ਵਿਨੀਪੈਗ, 20 ਜਨਵਰੀ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੇ ਉਨ੍ਹਾਂ ਦੇ ਕੈਬਨਿਟ ਮੰਤਰੀ ਲਿਬਰਲ ਸਰਕਾਰ ਦੇ ਘਰੇਲੂ ਏਜੰਡੇ ਉੱਤੇ ਧਿਆਨ ਕੇਂਦਰਿਤ ਕਰਨ ਦੀ ਕੋਸਿ਼ਸ਼ ਕਰ ਰਹੇ ਹਨ। ਘੱਟ ਗਿਣਤੀ ਪਾਰਲੀਆਮੈਂਟ ਵਿੱਚ ਇਸ ਏਜੰਡੇ ਨੂੰ ਸਿਰੇ ਕਿਵੇਂ ਚੜ੍ਹਾਇਆ ਜਾਵੇ ਇਸ ਬਾਰੇ ਵੀ ਲਿਬਰਲ ਸਰਕਾਰ ਜੁਗਤਾਂ ਲੜਾ ਰਹੀ ਹੈ। ਕੁਝ ਐਮਰਜੰਸੀ ਮੱੁਦੇ ਵੀ ਹਨ ਜਿਨ੍ਹਾਂ ਵੱਲ ਪਹਿਲ ਦੇ ਆਧਾਰ ਉੱਤੇ ਸਰਕਾਰ ਵੱਲੋਂ ਧਿਆਨ ਦਿੱਤਾ ਜਾਣਾ ਜ਼ਰੂਰੀ ਹੈ।
ਕੈਬਨਿਟ ਰਟਰੀਟ ਸਬੰਧੀ ਤਿੰਨ ਰੋਜ਼ਾ ਪ੍ਰੋਗਰਾਮ ਦੇ ਸ਼ੁਰੂਆਤੀ ਦਿਨ ਐਤਵਾਰ ਨੂੰ ਨਿਊਫਾਊਂਡਲੈਂਡ ਐਂਡ ਲੈਬਰਾਡੋਰ ਦੇ ਪੂਰਬੀ ਖਿੱਤੇ ਵਿੱਚ ਆਏ ਬਰਫੀਲੇ ਤੂਫਾਨ ਅਤੇ ਇਰਾਨ ਵੱਲੋਂ ਯੂਕਰੇਨੀਆਈ ਜਹਾਜ਼ ਨੂੰ ਮਿਜ਼ਾਈਲ ਰਾਹੀਂ ਮਾਰ ਸੱੁਟਣ ਵਰਗੇ ਮੱੁਦੇ ਉੱਤੇ ਮੰਤਰੀਆਂ ਨੂੰ ਸਵਾਲ ਪੁੱਛੇ ਗਏ। ਭਾਵੇਂ ਰਟਰੀਟ ਦੇ ਬਾਹਰ ਇਸ ਤਰ੍ਹਾਂ ਦੇ ਸਵਾਲ ਹਾਵੀ ਰਹੇ ਪਰ ਅੰਦਰਖਾਤੇ ਮੰਤਰੀ 27 ਜਨਵਰੀ ਨੂੰ ਪਾਰਲੀਆਮੈਂਟ ਦੀ ਕਾਰਵਾਈ ਮੁੜ ਸ਼ੁਰੂ ਹੋਣ ਤੋਂ ਪਹਿਲਾਂ ਵਾਲੀਆਂ ਤਿਆਰੀਆਂ ਕਰਦੇ ਨਜ਼ਰੀਂ ਆਏ।
ਵਿੱਤ ਮੰਤਰੀ ਬਿੱਲ ਮੌਰਨਿਊ ਤੇ ਨਵ ਨਿਯੁਕਤ ਮਿਡਲ ਕਲਾਸ ਪ੍ਰੌਸਪੈਰਿਟੀ ਮੰਤਰੀ ਮੋਨਾ ਫੋਰਟੀਅਰ ਨੇ ਆਉਣ ਵਾਲੇ ਬਜਟ ਦੇ ਸਬੰਧ ਵਿੱਚ ਦੇਸ਼ ਭਰ ਵਿੱਚ ਲੋਕਾਂ ਨਾਲ ਕੀਤੇ ਜਾ ਰਹੇ ਸਲਾਹ ਮਸ਼ਵਰੇ ਬਾਰੇ ਆਪਣੇ ਸਾਥੀਆਂ ਨੂੰ ਜਾਣੂ ਕਰਵਾਇਆ। ਪਰ ਵਿਦੇਸ਼ ਮੰਤਰੀ ਫਰੈਂਕੌਇਸ ਫਿਲਿਪ ਸੈ਼ਂਪੇਨ ਨੇ ਕੈਬਨਿਟ ਰਟਰੀਟ ਸ਼ੁਰੂ ਹੋਣ ਤੋਂ ਪਹਿਲਾਂ ਆਪਣੇ ਇਰਾਨੀ ਹਮਰੁਤਬਾ ਅਧਿਕਾਰੀ ਨੂੰ ਇਹ ਸੁਨੇਹਾ ਭੇਜ ਕੇ ਦਿਨ ਦੀ ਸ਼ੁਰੂਆਤ ਕੀਤੀ ਕਿ ਕੈਨੇਡਾ ਉਮੀਦ ਕਰਦਾ ਹੈ ਕਿ ਯੂਕਰੇਨੀਆਈ ਏਅਰਲਾਈਨਜ਼ ਦੀ ਫਲਾਈਟ ਪੀਐਸ752 ਦੇ ਫਲਾਈਟ ਡਾਟਾ ਰਿਕਾਰਡਰ ਦਾ ਵਿਸ਼ਲੇਸ਼ਣ ਯੂਕਰੇਨ ਜਾਂ ਫਰਾਂਸ ਦੇ ਮਾਹਿਰਾਂ ਵਲੋਂ ਕੀਤਾ ਜਾਵੇਗਾ। ਸੈ਼ਂਪੇਨ ਵੱਲੋਂ ਇਹ ਦਬਾਅ ਇਸ ਲਈ ਪਾਇਆ ਜਾ ਰਿਹਾ ਹੈ ਕਿਉਂਕਿ ਇਹ ਪਤਾ ਲਗਿਆ ਹੈ ਕਿ ਪਹਿਲਾਂ ਡਾਟਾ ਰਿਕਾਰਡਰ ਸਬੰਧੀ ਜਾਂਚ ਦੇ ਕੀਤੇ ਵਾਅਦੇ ਤੋਂ ਇਰਾਨ ਹੁਣ ਮੱੁਕਰ ਰਿਹਾ ਹੈ।
ਇਸ ਮੱੁਦੇ ਦੇ ਸਬੰਧ ਵਿੱਚ ਟਰੂਡੋ ਚਾਰ ਪ੍ਰੈਸ ਕਾਨਫਰੰਸ ਕਰ ਚੱੁਕੇ ਹਨ। ਪਰ ਐਤਵਾਰ ਨੂੰ ਉਹ ਰਟਰੀਟ ਵਿੱਚ ਹਿੱਸਾ ਜ਼ਰੂਰ ਲੈਣ ਆਏ ਪਰ ਉਨ੍ਹਾਂ ਇਸ ਸਬੰਧ ਵਿੱਚ ਕੋਈ ਟਿੱਪਣੀ ਨਹੀਂ ਕੀਤੀ। ਸਾਰਾ ਦਿਨ ਵੱਖ ਵੱਖ ਡਿਪਲੋਮੈਟਸ ਨੇ ਮੰਤਰੀਆਂ ਨੂੰ ਕੌਮਾਂਤਰੀ ਵਿਸਿ਼ਆਂ ਤੋਂ ਜਾਣੂ ਕਰਵਾਇਆ। ਪਬਲਿਕ ਸੇਫਟੀ ਮੰਤਰੀ ਬਿੱਲ ਬਲੇਅਰ, ਰੱਖਿਆ ਮੰਤਰੀ ਹਰਜੀਤ ਸੱਜਣ ਤੇ ਕੁਦਰਤੀ ਵਸੀਲਿਆਂ ਬਾਰੇ ਮੰਤਰੀ ਸੀਮਸ ਓਰੀਗਨ ਨੇ ਨਿਊਫਾਊਂਡਲੈਂਡ ਐਂਡ ਲੈਬਰਾਡੌਰ ਵਿੱਚ ਤਬਾਹੀ ਮਚਾਉਣ ਵਾਲੇ ਤੂਫਾਨ ਨਾਲ ਹੋਏ ਨੁਕਸਾਨ ਨਾਲ ਸਿੱਝਣ ਲਈ ਤਰਕੀਬਾਂ ਘੜਦਿਆਂ ਨੇ ਬਹੁਤਾ ਸਮਾਂ ਗੁਜ਼ਾਰਿਆ।