ਓਟਵਾ, 21 ਨਵੰਬਰ (ਪੋਸਟ ਬਿਊਰੋ) : ਬੁੱਧਵਾਰ ਨੂੰ ਕੈਬਨਿਟ ਵਿੱਚ ਸ਼ਾਮਲ ਕੀਤੇ ਗਏ ਨਵੇਂ ਚਿਹਰਿਆਂ ਅਤੇ ਕੀਤੇ ਗਏ ਫੇਰਬਦਲ ਵਿੱਚ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕ੍ਰਿਸਟੀਆ ਫਰੀਲੈਂਡ ਨੂੰ ਡਿਪਟੀ ਪ੍ਰਧਾਨ ਮੰਤਰੀ ਦਾ ਅਹੁਦਾ ਦਿੱਤਾ। ਇਸ ਦੇ ਨਾਲ ਹੀ ਫਰੀਲੈਂਡ ਇੰਟਰਗਵਰਮੈਂਟਲ ਮਾਮਲਿਆਂ ਵਿੱਚ ਵੀ ਅਹਿਮ ਭੂਮਿਕਾ ਨਿਭਾਵੇਗੀ। ਹਾਲਾਂਕਿ ਇਹ ਖਿਤਾਬ ਭਾਵੇਂ ਸੰਕੇਤਾਤਮਕ ਹੈ ਪਰ ਫਰੀਲੈਂਡ ਨੇ ਆਖਿਆ ਕਿ ਉਹ ਇਹ ਅਹੁਦਾ ਉਸ ਸੂਰਤ ਵਿੱਚ ਕਦੇ ਵੀ ਸਵੀਕਾਰ ਨਾ ਕਰਦੀ ਜੇ ਇਹ ਅਸਲ ਸ਼ਕਤੀਆਂ ਨਾਲ ਨਾ ਆਇਆ ਹੁੰਦਾ।
ਬੁੱਧਵਾਰ ਨੂੰ ਇੱਕ ਇੰਟਰਵਿਊ ਵਿੱਚ ਇਹ ਪੁੱਛੇ ਜਾਣ ਉੱਤੇ ਕਿ ਕੀ ਨਵੀਂ ਭੂਮਿਕਾ ਨਾਲ ਕੋਈ ਜਿੰ਼ਮੇਵਾਰੀਆਂ ਵੀ ਜੁੜੀਆਂ ਹਨ ਤਾਂ ਫਰੀਲੈਂਡ ਨੇ ਆਖਿਆ ਕਿ ਜੇ ਇਸ ਅਹੁਦੇ ਨਾਲ ਕੋਈ ਜਿ਼ੰਮੇਵਾਰੀ ਨਾ ਜੁੜੀ ਹੁੰਦੀ ਤਾਂ ਉਨ੍ਹਾਂ ਇਹ ਅਹੁਦਾ ਹੀ ਨਹੀਂ ਸੀ ਲੈਣਾ। ਫਰੀਲੈਂਡ ਨੇ ਅੱਗੇ ਆਖਿਆ ਕਿ ਉਨ੍ਹਾਂ ਇਹ ਜਿੰ਼ਮੇਵਾਰੀ ਸਿਰਫ ਸਪੋਕਸਮਾਡਲ ਬਣਲ ਲਈ ਨਹੀਂ ਲਈ। ਇਸ ਅਹੁਦੇ ਦੀ ਜਿ਼ੰਮੇਵਾਰੀ ਪ੍ਰਧਾਨ ਮੰਤਰੀ ਦੇ ਨਾਲ ਰਹਿ ਕੇ ਕੰਮ ਕਰਵਾਉਣਾ ਤੇ ਉਨ੍ਹਾਂ ਨੂੰ ਸਹਿਯੋਗ ਦੇਣਾ ਹੈ। ਉਨ੍ਹਾਂ ਆਖਿਆ ਕਿ ਪ੍ਰਧਾਨ ਮੰਤਰੀ ਦੇ ਨਾਲ ਕੰਮ ਕਰਨਾ ਤੇ ਉਨ੍ਹਾਂ ਦਾ ਭਾਰ ਵੰਡਾਉਣਾ ਬਹੁਤ ਹੀ ਮਾਣ ਵਾਲੀ ਗੱਲ ਹੈ।
ਪਰ ਅਜੇ ਵੀ ਇਹ ਸਵਾਲ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ ਕਿ ਡਿਪਟੀ ਪ੍ਰਧਾਨ ਮੰਤਰੀ ਕਰਦਾ ਕੀ ਹੈ? ਅਤੀਤ ਵਿੱਚ ਡਿਪਟੀ ਪ੍ਰਧਾਨ ਮੰਤਰੀ ਪ੍ਰਸ਼ਨ ਕਾਲ ਦੌਰਾਨ ਪ੍ਰਧਾਨ ਮੰਤਰੀ ਦੇ ਪੱਖ ਉੱਤੇ ਸਵਾਲਾਂ ਦੇ ਜਵਾਬ ਦਿੰਦਾ ਸੀ। ਹੁਣ ਹੋ ਸਕਦਾ ਹੈ ਕਿ ਟਰੂਡੋ ਦੀ ਗੈਰਹਾਜ਼ਰੀ ਵਿੱਚ ਫਰੀਲੈਂਡ ਸਵਾਲਾਂ ਦੇ ਜਵਾਬ ਦਿਆ ਕਰੇਗੀ। ਇਸ ਤੋਂ ਇਲਾਵਾ ਪਹਿਲਾਂ ਰੋਜ਼ਾਨਾ ਸਾਹਮਣੇ ਆਉਣ ਵਾਲੇ ਮੁੱਦਿਆਂ ਉੱਤੇ ਵੀ ਪ੍ਰਧਾਨ ਮੰਤਰੀ ਦੀ ਗੈਰਹਾਜ਼ਰੀ ਵਿੱਚ ਡਿਪਟੀ ਪ੍ਰਧਾਨ ਮੰਤਰੀ ਹੱਲ ਕੱਢਦਾ ਸੀ। ਡਿਪਟੀ ਪ੍ਰਧਾਨ ਮੰਤਰੀ ਨੂੰ ਅਤੀਤ ਵਿੱਚ ਪ੍ਰਧਾਨ ਮੰਤਰੀ ਦਾ ਜਾਨਸ਼ੀਨ ਵੀ ਮੰਨਿਆ ਜਾਂਦਾ ਸੀ। ਇਸ ਅਹੁਦੇ ਉੱਤੇ ਰਹਿਣ ਵਾਲੇ ਕਈ ਆਗੂਆਂ ਨੂੰ ਲੀਡਰਸਿ਼ਪ ਦੌੜ ਵਿੱਚ ਵੀ ਨਿੱਤਰਦਿਆਂ ਵੇਖਿਆ ਗਿਆ ਹੈ।
ਵੀਰਵਾਰ ਨੂੰ ਪਾਰਲੀਆਮੈਂਟ ਹਿੱਲ ਉੱਤੇ ਸਾਬਕਾ ਲਿਬਰਲ ਪ੍ਰਧਾਨ ਮੰਤਰੀ ਤੇ ਕਦੇ ਡਿਪਟੀ ਪ੍ਰਧਾਨ ਮੰਤਰੀ ਰਹੇ ਜੀਨ ਕ੍ਰੈਚੀਅਨ ਨੇ ਆਖਿਆ ਕਿ ਇਸ ਅਹੁਦੇ ਉੱਤੇ ਰਹਿਣਾ ਫਾਇਦੇ ਦਾ ਸੌਦਾ ਹੈ। ਫਰੀਲੈਂਡ ਆਉਣ ਵਾਲੇ ਸਮੇਂ ਵਿੱਚ ਕਿਹੋ ਜਿਹੀਆਂ ਸ਼ਕਤੀਆਂ, ਭੂਮਿਕਾਵਾਂ ਤੇ ਜਿ਼ੰਮੇਵਾਰੀਆਂ ਨਿਭਾਵੇਗੀ ਉਨ੍ਹਾਂ ਦਾ ਉਦੋਂ ਤੱਕ ਪਤਾ ਨਹੀਂ ਲੱਗੇਗਾ ਜਦੋਂ ਤੱਕ ਉਨ੍ਹਾਂ ਦੇ ਅਹੁਦੇ ਨਾਲ ਸਬੰਧਤ ਚਿੱਠੀ ਜਾਰੀ ਨਹੀਂ ਹੁੰਦੀ। ਇਸ ਤੋਂ ਇਲਾਵਾ ਫਰੀਲੈਂਡ ਐਨਵਾਇਰਮੈਂਟ ਤੇ ਅਰਥਚਾਰੇ ਬਾਰੇ ਕੈਬਨਿਟ ਕਮੇਟੀ ਦੀ ਚੇਅਰ ਵੀ ਹੋਵੇਗੀ ਤੇ ਏਜੰਡਿਆਂ, ਨਤੀਜਿਆਂ ਤੇ ਕਮਿਊਨਿਕੇਸ਼ਨਜ਼ ਬਾਰੇ ਕੈਬਨਿਟ ਕਮੇਟੀ ਦੀ ਵਾਈਸ ਚੇਅਰ ਵੀ ਹੋਵੇਗੀ।