ਸ਼ਾਹਿਦਸ਼ਾਹਰ, ਇਰਾਨ, 8 ਜਨਵਰੀ (ਪੋਸਟ ਬਿਊਰੋ) : ਇਰਾਨ ਦੀ ਰਾਜਧਾਨੀ ਦੇ ਮੱੁਖ ਏਅਰਪੋਰਟ ਤੋਂ ਉਡਾਨ ਭਰਨ ਤੋਂ ਕੁੱਝ ਸਮੇਂ ਬਾਅਦ ਹੀ ਹਾਦਸੇ ਦਾ ਸਿ਼ਕਾਰ ਹੋਏ ਹਵਾਈ ਜਹਾਜ਼ ਵਿੱਚ ਮਾਰੇ ਗਏ 176 ਯਾਤਰੀਆਂ ਵਿੱਚੋਂ 63 ਕੈਨੇਡੀਅਨ ਨਾਗਰਿਕ ਸਨ। ਇਹ ਜਾਣਕਾਰੀ ਯੂਕਰੇਨ ਦੇ ਵਿਦੇਸ਼ ਮੰਤਰੀ ਵੱਲੋਂ ਦਿੱਤੀ ਗਈ।
ਵਦਿਅਮ ਪ੍ਰਿਸਤਾਇਕੋ ਨੇ ਆਖਿਆ ਕਿ ਇਸ ਜਹਾਜ਼ ਵਿੱਚ 63 ਕੈਨੇਡੀਅਨ, 82 ਇਰਾਨੀ, ਤੇ 11 ਯੁਕਰੇਨੀਆਈ ਯਾਤਰੀ ਸਵਾਰ ਸਨ- ਇਨ੍ਹਾਂ ਵਿੱਚ ਦੋ ਯੂਕਰੇਨੀਅਨ ਨਾਗਰਿਕ ਤੇ ਅਮਲੇ ਦੇ ਨੌਂ ਮੈਂਬਰ ਵੀ ਸ਼ਾਮਲ ਸਨ। ਇਨ੍ਹਾਂ ਤੋਂ ਇਲਾਵਾ ਸਵੀਡਨ ਦੇ 10, ਅਫਗਾਨ ਦੇ 4 ਤੇ ਜਰਮਨੀ ਦੇ 3 ਤੇ ਬ੍ਰਿਟੇਨ ਦੇ 3 ਨਾਗਰਿਕ ਸਵਾਰ ਸਨ। ਇਹ ਹਾਦਸਾ, ਜਿਸ ਵਿੱਚ ਜਹਾਜ਼ ਵਿੱਚ ਸਵਾਰ ਸਾਰੇ ਲੋਕ ਮਾਰੇ ਗਏ, ਬੱੁਧਵਾਰ ਸਵੇਰੇ ਉਸ ਸਮੇਂ ਵਾਪਰਿਆ ਜਦੋਂ ਇਰਾਨ ਨੇ ਇਰਾਕ ਵਿੱਚ ਅਮਰੀਕੀ ਸੈਨਿਕਾਂ ਵਾਲੇ ਦੋ ਟਿਕਾਣਿਆਂ ਉੱਤੇ ਬਾਲਿਸਟਿਕ ਮਿਜ਼ਾਈਲਾਂ ਨਾਲ ਹਮਲਾ ਕਰ ਦਿੱਤਾ। ਪਰ ਯੂਕਰੇਨੀਆਈ ਤੇ ਇਰਾਨੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਇਹੋ ਸ਼ੱਕ ਹੈ ਕਿ ਬੋਇੰਗ 737-800 ਜਹਾਜ਼ ਨੂੰ ਕਿਸੇ ਤਕਨੀਕੀ ਕਾਰਨ ਕਰਕੇ ਹੀ ਇਹ ਹਾਦਸਾ ਪੇਸ਼ ਆਇਆ।
ਗਲੋਬਲ ਅਫੇਅਰਜ਼ ਕੈਨੇਡਾ ਵੱਲੋਂ ਇਸ ਮਾਮਲੇ ਵਿੱਚ ਹਾਲ ਦੀ ਘੜੀ ਕੋਈ ਟਿੱਪਣੀ ਨਹੀਂ ਕੀਤੀ ਗਈ ਹੈ। ਏਅਰਲਾਈਨ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਬਹੁਤੇ ਯਾਤਰੀ ਯੂਕਰੇਨ ਦੀ ਰਾਜਧਾਨੀ ਕੀਵ ਜਾ ਰਹੇ ਸਨ ਜਿੱਥੋਂ ਉਨ੍ਹਾਂ ਅਗਾਂਹ ਵੱਖ ਵੱਖ ਮੰਜਿ਼ਲਾਂ ਤੈਅ ਕਰਨੀਆਂ ਸਨ। ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੈਲੈਂਸਕੀ ਵੱਲੋਂ ਮ੍ਰਿਤਕਾਂ ਦੇ ਪਰਿਵਾਰਾਂ ਨਾਲ ਦੱੁਖ ਸਾਂਝਾ ਕੀਤਾ ਗਿਆ। ਉਨ੍ਹਾਂ ਦੇ ਆਫਿਸ ਵੱਲੋਂ ਆਖਿਆ ਗਿਆ ਕਿ ਉਨ੍ਹਾਂ ਨੇ ਓਮਨ ਦੇ ਆਪਣੇ ਦੌਰੇ ਨੂੰ ਵਿਚਾਲੇ ਹੀ ਛੱਡ ਦਿੱਤਾ ਹੈ ਤੇ ਉਹ ਕੀਵ ਪਰਤ ਰਹੇ ਹਨ।
ਆਪਣੇ ਫੇਸਬੁਕ ਬਿਆਨ ਵਿੱਚ ਪਾਰਲੀਆਮੈਂਟ ਦੇ ਸਪੀਕਰ ਦਮਿਤਰੋ ਰਾਜ਼ੂਮਕੋਵ ਨੇ ਆਖਿਆ ਕਿ ਸਾਡਾ ਟੀਚਾ ਇਸ ਹਾਦਸੇ ਦੇ ਕਾਰਨਾਂ ਦਾ ਪਤਾ ਲਾਉਣਾ ਤੇ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ ਲੋੜੀਂਦੀ ਮਦਦ ਮੁਹੱਈਆ ਕਰਵਾਉਣਾ ਹੈ।