ਓਟਵਾ, 11 ਨਵੰਬਰ (ਪੋਸਟ ਬਿਊਰੋ) : ਸਾਬਕਾ ਕੰਜ਼ਰਵੇਟਿਵ ਕੈਬਨਿਟ ਮੰਤਰੀ ਪੀਟਰ ਮੈਕੇਅ ਦਾ ਕਹਿਣਾ ਹੈ ਕਿ ਜਦੋਂ ਐਂਡਰਿਊ ਸ਼ੀਅਰ ਨੂੰ ਪਾਰਟੀ ਆਗੂ ਬਣਾਈ ਰੱਖਣ ਦੀ ਗੱਲ ਆਉਂਦੀ ਹੈ ਤਾਂ ਉਹ ਸ਼ੀਅਰ ਦਾ ਸਾਥ ਦੇਣ ਲਈ ਤਿਆਰ ਹਨ।
ਵਾਸਿ਼ੰਗਟਨ ਵਿੱਚ ਵਿਲਸਨ ਸੈਂਟਰ ਦੇ ਥਿੰਕ ਟੈਂਕ ਪੈਨਲ ਨੂੰ ਅਜੇ ਦੋ ਹਫਤੇ ਤੋਂ ਵੀ ਘੱਟ ਸਮੇਂ ਪਹਿਲਾਂ ਮੈਕੇਅ ਨੇ ਇਹ ਬਿਆਨ ਦਿੱਤਾ ਸੀ ਕਿ ਸ਼ੀਅਰ ਦੀ ਅਗਵਾਈ ਵਿੱਚ 2019 ਦੀਆਂ ਚੋਣਾਂ ਵਿੱਚ ਕੰਜ਼ਰਵੇਟਿਵਾਂ ਨੂੰ ਮਿਲੀ ਹਾਰ ਬਹੁਤ ਮੰਦਭਾਗੀ ਸੀ ਤੇ ਸ਼ੀਅਰ ਇਸ ਮੌਕੇ ਨੂੰ ਭੁਨਾ ਨਹੀਂ ਸਕੇ। ਇੱਥੇ ਦੱਸਣਾ ਬਣਦਾ ਹੈ ਕਿ ਮੈਕੇਅ ਦਾ ਆਪਣਾ ਨਾਂ ਵੀ ਪਾਰਟੀ ਲੀਡਰਸਿ਼ਪ ਵਾਸਤੇ ਅੱਗੇ ਆਇਆ ਸੀ ਪਰ ਉਨ੍ਹਾਂ ਇੱਕ ਇੰਟਰਵਿਊ ਵਿੱਚ ਆਖਿਆ ਕਿ ਉਹ ਮੌਜੂਦਾ ਆਗੂ ਦਾ ਸਮਰਥਨ ਕਰਦੇ ਹਨ ਤੇ ਅਜਿਹਾ ਕਰਦੇ ਰਹਿਣਗੇ।
ਇਸ ਇੰਟਰਵਿਊ ਵਿੱਚ ਮੈਕੇਅ ਨੇ ਆਖਿਆ ਕਿ ਐਂਡਰਿਊ ਸ਼ੀਅਰ ਦੇ ਕੰਮ ਦਾ ਮੁਲਾਂਕਣ ਤਾਂ ਯਕੀਨਨ ਹੋਵੇਗਾ ਕਿਉਂਕਿ ਇਹ ਕੰਜ਼ਰਵੇਟਿਵ ਸੰਵਿਧਾਨ ਦਾ ਹਿੱਸਾ ਹੈ। ਫਿਰ ਉਹ ਮਾਮਲਾ ਸ਼ੀਅਰ ਤੇ ਮੈਂਬਰਸਿ਼ਪ ਦਰਮਿਆਨ ਹੋਵੇਗਾ। ਉਨ੍ਹਾਂ ਆਖਿਆ ਕਿ ਉਹ ਵੀ ਉੱਥੇ ਹੀ ਹੋਣਗੇ ਤੇ ਉਹ ਵੋਟਿੰਗ ਨਹੀਂ ਕਰਨਗੇ। ਇੱਥੇ ਦੱਸਣਾ ਬਣਦਾ ਹੈ ਕਿ ਉਸੇ ਪੈਨਲ ਸਾਹਮਣੇ 30 ਅਕਤੂਬਰ ਨੂੰ ਕੀਤੀਆਂ ਗਈਆਂ ਹੋਰਨਾਂ ਟਿੱਪਣੀਆਂ ਤੋਂ ਵੀ ਮੈਕੇਅ ਪਲਟੀ ਮਾਰ ਗਏ। ਮੈਕੇਅ ਨੇ ਇਹ ਵੀ ਆਖਿਆ ਸੀ ਕਿ ਗਰਭਪਾਤ ਤੇ ਸਮਲਿੰਗੀ ਵਿਆਹਾਂ ਦਾ ਮੁੱਦਾ ਵੀ ਸ਼ੀਅਰ ਦੇ ਗਲ ਵਿੱਚ ਮਰੇ ਹੋਏ ਸੱਪ ਵਾਂਗ ਪਿਆ ਹੋਇਆ ਹੈ।
ਸੋਮਵਾਰ ਨੂੰ ਦਿੱਤੀ ਇਸ ਇੰਟਰਵਿਊ ਵਿੱਚ ਮੈਕੇਅ ਨੇ ਆਖਿਆ ਕਿ ਉਹ ਟਿੱਪਣੀਆਂ ਉਨ੍ਹਾਂ ਮੁੱਦਿਆਂ ਦੇ ਸਬੰਧ ਵਿੱਚ ਸ਼ੀਅਰ ਦੀ ਸਥਿਤੀ ਉੱਤੇ ਕੇਂਦਰਿਤ ਨਹੀਂ ਸਨ। ਉਨ੍ਹਾਂ ਆਖਿਆ ਕਿ ਉਹ ਤਾਂ ਚੋਣ ਕਾਰਗੁਜ਼ਾਰੀ ਲਈ ਕੀਤੀਆਂ ਗਈਆਂ ਸਨ। ਉਨ੍ਹਾਂ ਆਖਿਆ ਕਿ ਉਸ ਮੌਕੇ ਸੱਭਨਾਂ ਦੀ ਗੱਲ ਕੀਤੀ ਗਈ ਸੀ। ਉਨ੍ਹਾਂ ਆਖਿਆ ਕਿ ਮਰੇ ਹੋਏ ਸੱਪ ਦੇ ਗਲ ਪਏ ਹੋਣ ਦੀ ਗੱਲ ਮੀਡੀਆ ਵੱਲੋਂ ਆਪੇ ਲਾਈ ਗਈ ਸੀ ਤੇ ਵਿਰੋਧੀ ਧਿਰ ਵੱਲੋਂ ਸ਼ੀਅਰ ਦੀ ਕਾਰਗੁਜ਼ਾਰੀ ਬਾਰੇ ਜਾਣਬੁੱਝ ਕੇ ਲਵਾਈ ਗਈ ਸੀ।
ਸਮਲਿੰਗੀ ਵਿਆਹਾਂ ਬਾਰੇ ਸ਼ੀਅਰ ਦੀਆਂ ਨਿਜੀ ਮਾਨਤਾਵਾਂ ਬਾਰੇ ਮੈਕੇਅ ਇਹ ਨਹੀਂ ਦੱਸ ਸਕੇ ਕਿ ਸ਼ੀਅਰ ਇਸ ਬਾਰੇ ਕੋਈ ਸਪਸ਼ਟ ਰਾਇ ਕਿਉਂ ਨਹੀਂ ਰੱਖਦੇ। ਜਦੋਂ ਮਨੁੱਖੀ ਅਧਿਕਾਰਾਂ ਦੀ ਰਾਖੀ ਦੀ ਗੱਲ ਆਈ ਤਾਂ ਮੈਕੇਅ ਸ਼ੀਅਰ ਤੇ ਪਾਰਟੀ ਦੇ ਇਸ ਸਬੰਧੀ ਰਿਕਾਰਡ ਦਾ ਪੱਖ ਪੂਰਦੇ ਨਜ਼ਰ ਆਏ।