ਲੰਡਨ, 19 ਜਨਵਰੀ (ਪੋਸਟ ਬਿਊਰੋ) : ਬਕਿੰਘਮ ਪੈਲੇਸ ਵੱਲੋਂ ਪ੍ਰਿੰਸ ਹੈਰੀ ਤੇ ਉਨ੍ਹਾਂ ਦੀ ਪਤਨੀ ਮੇਘਨ ਮਾਰਕਲ ਦੇ ਸ਼ਾਹੀ ਖਿਤਾਬ ਤਿਆਗਣ ਤੇ ਸ਼ਾਹੀ ਪਰਿਵਾਰ ਦੇ ਸਰਗਰਮ ਮੈਂਬਰਾਂ ਵਜੋਂ ਮਹਾਰਾਣੀ ਐਲਿਜ਼ਾਬੈੱਥ ਦੀ ਨੁਮਾਇੰਦਗੀ ਨਾ ਕਰ ਸਕਣ ਦੇ ਐਲਾਨ ਤੋਂ ਬਾਅਦ ਐਤਵਾਰ ਨੂੰ ਦਿੱਤੇ ਆਪਣੇ ਪਹਿਲੇ ਜਨਤਕ ਬਿਆਨ ਵਿੱਚ ਪ੍ਰਿੰਸ ਹੈਰੀ ਨੇ ਅਫਸੋਸ ਪ੍ਰਗਟਾਇਆ।
ਲੰਡਨ ਵਿੱਚ ਇੱਕ ਚੈਰਿਟੀ ਸਮਾਰੋਹ ਵਿੱਚ ਹੈਰੀ ਨੇ ਆਖਿਆ ਕਿ ਇਹ ਫੈਸਲਾ ਉਨ੍ਹਾਂ ਆਪਣੀ ਪਤਨੀ ਲਈ ਲਿਆ ਹੈ ਤੇ ਉਹ ਇਸ ਫੈਸਲੇ ਉੱਤੇ ਕਾਇਮ ਰਹਿਣਗੇ। ਉਨ੍ਹਾਂ ਅੱਗੇ ਆਖਿਆ ਕਿ ਕਈ ਮਹੀਨਿਆਂ ਦੀ ਗੱਲਬਾਤ ਤੇ ਕਈ ਸਾਲਾਂ ਦੀਆਂ ਚੁਣੌਤੀਆਂ ਤੋਂ ਬਾਅਦ ਹੀ ਉਹ ਅਜਿਹਾ ਫੈਸਲਾ ਲੈ ਸਕੇ ਹਨ। ਉਨ੍ਹਾਂ ਆਖਿਆ ਕਿ ਹਰ ਵਾਰੀ ਉਹ ਸਹੀ ਹੋਣ ਅਜਿਹਾ ਨਹੀਂ ਹੈ ਪਰ ਜਿੱਥੋਂ ਤੱਕ ਇਸ ਫੈਸਲੇ ਦਾ ਸਵਾਲ ਹੈ ਉਨ੍ਹਾਂ ਕੋਲ ਹੋਰ ਕੋਈ ਬਦਲ ਨਹੀਂ ਸੀ।
ਉਨ੍ਹਾਂ ਇਹ ਵੀ ਸਪਸ਼ਟ ਕੀਤਾ ਕਿ ਉਹ ਮਹਾਰਾਣੀ ਅਤੇ ਕਾਮਨਵੈਲਥ ਦੀ ਸੇਵਾ ਕਰਨਾ ਜਾਰੀ ਰੱਖਣਗੇ, ਇਸ ਤੋਂ ਇਲਾਵਾ ਫੌਜ ਨਾਲ ਵੀ ਉਨ੍ਹਾਂ ਦਾ ਜੁੜਾਵ ਰਹੇਗਾ ਪਰ ਇਹ ਸੱਭ ਉਹ ਜਨਤਕ ਫੰਡਿੰਗ ਤੋਂ ਬਿਨਾਂ ਕਰਨਗੇ। ਹੈਰੀ ਨੇ ਆਖਿਆ ਕਿ ਮੰਦਭਾਗੀ ਗਲ ਇਹ ਹੈ ਕਿ ਹੁਣ ਉਹ ਸੱਭ ਜਾਰੀ ਨਹੀਂ ਰਹਿ ਸਕੇਗਾ। ਜਿ਼ਕਰਯੋਗ ਹੈ ਕਿ ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਇਸ ਜੋੜੇ ਨੇ ਐਲਾਨ ਕੀਤਾ ਸੀ ਕਿ ਉਹ ਸ਼ਾਹੀ ਪਰਿਵਾਰ ਦੇ ਸੀਨੀਅਰ ਮੈਂਬਰਾਂ ਵਜੋਂ ਕੰਮ ਨਹੀਂ ਕਰ ਸਕਣਗੇ। ਇਸ ਤੋਂ ਬਾਅਦ ਹੁਣ ਉਨ੍ਹਾਂ ਨੂੰ ਯੂਨਾਈਟਿਡ ਕਿੰਗਡਮ ਤੇ ਨੌਰਥ ਅਮੈਰਿਕਾ ਦਰਮਿਆਨ ਆਪਣਾ ਸਮਾਂ ਵੰਡਣਾ ਹੋਵੇਗਾ ਤੇ ਵਿੱਤੀ ਤੌਰ ਉੱਤੇ ਆਤਮਨਿਰਭਰ ਬਣਨਾ ਹੋਵੇਗਾ।
ਸ਼ਨਿੱਚਰਵਾਰ ਨੂੰ ਐਲਾਨੇ ਸਮਝੌਤੇ ਤਹਿਤ ਹੈਰੀ ਤੇ ਮੇਘਨ ਵੱਲੋਂ ਆਪਣੇ ਘਰ ਫਰੌਗਮੋਰ ਕਾਟੇਜ ਦੀ ਮੁਰੰਮਤ ਕਰਵਾਏ ਜਾਣ ਲਈ ਖਰਚ ਕੀਤੀ ਗਈ ਬ੍ਰਿਟਿਸ਼ ਟੈਕਸਦਾਤਾਵਾਂ ਦੀ 2.4 ਮਿਲੀਅਨ ਪਾਊਂਡ ਰਾਸ਼ੀ ਵੀ ਇਸ ਜੋੜੇ ਨੂੰ ਮੋੜਨੀ ਹੋਵੇਗੀ। ਹੈਰੀ ਨੇ ਆਖਿਆ ਕਿ ਉਨ੍ਹਾਂ ਨੂੰ ਇਹ ਸੱਭ ਸਵੀਕਾਰ ਹੈ। ਉਹ ਉਸ ਸੱਭ ਨਾਲੋਂ ਪਾਸੇ ਹੋਣਾ ਚਾਹੁੰਦੇ ਹਨ ਜਿਸ ਕਰਕੇ ਉਹ ਜਾਣੇ ਜਾਂਦੇ ਹਨ। ਉਹ ਨਵੇਂ ਸਿਰੇ ਤੋਂ ਜਿੰ਼ਦਗੀ ਸੁ਼ਰੂ ਕਰਨੀ ਚਾਹੁੰਦੇ ਹਨ ਤੇ ਸ਼ਾਂਤਮਈ ਢੰਗ ਨਾਲ ਆਪਣੀ ਜਿ਼ੰਦਗੀ ਗੁਜ਼ਾਰਨੀ ਚਾਹੁੰਦੇ ਹਨ। ਹੈਰੀ ਨੇ ਆਖਿਆ ਕਿ ਇਸ ਪਰਿਵਾਰ ਵਿੱਚ ਉਹ ਪੈਦਾ ਹੋਏ ਅਤੇ ਦੇਸ਼ ਤੇ ਮਹਾਰਾਣੀ ਦੀ ਸੇਵਾ ਕਰਨਾ ਉਨ੍ਹਾਂ ਲਈ ਮਾਣ ਵਾਲੀ ਗੱਲ ਹੈ।