ਓਟਵਾ, 14 ਨਵੰਬਰ (ਪੋਸਟ ਬਿਊਰੋ) : ਐਨਡੀਪੀ ਆਗੂ ਜਗਮੀਤ ਸਿੰਘ ਵੱਲੋਂ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਦੋ ਰਾਹ ਸੁਝਾਏ ਗਏ ਹਨ ਜਾਂ ਤਾਂ ਐਨਡੀਪੀ ਨਾਲ ਸਾਂਝ ਪਾ ਲੈਣ ਤੇ ਜਾਂ ਫਿਰ ਕੰਜ਼ਰਵੇਟਿਵਾਂ ਨਾਲ ਰਲ ਕੇ ਕੰਮ ਕਰ ਲੈਣ। ਜਗਮੀਤ ਸਿੰਘ ਦਾ ਕਹਿਣਾ ਹੈ ਕਿ ਟਰੂਡੋ ਦੋਵਾਂ ਬੇੜਿਆਂ ਵਿੱਚ ਸਵਾਰ ਨਹੀਂ ਹੋ ਸਕਦੇ।
ਜਿ਼ਕਰਯੋਗ ਹੈ ਕਿ ਘੱਟਗਿਣਤੀ ਲਿਬਰਲ ਸਰਕਾਰ ਬਣਨ ਕਾਰਨ ਟਰੂਡੋ ਨੂੰ ਅਹਿਮ ਬਿੱਲਾਂ ਬਾਰੇ ਫੈਸਲਾ ਲੈਣ ਲਈ ਵਿਰੋਧੀ ਧਿਰਾਂ ਤੋਂ ਸਮਰਥਨ ਦੀ ਤਾਕ ਰੱਖਣੀ ਹੋਵੇਗੀ। ਜਗਮੀਤ ਸਿੰਘ ਨੇ ਆਖਿਆ ਕਿ ਪ੍ਰਧਾਨ ਮੰਤਰੀ ਟਰੂਡੋ ਕੋਲ ਅਜੇ ਵੀ ਚੋਣ ਕਰਨ ਦਾ ਸਮਾਂ ਹੈ, ਉਹ ਜਾਂ ਤਾਂ ਕੰਜ਼ਰਵੇਟਿਵਾਂ ਤੋਂ ਸਮਰਥਨ ਹਾਸਲ ਕਰ ਲੈਣ ਤੇ ਜਾਂ ਫਿਰ ਸਾਡੇ ਤੋਂ ਸਹਿਯੋਗ ਹਾਸਲ ਕਰਨ। ਉਨ੍ਹਾਂ ਆਖਿਆ ਕਿ ਜੇ ਉਹ ਅਜਿਹਾ ਬਿੱਲ ਪਾਸ ਕਰਵਾਉਣਾ ਚਾਹੁੰਦੇ ਹਨ ਜਿਹੜਾ ਪ੍ਰੋਗਰੈਸਿਵ ਹੈ ਤੇ ਜਿਸ ਨਾਲ ਸਾਰੇ ਕੈਨੇਡੀਅਨਾਂ ਨੂੰ ਫਾਇਦਾ ਹੋਵੇਗਾ ਤਾਂ ਉਨ੍ਹਾਂ ਨੂੰ ਨਿਊ ਡੈਮੋਕ੍ਰੈਟਸ ਨਾਲ ਰਲ ਕੇ ਕੰਮ ਕਰਨਾ ਹੋਵੇਗਾ।
ਹਾਲਾਂਕਿ ਜਗਮੀਤ ਸਿੰਘ ਅਨੁਸਾਰ ਟਰੂਡੋ ਐਨਡੀਪੀ ਤੇ ਕੰਜ਼ਰਵੇਟਿਵਾਂ ਤੋਂ ਸਮਰਥਨ ਹਾਸਲ ਕਰਨਾ ਚਾਹੁਣਗੇ ਪਰ ਇੱਥੇ ਇਹ ਨਹੀਂ ਭੁੱਲਣਾ ਚਾਹੀਦਾ ਕਿ ਬਲਾਕ ਕਿਊਬਿਕੁਆ ਕੋਲ ਤੀਜੀ ਪਾਰਟੀ ਦਾ ਸਟੇਟਸ ਹੈ। ਜਗਮੀਤ ਸਿੰਘ ਨੇ ਆਖਿਆ ਕਿ ਬਲਾਕ ਕਿਊਬਿਕੁਆ ਦੇ ਆਗੂ ਯਵੇਸ ਫਰੈਂਕੌਇਸ ਬਲਾਂਸ਼ੇ ਇਹ ਸਪਸ਼ਟ ਕਰ ਚੁੱਕੇ ਹਨ ਕਿ ਉਹ ਸਿਰਫ ਅਜਿਹੀਆਂ ਨੀਤੀਆਂ ਨੂੰ ਅੱਗੇ ਵਧਾਉਣ ਲਈ ਕੰਮ ਕਰਨਗੇ ਜਿਨ੍ਹਾਂ ਨਾਲ ਸਾਰੇ ਦੇਸ਼ ਨੂੰ ਨਹੀਂ ਸਗੋਂ ਸਿਰਫ ਕਿਊਬਿਕ ਨੂੰ ਫਾਇਦਾ ਹੋਵੇਗਾ।
ਜਗਮੀਤ ਸਿੰਘ ਨੇ ਵੀਰਵਾਰ ਸਵੇਰੇ ਟਰੂਡੋ ਨਾਲ ਮੁਲਾਕਾਤ ਕੀਤੀ। ਟਰੂਡੋ 5 ਦਸੰਬਰ ਨੂੰ ਪਾਰਲੀਆਮੈਂਟ ਦੀ ਕਾਰਵਾਈ ਸ਼ੁਰੂ ਹੋਣ ਤੋਂ ਪਹਿਲਾਂ ਵਿਰੋਧੀ ਧਿਰ ਦੇ ਆਗੂਆਂ ਨਾਲ ਮੁਲਾਕਾਤ ਕਰ ਰਹੇ ਹਨ। ਜਗਮੀਤ ਸਿੰਘ ਨੇ ਟਰੂਡੋ ਨਾਲ ਮੁਲਾਕਾਤ ਤੋਂ ਬਾਅਦ ਇੱਕ ਇੰਟਰਵਿਊ ਵਿੱਚ ਆਖਿਆ ਕਿ ਦੋਵਾਂ ਨੇ ਕਲਾਈਮੇਟ ਚੇਂਜ, ਯੂਨੀਵਰਸਲ ਫਾਰਮਾਕੇਅਰ, ਪਬਲਿਕ ਡੈਂਟਲ ਕਵਰੇਜ ਤੇ ਮੂਲਵਾਸੀਆਂ ਨਾਲ ਸੁਲ੍ਹਾ ਵਰਗੇ ਮੁੱਦਿਆਂ ਉੱਤੇ ਸਾਂਝੇ ਪ੍ਰੋਗਰੈਸਿਵ ਨਜ਼ਰੀਏ ਬਾਰੇ ਵਿਚਾਰ ਵਟਾਂਦਰਾ ਕੀਤਾ। ਉਨ੍ਹਾਂ ਇਹ ਵੀ ਆਖਿਆ ਕਿ ਉਹ ਕੋਈ ਅਲਟੀਮੇਟਮ ਨਹੀਂ ਦੇ ਰਹੇ ਹਨ ਪਰ ਉਹ ਤਾਂ ਇਹੋ ਆਖਣਾ ਚਾਹੁੰਦੇ ਹਨ ਕਿ ਜੇ ਉਨ੍ਹਾਂ ਦੀ ਪਾਰਟੀ ਦੀਆਂ ਮੰਗਾਂ ਨੂੰ ਧਿਆਨ ਵਿੱਚ ਨਾ ਰੱਖਿਆ ਗਿਆ ਤਾਂ ਉਹ ਰਾਜ ਭਾਸ਼ਣ ਦੇ ਉਲਟ ਵੋਟ ਕਰਨਗੇ।