ਓਟਵਾ, 28 ਨਵੰਬਰ (ਪੋਸਟ ਬਿਊਰੋ) : ਵੱਡੀ ਗਿਣਤੀ ਹਾਈ ਪ੍ਰੋਫਾਈਲ ਟੋਰੀਜ਼ ਵੱਲੋਂ ਜਨਤਕ ਤੌਰ ਉੱਤੇ ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਤੋਂ ਆਪਣਾ ਅਹੁਦਾ ਛੱਡਣ ਦੀ ਮੰਗ ਕੀਤੀ ਜਾ ਰਹੀ ਹੈ।
ਵੀਰਵਾਰ ਨੂੰ ਆਪਣੀ ਹਾਊਸ ਲੀਡਰਸਿ਼ਪ ਟੀਮ ਦਾ ਐਲਾਨ ਕਰਨ ਤੋਂ ਬਾਅਦ ਸ਼ੀਅਰ ਤੋਂ ਜਦੋਂ ਇਹ ਸਵਾਲ ਪੁੱਛੇ ਗਏ ਕਿ ਕੀ ਉਹ ਆਪਣਾ ਅਹੁਦਾ ਛੱਡਣ ਬਾਰੇ ਵਿਚਾਰ ਕਰ ਰਹੇ ਹਨ ਤਾਂ ਉਨ੍ਹਾਂ ਆਖਿਆ ਕਿ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇਣ ਦਾ ਉਨ੍ਹਾਂ ਦਾ ਕੋਈ ਇਰਾਦਾ ਨਹੀਂ ਹੈ। ਸ਼ੀਅਰ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਆਖਿਆ ਕਿ ਕੈਨੇਡੀਅਨਾਂ ਨੇ ਸਾਨੂੰ ਚੁਣ ਕੇ ਜਿਹੜੀ ਜਿ਼ੰਮੇਵਾਰੀ ਦਿੱਤੀ ਹੈ ਉਹ ਉਸ ਨੂੰ ਪੂਰਾ ਕਰਨ ਲਈ ਇਹ ਸੰਘਰਸ਼ ਜਾਰੀ ਰੱਖਣਗੇ।
ਸ਼ੀਅਰ ਨੇ ਅੱਗੇ ਆਖਿਆ ਕਿ ਹੁਣ ਪਾਰਟੀ ਦੇ ਅੰਦਰੂਨੀ ਪਾੜਿਆਂ ਜਾਂ ਪਾਰਟੀ ਦੀ ਅੰਦਰੂਨੀ ਸਿਆਸਤ ਦਾ ਸਮਾਂ ਨਹੀਂ ਰਿਹਾ। ਉਨ੍ਹਾਂ ਇਹ ਵੀ ਆਖਿਆ ਕਿ ਇਸ ਦੇਸ਼ ਵਿੱਚ ਇਹ ਬਹੁਤ ਹੀ ਮੰਦਭਾਗੀ ਕੰਜ਼ਰਵੇਟਿਵ ਰਵਾਇਤ ਵੀ ਰਹੀ ਹੈ। ਇਹ ਵੀ ਪਤਾ ਲੱਗਿਆ ਹੈ ਕਿ ਸਟੀਫਨ ਹਾਰਪਰ ਦੇ ਸਾਬਕਾ ਕਮਿਊਨਿਕੇਸ਼ਨਜ਼ ਡਾਇਰੈਕਟਰ ਕੋਰੀ ਟੈਨੇਕੇਅ ਤੇ ਦੋ ਹੋਰ ਕੰਜ਼ਰਵੇਟਿਵਜ਼ ਵੱਲੋਂ ਸ਼ੀਅਰ ਨੂੰ ਲੀਡਰਸਿ਼ਪ ਦੇ ਅਹੁਦੇ ਤੋਂ ਪਾਸੇ ਕਰਨ ਲਈ ਇੱਕ ਨਵੀਂ ਗੈਰ ਮੁਨਾਫੇ ਵਾਲੀ ਕੈਂਪੇਨ ਸ਼ੁਰੂ ਕੀਤੀ ਗਈ ਹੈ।
ਟੈਨੇਕੇਅ, ਜਿਨ੍ਹਾਂ ਨੇ ਕੰਜ਼ਰਵੇਟਿਵ ਲੀਡਰਸਿ਼ਪ ਲਈ ਮੈਕਸਿਮ ਬਰਨੀਅਰ ਵਾਸਤੇ ਅਸਫਲ ਮੁਹਿੰਮ ਚਲਾਈ, ਜ਼ਾਹਿਰਾ ਤੌਰ ਉੱਤੇ ਸ਼ੀਅਰ ਦੇ ਸੱਭ ਤੋਂ ਵੱਡੇ ਆਲੋਚਕ ਹਨ। ਖਾਸ ਤੌਰ ਉੱਤੇ ਸ਼ੀਅਰ ਦੇ ਸਮਲਿੰਗੀ ਵਿਆਹਾਂ ਬਾਰੇ ਵਿਚਾਰਾਂ ਤੋਂ ਟੈਨੇਕੇਅ ਸਹਿਮਤ ਨਹੀਂ ਹਨ। ਵੀਰਵਾਰ ਨੂੰ ਇੱਕ ਇੰਟਰਵਿਊ ਵਿੱਚ ਟੈਨੇਕੇਅ ਨੇ ਆਖਿਆ ਕਿ ਜਿਸ ਤਰ੍ਹਾਂ ਸ਼ੀਅਰ ਇਨ੍ਹਾਂ ਮੁੱਦਿਆਂ ਉੱਤੇ ਸਵਾਲਾਂ ਦੇ ਜਵਾਬ ਦਿੰਦੇ ਹਨ ਉਨ੍ਹਾਂ ਤੋਂ ਬਹੁਤੇ ਕੰਜ਼ਰਵੇਟਿਵ ਨਿਰਾਸ਼ ਹਨ। ਇਸ ਜਥੇਬੰਦੀ ਨੇ ਆਪਣੀ ਵੈੱਬਸਾਈਟ ਉੱਤੇ ਆਖਿਆ ਕਿ ਜਦੋਂ ਸਿਆਸੀ ਆਗੂ ਅਸਫਲ ਹੁੰਦੇ ਹਨ ਤਾਂ ਉਹ ਅਸਤੀਫਾ ਦਿੰਦੇ ਹਨ। ਵੈੱਬਸਾਈਟ ਉੱਤੇ ਇਹ ਵੀ ਲਿਖਿਆ ਗਿਆ ਹੈ ਕਿ ਐਂਡਰਿਊ ਸ਼ੀਅਰ ਨੂੰ ਫੌਰੀ ਤੌਰ ਉੱਤੇ ਆਪਣਾ ਅਹੁਦਾ ਛੱਡ ਦੇਣਾ ਚਾਹੀਦਾ ਹੈ ਤੇ ਹੋਰਨਾਂ ਆਗੂਆਂ ਨਾਲ ਮੁਕਾਬਲਾ ਕਰਨਾ ਚਾਹੀਦਾ ਹੈ ਤਾਂ ਕਿ ਸਾਡੀ ਪਾਰਟੀ ਨੂੰ ਉਸ ਦੇ ਬਿਹਤਰ ਨਤੀਜੇ ਮਿਲ ਸਕਣ।
ਇਸ ਗਰੁੱਪ ਬਣਾਉਣ ਵਾਲਿਆਂ ਵਿੱਚੋਂ ਇੱਕ ਜੈੱਫ ਬਲਿੰਗਲ, ਜੋ ਕਿ ਸੋਸ਼ਲ ਮੀਡੀਆ ਗਰੁੱਪਜ਼ ਓਨਟਾਰੀਓ ਐਂਡ ਕੈਨੇਡਾ ਪ੍ਰਾਊਡ ਦੇ ਬਾਨੀ ਵੀ ਹਨ, ਨੇ ਆਖਿਆ ਕਿ ਸ਼ੀਅਰ ਨੇ ਆਪਣੀ ਨਿੰਦਿਆ ਆਪ ਸਹੇੜ ਲਈ ਹੈ। ਉਹ ਤਾਂ ਇਸ ਤਰ੍ਹਾਂ ਪੇਸ਼ ਵੀ ਨਹੀਂ ਆ ਰਹੇ ਕਿ ਉਨ੍ਹਾਂ ਨੂੰ ਇਹ ਕੰਮ ਪਿਆਰਾ ਹੈ। ਉਨ੍ਹਾਂ ਵਿੱਚ ਬਹੁਤੀ ਐਨਰਜੀ ਵੀ ਨਹੀਂ ਹੈ। ਜਦੋਂ ਉਹ ਗੱਲ ਕਰਦੇ ਹਨ ਤਾਂ ਉਨ੍ਹਾਂ ਉੱਤੇ ਭਰੋਸਾ ਕਰਨਾ ਮੁਸ਼ਕਲ ਹੋ ਜਾਂਦਾ ਹੈ। ਉਨ੍ਹਾਂ ਆਖਿਆ ਕਿ ਸ਼ੀਅਰ ਨੀਰਸ ਤੇ ਇੱਕ ਲੈਅ ਵਿੱਚ ਗੱਲ ਕਰਨ ਵਾਲੇ ਆਗੂ ਹਨ। ਉਨ੍ਹਾਂ ਆਖਿਆ ਕਿ ਸ਼ੀਅਰ ਨੂੰ ਲੀਡਰਸਿ਼ਪ ਦੇ ਅਹੁਦੇ ਤੋਂ ਪਾਸੇ ਹਟਾ ਦਿੱਤਾ ਜਾਣਾ ਚਾਹੀਦਾ ਹੈ ਪਰ ਉਨ੍ਹਾਂ ਇਹ ਨਹੀਂ ਦੱਸਿਆ ਕਿ ਉਹ ਇਸ ਅਹੁਦੇ ਉੱਤੇ ਕਿਸ ਨੂੰ ਵੇਖਣਾ ਚਾਹੁੰਦੇ ਹਨ। ਇਨ੍ਹਾਂ ਤੋਂ ਇਲਾਵਾ ਸਾਬਕਾ ਕੰਜ਼ਰਵੇਟਿਵ ਸਟਾਫਰ ਜੇਮੀ ਐਲਰਟਨ ਤੇ ਹਾਰਪਰ ਦੀ ਸਾਬਕਾ ਸਹਾਇਕ ਜੇਨੀ ਬਾਇਰਨ ਵੀ ਸ਼ੀਅਰ ਦੇ ਵੱਡੇ ਆਲੋਚਕ ਹਨ।