ਟੋਰਾਂਟੋ, 12 ਜਨਵਰੀ (ਪੋਸਟ ਬਿਊਰੋ) : ਐਤਵਾਰ ਸਵੇਰੇ ਉਸ ਸਮੇਂ ਕਸੂਤੀ ਸਥਿਤੀ ਪੈਦਾ ਹੋ ਗਈ ਜਦੋਂ ਟੋਰਾਂਟੋ ਏਰੀਆ ਵਿਚਲੇ ਨਿਊਕਲੀਅਰ ਪਾਵਰ ਪਲਾਂਟ ਵਿੱਚ ਕਿਸੇ ਅਨਸੁਖਾਵੀਂ ਘਟਨਾ ਸਬੰਧੀ ਐਮਰਜੰਸੀ ਐਲਰਟ ਓਨਟਾਰੀਓ ਭਰ ਦੇ ਲੋਕਾਂ ਤੱਕ ਪਹੁੰਚ ਗਿਆ। ਇਸ ਘਟਨਾ ਤੋਂ ਬਾਅਦ ਪ੍ਰੋਵਿੰਸ ਦੇ ਸਾਲੀਸਿਟਰ ਜਨਰਲ ਵੱਲੋਂ ਸਾਰਿਆਂ ਤੋਂ ਮੁਆਫੀ ਮੰਗੀ ਗਈ।
ਓਨਟਾਰੀਓ ਵਾਸੀਆਂ ਦੇ ਫੋਨਜ਼ ਉੱਤੇ ਐਤਵਾਰ ਸਵੇਰੇ 7:30 ਵਜੇ ਤੋਂ ਵੀ ਪਹਿਲਾਂ ਅਚਾਨਕ ਐਮਰਜੰਸੀ ਨੋਟੀਫਿਕੇਸ਼ਨ ਆਉਣ ਲੱਗ ਪਏ ਜਿਨ੍ਹਾਂ ਤੋਂ ਇੰਜ ਲੱਗ ਰਿਹਾ ਸੀ ਕਿ ਪਿਕਰਿੰਗ ਨਿਊਕਲੀਅਰ ਜੈਨਰੇਟਿੰਗ ਸਟੇਸ਼ਨ ੳੱੁਤੇ ਕੋਈ ਹਾਦਸਾ ਵਾਪਰਿਆ ਹੈ। ਹਾਲਾਂਕਿ ਇਹ ਸੁਨੇਹੇ ਸਾਰੇ ਪ੍ਰੋਵਿੰਸ ਵਿੱਚ ਭੇਜੇ ਗਏ ਸਨ ਪਰ ਆਖਿਆ ਗਿਆ ਕਿ ਅਸਲ ਵਿੱਚ ਇਹ ਨਿਊਕਲੀਅਰ ਪਲਾਂਟ ਦੇ ਦਸ ਕਿਲੋਮੀਟਰ ਦੇ ਦਾਇਰੇ ਵਿੱਚ ਰਹਿਣ ਵਾਲਿਆਂ ਲਈ ਹੀ ਸਨ। ਨੋਟੀਫਿਕੇਸ਼ਨ ਵਿੱਚ ਆਖਿਆ ਗਿਆ ਕਿ ਪਿਕਰਿੰਗ ਨਿਊਕਲੀਅਰ ਜੈਨਰੇਟਿੰਗ ਸਟੇਸ਼ਨ ਵਿੱਚ ਕੋਈ ਹਾਦਸਾ ਹੋਇਆ ਹੈ। ਸਟੇਸ਼ਨ ਤੋਂ ਕਿਸੇ ਵੀ ਤਰ੍ਹਾਂ ਦਾ ਰਿਸਾਅ ਨਹੀਂ ਹੋ ਰਿਹਾ ਤੇ ਐਮਰਜੰਸੀ ਅਮਲਾ ਮਾਮਲੇ ੳੱੁਤੇ ਨਿਗ੍ਹਾ ਰੱਖ ਰਿਹਾ ਹੈ।
ਇਹ ਵੀ ਆਖਿਆ ਗਿਆ ਕਿ ਪਿਕਰਿੰਗ ਨਿਊਕਲੀਅਰ ਜੈਨਰੇਟਿੰਗ ਸਟੇਸ਼ਨ ਦੇ ਨੇੜੇ ਰਹਿਣ ਵਾਲਿਆਂ ਨੂੰ ਕਿਸੇ ਵੀ ਤਰ੍ਹਾਂ ਦੀ ਅਹਿਤਿਆਤ ਵਰਤਣ ਦੀ ਲੋੜ ਨਹੀਂ ਹੈ। ਪਾਵਰ ਪਲਾਂਟ ਨੂੰ ਚਲਾਉਣ ਵਾਲੇ ਓਨਟਾਰੀਓ ਪਾਵਰ ਜੈਨਰੇਸ਼ਨ, ਨੇ ਟਵਿੱਟਰ ਉੱਤੇ ਸਵੇਰੇ 8:06 ਵਜੇ ਦੱਸਿਆ ਕਿ ਇਹ ਐਲਰਟ ਗਲਤੀ ਨਾਲ ਭੇਜਿਆ ਗਿਆ ਸੀ ਤੇ ਕਿਸੇ ਤਰ੍ਹਾਂ ਦੀ ਕੋਈ ਐਮਰਜੰਸੀ ਨਹੀਂ ਹੋਈ। ਇੱਕ ਘੰਟੇ ਬਾਅਦ ਇਹੋ ਜਿਹਾ ਹੀ ਸੁਨੇਹਾ ਫੋਨ ਉੱਤੇ ਵੀ ਦਿੱਤਾ ਗਿਆ।
ਓਨਟਾਰੀਓ ਦੀ ਸਾਲੀਸਿਟਰ ਜਨਰਲ ਸਿਲਵੀਆ ਜੋਨਜ਼ ਨੇ ਐਤਵਾਰ ਸਵੇਰੇ ਆਖਿਆ ਕਿ ਓਨਟਾਰੀਓ ਪਾਵਰ ਜੈਨਰੇਸ਼ਨ ਦਾ ਇਸ ਐਮਰਜੰਸੀ ਐਲਰਟ ਭੇਜੇ ਜਾਣ ਨਾਲ ਕੋਈ ਲੈਣਾ ਦੇਣਾ ਨਹੀਂ ਹੈ। ਉਨ੍ਹਾਂ ਆਖਿਆ ਕਿ ਜੋ ਕੁੱਝ ਵੀ ਵਾਪਰਿਆ ਉਹ ਰੂਟੀਨ ਵਿੱਚ ਕੀਤੀ ਜਾਣ ਵਾਲੀ ਟਰੇਨਿੰਗ ਐਕਸਰਸਾਈਜ਼ ਸੀ। ਇਸ ਨੂੰ ਪ੍ਰੋਵਿੰਸ਼ੀਅਲ ਐਮਰਜੰਸੀ ਆਪਰੇਸ਼ਨਜ਼ ਸੈਂਟਰ ਵੱਲੋਂ ਕਿਸੇ ਤਰ੍ਹਾਂ ਗਲਤੀ ਨਾਲ ਤੇ ਗੈਰਇਰਾਦਤਨ ਲੋਕਾਂ ਨੂੰ ਭੇਜ ਦਿੱਤਾ ਗਿਆ। ਉਨ੍ਹਾਂ ਇੱਕ ਬਿਆਨ ਜਾਰੀ ਕਰਕੇ ਆਖਿਆ ਕਿ ਓਨਟਾਰੀਓ ਸਰਕਾਰ ਲੋਕਾਂ ਨੂੰ ਗਲਤੀ ਨਾਲ ਚਿੰਤਾ ਵਿੱਚ ਪਾਉਣ ਵਰਗੇ ਇਸ ਸੁਨੇਹੇ ਨੂੰ ਭੇਜਣ ਲਈ ਮੁਆਫੀ ਮੰਗਦੀ ਹੈ ਤੇ ਇਸ ਮਾਮਲੇ ਦੀ ਜਾਂਚ ਵੀ ਕਰਵਾਈ ਜਾ ਰਹੀ ਹੈ ਕਿ ਆਖਿਰਕਾਰ ਇਹ ਭੱੁਲ ਹੋਈ ਕਿਵੇਂ? ਉਨ੍ਹਾਂ ਆਖਿਆ ਕਿ ਭਵਿੱਖ ਵਿੱਚ ਵੀ ਇਹ ਖਿਆਲ ਰੱਖਿਆ ਜਾਵੇਗਾ ਕਿ ਅਜਿਹਾ ਕਦੇ ਨਾ ਵਾਪਰੇ।