ਟੋਰਾਂਟੋ, 27 ਨਵੰਬਰ (ਪੋੋਸਟ ਬਿਊਰੋ) : ਜਿੰਮ ਕੈਰਿਆਨਿਸ ਨੂੰ ਸਕਾਰਬੌਰੋ-ਐਗਿਨਕੋਰਟ ਦਾ ਮੁੜ ਸਿਟੀ ਕਾਉਂਸਲਰ ਬਹਾਲ ਕਰਨ ਸਬੰਧੀ ਪ੍ਰੋਵਿੰਸ਼ੀਅਲ ਅਦਾਲਤ ਵੱਲੋਂ ਸੁਣਾਏ ਗਏ ਫੈਸਲੇ ਤੋਂ ਬਾਅਦ ਟੋਰਾਂਟੋ ਦੇ ਮੇਅਰ ਜੌਹਨ ਟੋਰੀ ਨੇ ਆਖਿਆ ਕਿ ਉਨ੍ਹਾਂ ਨੂੰ ਹਲਕਾ ਵਾਸੀਆਂ ਤੋਂ ਕੈਰਿਆਨਿਸ ਦੀ ਹਮਾਇਤ ਵਿੱਚ ਕਈ ਤਰ੍ਹਾਂ ਦੇ ਸੁਨੇਹੇ ਮਿਲੇ।
ਮੰਗਲਵਾਰ ਸਵੇਰੇ ਸਿਟੀ ਕਾਉਂਸਲ ਦੀ ਮੀਟਿੰਗ ਤੋਂ ਠੀਕ ਪਹਿਲਾਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਟੋਰੀ ਨੇ ਆਖਿਆ ਕਿ ਜਿਸ ਹਾਲਾਤ ਵਿੱਚੋਂ ਕੈਰਿਆਨਿਸ ਲੰਘੇ ਹਨ ਉਸ ਬਾਰੇ ਮਹਿਸੂਸ ਕਰਕੇ ਉਹ ਕਾਫੀ ਪ੍ਰਭਾਵਿਤ ਹੋਏ ਹਨ। ਟੋਰੀ ਨੇ ਦੱਸਿਆ ਕਿ ਕੈਰਿਆਨਿਸ ਦੇ ਹਲਕੇ ਦੇ ਲੋਕਾਂ ਨੇ ਆਖਿਆ ਕਿ ਉਨ੍ਹਾਂ ਦੇ ਵਾਰਡ ਵਿੱਚ ਜਿਹੜੀਆਂ ਕਮਿਊਨਿਟੀਜ਼ ਹਨ ਉਹ ਉਨ੍ਹਾਂ ਲਈ ਬੜੀ ਸਰਗਰਮ ਭੂਮਿਕਾ ਨਿਭਾਅ ਰਹੇ ਹਨ। ਲੋਕਾਂ ਨੇ ਇਹ ਵੀ ਆਖਿਆ ਕਿ ਉਨ੍ਹਾਂ ਨੂੰ ਖੁਸ਼ੀ ਹੈ ਕਿ ਉਹ ਉਨ੍ਹਾਂ ਦੀ ਸੇਵਾ ਲਈ ਵਾਪਿਸ ਆ ਜਾਣਗੇ।
ਚੋਣਾਂ ਵਿੱਚ ਹੋਏ ਖਰਚਿਆਂ ਦੀ ਕਥਿਤ ਉਲੰਘਣਾਂ ਦੇ ਸਬੰਧ ਵਿੱਚ ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਕੈਰਿਆਨਿਸ ਨੂੰ ਉਨ੍ਹਾਂ ਦੇ ਅਹੁਦੇ ਤੋਂ ਹਟਾ ਦਿੱਤਾ ਗਿਆ ਸੀ। ਉਸ ਸਮੇਂ ਸਿਟੀ ਕਲਰਕ ਨੇ ਸਿਟੀ ਕਾਉਂਸਲਰ ਨੂੰ ਇਹ ਸੂਚਨਾ ਦਿੱਤੀ ਸੀ ਕਿ ਉਹ ਹੋਰ ਸਮਾਂ ਵਾਰਡ ਨੰ 22 ਦੇ ਵਾਸੀਆਂ ਦੀ ਸੇਵਾ ਨਹੀਂ ਕਰ ਸਕਣਗੇ। ਮਿਉਂਸਪਲ ਇਲੈਕਸ਼ਨਜ਼ ਐਕਟ ਵਿੱਚ ਹਰੇਕ ਉਮੀਦਵਾਰ ਨੂੰ ਪਾਰਟੀਆਂ ਨੂੰ 6,120.80 ਡਾਲਰ ਖਰਚਣ ਦੀ ਇਜਾਜ਼ਤ ਹੈ ਜਦਕਿ ਕਲਰਕ ਉੱਲੀ ਵਾਟਕਿੱਸ ਨੇ ਦੋਸ਼ ਲਾਇਆ ਕਿ ਕੈਰਿਆਨਿਸ ਨੇ 2018 ਵਿੱਚ ਹੋਈਆਂ ਟੋਰਾਂਟੋ ਇਲਕੈਸ਼ਨਜ਼ ਤੋਂ ਬਾਅਦ 32,083.50 ਡਾਲਰ ਖਰਚ ਦਿੱਤੇ।
ਪਰ ਕੈਰਿਆਨਿਸ ਇਹੋ ਆਖਦੇ ਰਹੇ ਕਿ ਇਹ ਸੱਭ ਕਿਸੇ ਕਲੈਰੀਕਲ ਗਲਤੀ ਦਾ ਹੀ ਨਤੀਜਾ ਹੈ। ਸੋਮਵਾਰ ਨੂੰ ਸੁਣਾਏ ਗਏ ਫੈਸਲੇ ਵਿੱਚ ਜੱਜ ਚਾਮਰ ਨੇ ਆਖਿਆ ਕਿ ਕੈਰਿਆਨੀ ਨੇ ਸਹੀ ਨੀਤ ਨਾਲ ਕੰਮ ਕੀਤਾ ਤੇ ਉਨ੍ਹਾਂ ਚੋਣਾਂ ਤੋਂ ਬਾਅਦ ਥੌਰਨਹਿੱਲ ਵਿੱਚ ਸੰਤੋਰਨੀ ਗ੍ਰਿੱਲ ਵਿੱਚ ਜਿਹੜੀ ਪਾਰਟੀ ਦਿੱਤੀ ਸੀ ਉਸ ਉੱੇਤੇ ਹੋਏ ਖਰਚੇ ਦਾ ਵੀ ਖੁਲਾਸਾ ਕੀਤਾ ਗਿਆ ਸੀ। ਜੱਜ ਨੇ ਆਖਿਆ ਕਿ ਉਨ੍ਹਾਂ ਨੂੰ ਨਹੀਂ ਲੱਗਦਾ ਕਿ ਖਰਚਿਆਂ ਨੂੰ ਲੁਕਾਉਣ ਦੀ ਕੋਸਿ਼ਸ਼ ਕੀਤੀ ਗਈ।