ਰੇਜਾਇਨਾ, 27 ਨਵੰਬਰ (ਪੋਸਟ ਬਿਊਰੋ) : ਸਸਕੈਚਵਨ ਦੇ ਪ੍ਰੀਮੀਅਰ ਸਕੌਟ ਮੋਅ ਦਾ ਕਹਿਣਾ ਹੈ ਕਿ ਫੈਡਰਲ ਇੰਟਰਗਵਰਮੈਂਟਲ ਅਫੇਅਰਜ਼ ਮੰਤਰੀ ਕ੍ਰਿਸਟੀਆ ਫਰੀਲੈਂਡ ਨਾਲ ਉਨ੍ਹਾਂ ਦੀ ਮੁਲਾਕਾਤ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨਾਲ ਕੀਤੀ ਗਈ ਮੁਲਾਕਾਤ ਨਾਲੋਂ ਕਿਤੇ ਜਿ਼ਆਦਾ ਅਰਥਭਰਪੂਰ ਰਹੀ।
ਮੋਅ ਤੇ ਫਰੀਲੈਂਡ ਨੇ ਰੇਜਾਇਨਾ ਵਿੱਚ ਲੱਗਭਗ ਦੋ ਘੰਟੇ ਤੱਕ ਮੁਲਾਕਾਤ ਕੀਤੀ ਪਰ ਮੋਅ ਨੇ ਦੱਸਿਆ ਕਿ ਇਸ ਦੌਰਾਨ ਕਿਸੇ ਵੀ ਤਰ੍ਹਾਂ ਦੀ ਵਚਨਬੱਧਤਾ ਨਹੀਂ ਪ੍ਰਗਟਾਈ ਗਈ। ਉਨ੍ਹਾਂ ਆਖਿਆ ਕਿ ਫਰੀਲੈਂਡ ਦਾ ਇਸ ਮੁਲਾਕਾਤ ਪਿੱਛੇ ਅਸਲ ਮਕਸਦ ਸਾਡੇ ਵਿਚਾਰ ਜਾਨਣਾ ਤੇ ਆਪਣੀ ਰਫਤਾਰ ਤੇਜ਼ ਕਰਨਾ ਸੀ। ਫਰੀਲੈਂਡ ਨੂੰ ਟਰੂਡੋ ਦੇ ਨਵੇਂ ਮੰਤਰੀ ਮੰਡਲ ਵਿੱਚ ਡਿਪਟੀ ਪ੍ਰਧਾਨ ਮੰਤਰੀ ਵੀ ਨਿਯੁਕਤ ਕੀਤਾ ਗਿਆ ਹੈ। ਅਕਤੂਬਰ ਵਿੱਚ ਹੋਈਆਂ ਫੈਡਰਲ ਚੋਣਾਂ ਵਿੱਚ ਸਸਕੈਚਵਨ ਤੇ ਅਲਬਰਟਾ ਵਿੱਚ ਕੋਈ ਵੀ ਸੀਟ ਨਾ ਜਿੱਤ ਸਕਣ ਤੋਂ ਬਾਅਦ ਫਰੀਲੈਂਡ ਨੂੰ ਖੇਤਰੀ ਤਣਾਅ ਦਾ ਪਤਾ ਲਾਉਣ ਤੇ ਉਨ੍ਹਾਂ ਦੇ ਹੱਲ ਲੱਭਣ ਦੀ ਜਿ਼ੰਮੇਵਾਰੀ ਸੌਂਪੀ ਗਈ ਹੈ।
ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਟਰੂਡੋ ਨਾਲ ਹੋਈ ਮੀਟਿੰਗ ਨੂੰ ਮੋਅ ਨੇ ਬਹੁਤ ਹੀ ਨਿਰਾਸ਼ਾਜਨਕ ਦੱਸਿਆ ਸੀ ਤੇ ਆਖਿਆ ਸੀ ਕਿ ਪ੍ਰੋਵਿੰਸ ਹੋਰ ਜਿ਼ਆਦਾ ਖੁਦਮੁਖ਼ਤਿਆਰੀ ਹਾਸਲ ਕਰਨ ਲਈ ਰਾਹ ਲੱਭੇਗੀ। ਮੋਅ ਨੇ ਟਰੂਡੋ ਕੋਲ ਚੁੱਕੇ ਗਏ ਮੁੱਦਿਆਂ ਨੂੰ ਹੀ ਫਰੀਲੈਂਡ ਨਾਲ ਵੀ ਵਿਚਾਰਨ ਦੀ ਯੋਜਨਾ ਬਣਾਈ ਸੀ। ਇਨ੍ਹਾਂ ਵਿੱਚ ਫੈਡਰਲ ਕਾਰਬਨ ਟੈਕਸ ਉੱਤੇ ਰੋਕ ਲਾਉਣ ਤੇ ਇਕੁਅਲਾਈਜੇ਼ਸ਼ਨ ਫਾਰਮੂਲੇ ਉੱਤੇ ਮੁੜ ਕੰਮ ਕਰਨ ਵਰਗੇ ਮੁੱਦੇ ਸ਼ਾਮਲ ਹਨ।