-ਅਜੈ ਕੁਮਾਰ
ਬੀਤੇ ਦਿਨੀਂ ਵਿਸ਼ਵ ਪੱਧਰੀ ਸਮਾਜ ਸੇਵੀ ਸੰਸਥਾ ਖਾਓ ਪੀਓ ਨੈਸ਼ਨਲ ਫਰੰਟ ਦੇ ਸੱਦੇ 'ਤੇ ਇੱਕ ਹੰਗਾਮੀ ਮਹੱਤਵ ਪੂਰਨ ਮਹਾਂ ਦਲਿੱਦਰ ਪੰਚਾਇਤ ਬੋਹੜ ਵਾਲੇ ਚੌਕ, ਗੋਪਾਲ ਨਗਰ, ਜਲੰਧਰ ਸ਼ਹਿਰ ਵਿਖੇ ਹੋਈ ਤਾਂ ਇਸ ਵਿੱਚ ਦੁਨੀਆ ਭਰ ਤੋਂ ਆਏ ਅਤਿ ਦਲਿੱਦਰ ਮਹਾਂਪੁਰਸ਼ਾਂ ਅਤੇ ਨਾਮੀ ਚੁਗਲਖੋਰਾਂ ਨੇ ਹਿੱਸਾ ਲਿਆ। ਇਨ੍ਹਾਂ 'ਚ ਪ੍ਰਮੁੱਖ ਤੌਰ ਉਤੇ ਵਿਆਹ ਵਾਲੇ ਜੋੜਿਆਂ 'ਚ ਆਪਸੀ ਝਗੜਾ ਪੈ ਜਾਣ 'ਤੇ ਉਸ ਨੂੰ ਹੋਰ ਤੇਜ਼ੀ ਨਾਲ ਵਧਾਉਣ ਵਾਲੇ ਸੂਝਵਾਨ, ਅੜੀਅਲ, ਸੜੀਅਲ, ਖਚਰੇ, ਨਿੱਕੀ ਜਿਹੀ ਗੱਲ ਨੂੰ ਪਹਾੜ ਬਣਾ ਕੇ ਦੱਸਣ ਵਾਲੇ, ਹਰ ਵੇਲੇ ਲੜਾਈ ਪੁਆਉਣ ਵਾਲੇ, ਬਲਦੀ ਅੱਗ ਵਿੱਚ ਤੇਲ ਪਾਉਣ ਵਾਲੇ, ਚੁਗਲੀ ਦੇ ਦੀਵਾਨੇ, ਬਿਨਾਂ ਮਤਲਬ ਤੋਂ ਹਰ ਕੰਮ 'ਚ ਟੰਗ ਅੜਾਉਣ ਵਾਲੇ, ਬਣਦੀ ਗੱਲ ਨੂੰ ਵਿਗਾੜਨ ਵਾਲੇ, ਕਿਚਕਿਚ ਪਾਉਣ ਵਾਲੇ, ਅਵਾਗੌਣ ਸ਼ੌਰ ਸ਼ਰਾਬਾ ਕਰਨ ਵਾਲੇ, ਹਰ ਇੱਕ ਤੋਂ ਪੈਸੇ ਲੈ ਕੇ ਮੁਕਰਨ ਵਾਲੇ, ਕਮੇਟੀਆਂ ਪਾ ਕੇ ਪਹਿਲੀ ਕਮੇਟੀ ਚੁੱਕ ਕੇ ਸ਼ਹਿਰ ਛੱਡ ਜਾਣ ਵਾਲੇ, ਥਾਈਂ-ਥਾਈਂ ਕਮੇਟੀ ਪਾ ਕੇ ਚੁੱਕ ਕੇ ਨਾ ਦੇਣ ਵਾਲੇ, ਕਿੱਟੀ ਦੀ ਹਰ ਬੋਲੀ ਉੱਤੇ ਖਾਣ ਪੀਣ ਲਈ ਆਪਣੇ ਆਪਣੇ ਪੰਜ-ਸੱਤ ਸਾਥੀ ਲੈ ਕੇ ਜਾਣ ਵਾਲੇ, ਅਜਿਹੇ ਸੂਝਵਾਨ ਅਤੇ ਭਲੇਮਾਮਸ ਲੋਕਾਂ ਨੇ ਭਾਰੀ ਗਿਣਤੀ ਵਿੱਚ ਹਾਜ਼ਰੀ ਭਰੀ। ਇਸ ਮਹਾਂ ਦਲਿੱਦਰ ਪੰਚਾਇਤ 'ਚ ਕਈ ਮਹੱਤਵ ਪੂਰਨ ਮਤਿਆਂ ਤੋਂ ਬਿਨਾ ਮੁੱਖ ਰੂਪ ਵਿੱਚ ਹੇਠ ਲਿਖੇ ਮਤੇ ਸਰਬ ਸੰਮਤੀ ਨਾਲ ਪਾਸ ਹੋ ਗਏ ਜਿਵੇਂ ਦਾਜ ਨੂੰ ਕਲੰਕ ਸਮਝਣ ਵਾਲੇ ਲੋਕਾਂ ਦੇ ਖਿਲਾਫ ਸਖਤ ਐਕਸ਼ਨ ਲੈਣਾ, ਆਬਾਦੀ ਕੰਟਰੋਲ ਕਰਨ ਦਾ ਨਾਅਰਾ ਦੇਣ ਵਾਲੇ ਲੋਕਾਂ ਨੂੰ ਮੁੂੰਹ ਤੋੜ ਜਵਾਬ ਦੇਣਾ, ਹਮ ਦੋ ਹਮਾਰੇ ਸੌ ਨੂੰ ਧਿਆਨ 'ਚ ਰੱਖਦੇ ਹੋਏ ਯੋਜਨਾਬੱਧ ਤਰੀਕੇ ਨਾਲ ਤੇਜ਼ੀ ਨਾਲ ਕੰਮ ਕਰਨਾ, ਬਿਨਾਂ ਕੁਝ ਲਏ-ਦਿੱਤੇ ਝਟਪਟ ਲੜਾਈ ਮੁਕਾਉਣ ਵਾਲੀ ਪੰਚਾਇਤ ਅਤੇ ਉਸ ਦੇ ਮੈਂਬਰਾਂ ਨੂੰ ਫੌਰੀ ਤੌਰ 'ਤੇ ਡਿਸਮਿਸ ਕਰਨ ਦੀ ਮੁਹਿੰਮ ਤੇਜ਼ੀ ਨਾਲ ਚਲਾਉਣ, ਬਿਨਾਂ ਵਜ੍ਹਾ ਗੁਆਂਢੀਆਂ ਦੇ ਘਰ ਝਾਤੀਆਂ ਮਾਰਨ ਵਾਲੇ ਤੇ ਬਿਨਾਂ ਮੰਗੇ ਸਲਾਹ ਦੇਣ ਵਾਲੇ ਲੋਕਾਂ ਨੂੰ ਮੁਫਤ ਬੱਸਾਂ ਅਤੇ ਰੇਲ ਗੱਡੀਆਂ ਦਾ ਸਫਰ ਕਰਾਉਣ ਲਈ ਟੱਬਰ ਤੇ ਮਿੱਤਰ ਮੰਡਲੀ ਸਮੇਤ ਪਾਸ ਬਣਵਾ ਕੇ ਦੇਣ, ਚੁਗਲਖੋਰਾਂ ਨੂੰ ਜੀਭ ਘਸਾਈ ਭੱਤਾ ਦੇਣ ਅਤੇ ਇਸ ਦੇ ਨਾਲ ਖਾਸ ਤੌਰ 'ਤੇ ਕੌਲੀ ਚੱਟ ਵਿਹਲੜ ਪ੍ਰਧਾਨਾਂ ਤੇ ਗੱਲੀਂ-ਬਾਤੀਂ ਬਦਮਾਸ਼ਾਂ ਦੀਆਂ ਕਹਾਣੀਆਂ ਸੁਣਾ ਕੇ ਮੁਹੱਲਿਆਂ ਵਿੱਚ ਬਣੇ ਉਸਤਾਦਾਂ ਨੂੰ ਉਨ੍ਹਾਂ ਦੇ ਇਲਾਕੇ ਵੱਚ ਹੁੰਦੇ ਹਰ ਸਰਕਾਰੀ ਕੰਮ 'ਚੋਂ 25 ਫੀਸਦੀ ਕਮਿਸ਼ਨ ਦੇਣਾ ਆਦਿ। ਇਸ ਇਤਿਹਾਸਕ ਤੇ ਸ਼ਾਨਦਾਰ ਮੌਕੇ 'ਤੇ ਵਿਜੇ ਜ਼ਾਲਮ ਅਤੇ ਸੁਦੇਸ਼ ਡਰਪੋਕ ਵੱਲੋਂ ਸਾਂਝੇ ਰੂਪ ਵਿੱਚ ਲਿਖੀ ਗਈ ਸ਼ਰਾਬ ਪੀ ਕੇ ਜਨਾਨੀ ਤੋਂ ਬਚਣ ਲਈ 11 ਹਜ਼ਾਰੇ ਬਹਾਨੇ ਦੇ ਟਾਈਟਲ ਵਾਲੀ ਕਿਤਾਬ ਰਿਲੀਜ਼ ਕੀਤੀ ਗਈ।
ਇਸ ਮਹਾਂ ਦਲਿੱਦਰ ਪੰਚਾਇਤ ਵਿੱਚ ਹਰ ਜਗ੍ਹਾ ਲੱਗੇ ਲੰਗਰ ਦੀ ਭੀੜ ਦਾ ਮੋਹਰਲੀ ਕਤਾਰ ਵਿੱਚ ਹਿੱਸਾ ਬਣਨ ਵਾਲੇ ਸੱਜਣਾਂ ਨੂੰ ਤੇ ਕਈ ਦਿਨਾਂ ਦਾ ਲੰਗਰ ਪੈਕ ਕਰ ਕੇ ਘਰ ਸਟਾਕ ਰੱਖਣ ਵਾਲੇ ਬੰਦਿਆਂ ਨੂੰ ਉਚੇਰੇ ਤੌਰ 'ਤੇ ਪੰਜ-ਪੰਜ ਕਿਲੋ ਰੇਤਾ ਦੇ ਕੇ ਸਨਮਾਨਤ ਕੀਤਾ ਗਿਆ। ਇਸ ਮਹਾ ਦਲਿੱਦਰ ਪੰਚਾਇਤ 'ਚ ਹੋਰਨਾਂ ਤੋਂ ਇਲਾਵਾ ਮਧੂ ਖੂਬਸੂਰਤ, ਸਾਹਿਲ ਸ਼ਾਂਤ, ਸਾਹਿਬ ਫਾਈਟਰ , ਅਮਨ ਸਿਰਫਿਰੀ, ਰੇਖਾ ਵਿਹਲੀ, ਸੰਨੀ ਸ਼ਾਂਤ, ਮੋਨਿਕਾ ਦਲੇਰ, ਰਜਨੀ ਕਠੋਰ, ਬੰਸੋ ਚੁਗਲਖੋਰ, ਕੰਮੋ ਲਾਲਚੀ, ਸੋਨੂੰ ਪ੍ਰੇਮੀ, ਪਿੰਕਾ ਦਿਮਾਗੀ, ਓਮੀ ਗਿੱਠਾ, ਨੰਨਾ ਫੁਕਰਾ, ਸ਼ਸ਼ੀ ਬਲੈਕਮੇਲਰ, ਅਜੈ ਮੂਰਖ, ਬੰਟੂ ਚੁਸਤ ਰਾਜਨ ਠੀਕ ਠਾਕ, ਰਿੰਕੂ ਸ਼ਾਇਰ, ਤਰਸੇਮ ਜ਼ਖਮੀ, ਲੱਭਾ ਕਾਇਰ, ਨੀਲਮ ਦੁਖੀ, ਬੰਟੀ ਸੁਖੀ ਤੇ ਦੇਸ ਰਾਜ ਵੱਡੇ ਸਿਰ ਵਾਲਾ ਮੌਜੂਦ ਸਨ।