ਓਟਵਾ, 28 ਨਵੰਬਰ (ਪੋਸਟ ਬਿਊਰੋ) : ਪਿਛਲੇ ਮਹੀਨੇ ਹੋਈਆਂ ਫੈਡਰਲ ਚੋਣਾਂ ਵਿੱਚ ਹਾਰ ਦਾ ਮੂੰਹ ਵੇਖਣ ਵਾਲੇ ਫੈਡਰਲ ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਬਾਰੇ ਸਾਬਕਾ ਕੰਜ਼ਰਵੇਟਿਵ ਐਮਪੀ ਲੀਜ਼ਾ ਰਾਇਤ ਨੇ ਇਹ ਸਵੀਕਾਰ ਕੀਤਾ ਹੈ ਕਿ ਪਾਰਟੀ ਮੈਂਬਰਾਂ ਵਿੱਚ ਇਸ ਗੱਲ ਨੂੰ ਲੈ ਕੇ ਇਹ ਧਾਰਨਾ ਮਜ਼ਬੂਤ ਹੋ ਰਹੀ ਹੈ ਕਿ ਪਾਰਟੀ ਲੀਡਰ ਵਜੋਂ ਸ਼ੀਅਰ ਬਹੁਤ ਦਮਖ਼ਮ ਵਾਲੇ ਆਗੂ ਨਹੀਂ ਸਨ।
ਹਾਲਾਂਕਿ ਇਸ ਤੋਂ ਪਹਿਲਾਂ ਰਾਇਤ ਇਹ ਆਖ ਚੁੱਕੀ ਹੈ ਕਿ ਸ਼ੀਅਰ ਨੂੰ ਇੱਕ ਹੋਰ ਮੌਕਾ ਮਿਲਣਾ ਚਾਹੀਦਾ ਹੈ। ਪਰ ਰਾਇਤ ਨੇ ਆਖਿਆ ਕਿ ਉਹ ਅਜੇ ਵੀ ਸ਼ੀਅਰ ਦੀ ਲੀਡਰਸਿ਼ਪ ਬਾਰੇ ਹੋ ਰਹੀ ਨੁਕਤਾਚੀਨੀ ਨਾਲ ਸਹਿਮਤ ਨਹੀਂ ਹੈ। ਫੈਡਰਲ ਚੋਣਾਂ ਵਿੱਚ ਸੱਤਾ ਉੱਤੇ ਕਾਬਜ ਨਾ ਹੋਣ ਵਾਲੇ ਸ਼ੀਅਰ ਦੇ ਸਿਆਸੀ ਭਵਿੱਖ ਸਬੰਧੀ ਸਵਾਲ ਉੱਠ ਰਹੇ ਹਨ। ਕੰਜ਼ਰਵੇਟਿਵ ਭਾਵੇਂ ਇਨ੍ਹਾਂ ਚੋਣਾਂ ਵਿੱਚ ਬਹੁਤੀਆਂ ਸੀਟਾਂ ਨਹੀਂ ਜਿੱਤ ਸਕੇ ਪਰ ਫਿਰ ਵੀ ਕੰਜ਼ਰਵੇਟਿਵਾਂ ਨੇ 22 ਨਵੀਂਆਂ ਸੀਟਾਂ ਉੱਤੇ ਕਬਜਾ ਜਮਾਇਆ।
ਬੁੱਧਵਾਰ ਨੂੰ ਯੂਨੀਵਰਸਿਟੀ ਆਫ ਟੋਰਾਂਟੋ ਵਿੱਚ ਗੱਲਬਾਤ ਕਰਦਿਆਂ ਰਾਇਤ ਨੇ ਆਖਿਆ ਕਿ ਭਾਵੇਂ ਤੁਸੀਂ ਇਕਨੌਮਿਕ ਕੰਜ਼ਰਵੇਟਿਵ, ਸੋਸ਼ਲ ਕੰਜ਼ਰਵੇਟਿਵ ਜਾਂ ਲਿਬਰਟੇਰੀਅਨ ਹੋਵੋਂ ਪਰ ਮੁੱਕਦੀ ਗੱਲ ਇਹ ਹੈ ਕਿ ਸ਼ੀਅਰ ਮਜ਼ਬੂਤ ਨਹੀਂ ਹਨ। ਰਾਇਤ ਨੇ ਆਖਿਆ ਕਿ ਸ਼ੀਅਰ ਬਾਰੇ ਹੋਰਨਾਂ ਮੈਂਬਰਾਂ ਦੀ ਰਾਇ ਤੋਂ ਉਹ ਨਿਜੀ ਤੌਰ ਉੱਤੇ ਸਹਿਮਤ ਹੈ। ਸ਼ੀਅਰ ਬਾਰੇ ਇੱਕ ਆਮ ਰਾਇ ਬਣ ਚੁੱਕੀ ਹੈ ਤੇ ਇਸ ਨਾਲ ਇਹ ਦਾਅਵੇ ਖ਼ਤਮ ਹੋ ਜਾਂਦੇ ਹਨ ਕਿ ਉਹ ਕਮਜ਼ੋਰ ਹਨ। ਰਾਇਤ ਨੇ ਆਖਿਆ ਕਿ ਸ਼ੀਅਰ ਬਹੁਤ ਹੀ ਦਿਆਲੂ, ਨੇਕ ਤੇ ਭੱਦਰ ਪੁਰਖ ਹਨ। ਉਹ ਬਹੁਤ ਹੀ ਮਿੱਠ ਬੋਲੜੇ ਹਨ। ਉਹ ਉਹੀ ਕੁੱਝ ਕਰਨ ਦੀ ਕੋਸਿ਼ਸ਼ ਕਰਦੇ ਹਨ ਜੋ ਇਸ ਸੰਸਾਰ ਵਿੱਚ ਠੀਕ ਹੈ।
ਓਨਟਾਰੀਓ ਦੇ ਮਿਲਟਨ ਹਲਕੇ ਵਿੱਚ ਸੀਟ ਗੁਆ ਬੈਠਣ ਵਾਲੀ ਰਾਇਤ ਇੱਕ ਸੀਨੀਅਰ ਕੰਜ਼ਰਵੇਟਿਵ ਐਮਪੀ ਹਨ ਤੇ ਉਨ੍ਹਾਂ ਦੀ ਸਾਰੀਆਂ ਧਿਰਾਂ ਇੱਜ਼ਤ ਵੀ ਕਰਦੀਆਂ ਹਨ। ਇਸ ਹਾਰ ਨੂੰ ਕੁੱਝ ਵੱਲੋਂ ਗ੍ਰੇਟਰ ਟੋਰਾਂਟੋ ਏਰੀਆ ਵਿੱਚ ਸੱਭ ਤੋਂ ਮਾੜੀ ਕਾਰਗੁਜ਼ਾਰੀ ਵੀ ਦੱਸਿਆ ਜਾ ਰਿਹਾ ਹੈ। ਅਪਰੈਲ ਵਿੱਚ ਹੋਣ ਜਾ ਰਹੇ ਪਾਰਟੀ ਇਜਲਾਸ ਵਿੱਚ ਸ਼ੀਅਰ ਦੀ ਲੀਡਰਸਿ਼ਪ ਦਾ ਮੁਲਾਂਕਣ ਕੀਤਾ ਜਾਵੇਗਾ। ਜਿ਼ਕਰਯੋਗ ਹੈ ਕਿ ਬੁੱਧਵਾਰ ਨੂੰ ਸ਼ੀਅਰ ਨੇ ਐਲਾਨ ਕੀਤਾ ਕਿ ਉਹ ਆਪਣੀ ਨਵੀਂ ਲੀਡਰਸਿ਼ਪ ਟੀਮ ਦਾ ਵੀਰਵਾਰ ਸਵੇਰੇ 10:00 ਵਜੇ ਐਲਾਨ ਕਰਨਗੇ।