏਆਰ 15 ਅਸਾਲਟ ਰਾਈਫਲ, ਜਿਸ ਦਾ ਬੈਰਲ ਛੋਟਾ ਸੀ, ਦੋ ਹੈਂਡਗੰਨਜ਼, 11 ਮੈਗਜ਼ੀਨਜ਼, 250 ਤੋਂ ਵੀ ਵੱਧ ਗੋਲੀ ਸਿੱਕਾ ਤੇ 3000 ਡਾਲਰ ਦੀ ਕੋਕੀਨ ਬਰਾਮਦ ਹੋਈ। ਇਨ੍ਹਾਂ ਵਿੱਚੋਂ ਦੋ ਹਥਿਆਰ ਛੋਟੇ ਬੈਰਲ ਆਕਾਰ ਕਾਰਨ ਕੈਨੇਡਾ ਵਿੱਚ ਕਾਨੂੰਨੀ ਤੌਰ ਉੱਤੇ ਨਹੀਂ ਖਰੀਦੇ ਜਾ ਸਕਦੇ।
ਜਾਂਚਕਾਰਾਂ ਨੇ ਮਸ਼ਕੂਕਾਂ ਦੀ ਪਛਾਣ ਬਰੈਂਪਟਨ ਦੇ 30 ਸਾਲਾ ਲਿਓਨਲ ਵਿੱਲੀ ਤੇ ਬਰੈਂਪਟਨ ਦੇ ਹੀ 24 ਸਾਲਾ ਸ਼ਮਸ ਬੇਰਾਂਤੂਓ ਵਜੋਂ ਕੀਤੀ ਗਈ ਹੈ। ਦੋਵਾਂ ਨੂੰ 23 ਮਾਮਲਿਆਂ ਵਿੱਚ ਚਾਰਜ ਕੀਤਾ ਗਿਆ ਹੈ ਜਿਨ੍ਹਾਂ ਵਿੱਚੋਂ ਅੰਨ੍ਹੇਵਾਹ ਗੋਲੀਆਂ ਚਲਾਉਣ, ਭਰੀ ਹੋਈ, ਪਾਬੰਦੀਸ਼ੁਦਾ ਜਾਂ ਜਿਸ ਹਥਿਆਰ ਉੱਤੇ ਰੋਕ ਲਾਈ ਗਈ ਹੋਵੇ, ਉਹ ਕੋਲ ਰੱਖਣਾ ਤੇ ਕੋਕੀਨ ਰੱਖਣ ਦੇ ਪੰਜ ਮਾਮਲੇ ਸ਼ਾਮਲ ਹਨ।