ਮਿਸੀਸਾਗਾ, 20 ਜਨਵਰੀ (ਪੋਸਟ ਬਿਊਰੋ)- ਓਂਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਵਲੋਂ ਕੱਲ੍ਹ ਮਿਸੀਸਾਗਾ ਵਿਖੇ ਐਥਨਿਕ ਮੀਡੀਆ ਨੂੰ ਦਿੱਤੀ ਗਈ ਰਿਸੈਪਸ਼ਨ ’ਚ ਇਕ ਵੱਡਾ ਐਲਾਨ ਕੀਤਾ ਗਿਆ।ਉਨ੍ਹਾਂ ਕਿਹਾ ਕਿ ਵੱਖ-ਵੱਖ ਭਾਈਚਾਰੇ ਨਾਲ ਸਬੰਧਤ ਐਥਨਿਕ ਮੀਡੀਆ ਇਸ ਸਮੇਂ ਮੁੱਖ ਧਾਰਾ ਦੇ ਲੋਕਾਂ ਅਤੇ ਨਵੇਂ ਆਏ ਇਮੀਗ੍ਰੈਂਟਸ ਵਿਚਕਾਰ ਆਦਾਨ-ਪ੍ਰਦਾਨ ਦਾ ਇਕ ਵੱਡਾ ਜ਼ਰੀਆ ਹੈ।ਪਰ ਦੁੱਖ ਇਸ ਗੱਲ ਦਾ ਹੁੰਦਾ ਹੈ ਕਿ ਜਦੋਂ ਐਥਨਿਕ ਮੀਡੀਆ ਨੂੰ ਸਰਕਾਰੀ ਇਸ਼ਤਿਹਾਰ ਮਿਲਣ ਤੋਂ ਵਾਂਝਾ ਕਰ ਦਿੱਤਾ ਜਾਂਦਾ ਹੈ।ਉਨ੍ਹਾਂ ਕਿਹਾ ਕਿ ਸਰਕਾਰਾਂ ਸੀ.ਬੀ.ਸੀ., ਟੋਰਾਂਟੋ ਸਟਾਰ ਤੇ ਹੋਰ ਮੁੱਖ ਧਾਰਾ ਦੇ ਮੀਡੀਆ ਨੂੰ ਆਪਣੇ ਇਸ਼ਤਿਆਰ ਦਿੰਦੀਆਂ ਹਨ, ਪਰ ਐਥਨਿਕ ਮੀਡੀਆ ਨੂੰ ਅੱਖੋਂ ਪਰੋਖੇ ਕਰ ਦਿੱਤਾ ਜਾਂਦਾ ਹੈ।ਉਨ੍ਹਾ ਕਿਹਾ ਕਿ ਐਥਨਿਕ ਮੀਡੀਆ ਇਸ ਸਮੇਂ ਸਾਡਾ ਨਵਾਂ ਮੁੱਖ ਧਾਰਾ ਦਾ ਮੀਡੀਆ ਹੈ ਤੇ ਸਾਡੇ ਸਮਾਜ ’ਚ ਇਕ ਅਹਿਮ ਰੋਲ ਨਿਭਾ ਰਿਹਾ ਹੈ।ਉਨ੍ਹਾਂ ਕਿਹਾ ਕਿ ਸਾਡੀ ਸਰਕਾਰ ਨੇ ਇਹ ਫੈਸਲਾ ਲਿਆ ਹੈ ਕਿ ਜਲਦੀ ਹੀ ਐਥਨਿਕ ਮੀਡੀਆ ਨੂੰ ਮੁੱਖ ਧਾਰਾ ਵਾਂਗ ਸਰਕਾਰੀ ਇਸ਼ਤਿਹਾਰ ਦਿੱਤੇ ਜਾਇਆ ਕਰਨਗੇ।ਉਨ੍ਹਾਂ ਦੇ ਇਸ ਐਲਾਨ ਤੋਂ ਖੁਸ਼ ਹੰੁਦਿਆਂ ਕੈਨੇਡੀਅਨ ਪੰਜਾਬੀ ਬ੍ਰਾਡਕਾਸਟਰਜ਼ ਐਸੋਸੀਏਸ਼ਨ ਤੇ ਕੈਨੇਡੀਅਨ ਪੰਜਾਬੀ ਪੋਸਟ ਦੇ ਮੁੱਖ ਸੰਪਾਦਕ ਜਗਦੀਸ਼ ਗਰੇਵਾਲ ਨੇ ਕਿਹਾ ਕਿ ਇਹ ਸਾਡੀ ਲੰਬੇ ਸਮੇਂ ਤੋਂ ਮੰਗ ਰਹੀ ਹੈ।ਬੀਤੇ ਸਮਿਆਂ ਦੀ ਪ੍ਰੋਵਿੰਸ਼ੀਅਲ ਲਿਬਰਲ ਸਰਕਾਰ ਤੇ ਮੌਜੂਦਾ ਫੈਡਰਲ ਸਰਕਾਰ ਐਥਨਿਕ ਮੀਡੀਆ ਨੂੰ ਖਤਮ ਕਰਨ ’ਤੇ ਤੁਲੀ ਹੋਈ ਹੈ।ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਚੋਣਾਂ ਦੌਰਾਨ ਲਿਬਰਲ ਸਰਕਾਰ ਦੇ ਉਮੀਦਵਾਰ ਐਥਨਿਕ ਮੀਡੀਆ ਤੋਂ ਪੂਰੀ ਮੱਦਦ ਮੰਗਦੇ ਹਨ, ਪਰ ਸਰਕਾਰ ਬਣਾਉਣ ਤੋਂ ਬਾਅਦ ਅੱਖਾਂ ਫੇਰ ਜਾਂਦੇ ਹਨ।ਹਮਦਰਦ ਅਖ਼ਬਾਰ ਦੇ ਮੁੱਖ ਸੰਪਾਦਕ ਸਰਦਾਰ ਅਮਰ ਸਿੰਘ ਭੁੱਲਰ ਨੇ ਪ੍ਰੋਵਿੰਸ਼ੀਅਲ ਪੀ.ਸੀ. ਸਰਕਾਰ ਦੇ ਐਲਾਨ ਤੋਂ ਬਾਅਦ ਆਖਿਆ ਕਿ ਫੈਡਰਲ ਲਿਬਰਲ ਸਰਕਾਰ ਨੂੰ ਵੀ ਸਾਡੇ ਨਾਲ ਮਤਰੇਈ ਮਾਂ ਵਾਲਾ ਸਲੂਕ ਕਰਨਾ ਬੰਦ ਕਰਨਾ ਚਾਹੀਦਾ ਹੈ ਤੇ ਸਾਨੂੰ ਸਾਡਾ ਬਣਦਾ ਹੱਕ ਦੇਣਾ ਚਾਹੀਦਾ ਹੈ।ਉਨ੍ਹਾਂ ਪ੍ਰੀਮੀਅਰ ਡੱਗ ਫੋਰਡ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਐਥਨਿਕ ਮੀਡੀਆ ਇਸ ਸਮੇਂ ਵੱਡੇ ਸੰਕਟ ਵਿਚੋਂ ਗੁਜਰ ਰਿਹਾ ਹੈ।ਇਸ ਦੌਰ ਦੌਰਾਨ ਬਹੁਤ ਸਾਰੇ ਐਥਨਿਕ ਮੀਡੀਆ ਦੇ ਅਖ਼ਬਾਰ ਬੰਦ ਹੋ ਚੁੱਕੇ ਹਨ।ਇਹ ਅਖ਼ਬਾਰ ਸਰਕਾਰਾਂ ਤੇ ਲੋਕਾਂ ਨੂੰ ਜੋੜਨ ’ਚ ਅਹਿਮ ਰੋਲ ਅਦਾ ਕਰਦੇ ਸਨ।ਹੁਣ ਜੋ ਅਖ਼ਬਾਰ ਚੱਲ ਰਹੇ ਹਨ, ਇਹ ਸੰਪਾਦਕਾਂ ਤੇ ਮਾਲਕਾਂ ਦੀ ਦਿ੍ਰੜਤਾ ਅਤੇ ਆਪਣੇ ਭਾਈਚਾਰਿਆਂ ਨੂੰ ਸਹੀ ਜਾਣਕਾਰੀ ਪਹੁੰਚਾਉਣ ਦੀ ਸਵੈ ਇੱਛਾ ਕਾਰਨ ਹੀ ਚੱਲ ਰਹੇ ਹਨ।ਇਸੇ ਤਰ੍ਹਾਂ ਹੀ ਪੰਜਾਬ ਸਟਾਰ ਦੇ ਮੁੱਖ ਸੰਪਾਦਕ ਸਿਮਰਤ ਗਰੇਵਾਲ ਨੇ ਪ੍ਰੀਮੀਅਰ ਡੱਗ ਫੋਰਡ ਅਤੇ ਮਿਨਿਸਟਰ ਲੀਸਾ ਮੈਕਲੋਡ ਦਾ ਉਚੇਚੇ ਤੌਰ ’ਤੇ ਧੰਨਵਾਦ ਕੀਤਾ, ਜਿਨ੍ਹਾਂ ਦੀਆਂ ਕੋਸ਼ਿਸ਼ਾਂ ਸਦਕਾ ਇਹ ਸੰਭਵ ਹੋ ਰਿਹਾ ਹੈ। ਕੈਨੇਡੀਅਨ ਪੰਜਾਬ ਬ੍ਰਾਡਕਾਸਟਰਜ਼ ਐਸੋਸੀਏਸ਼ਨ ਦੇ ਮੈਂਬਰ ਹਰਜਿੰਦਰ ਗਿੱਲ, ਰਣਧੀਰ ਰਾਣਾ, ਕੁਲਵਿੰਦਰ ਛੀਨਾ, ਮਨਨ ਗੁਪਤਾ ਨੇ ਵੀ ਇਸ ਐਲਾਨ ’ਤੇ ਖੁਸ਼ੀ ਦਾ ਇਜ਼ਹਾਰ ਕੀਤਾ।