ਮਸਕਟ, 18 ਜੁਲਾਈ (ਪੋਸਟ ਬਿਊਰੋ): ਓਮਾਨ ਨੇੜੇ ਸਮੁੰਦਰ ਵਿੱਚ ਇੱਕ ਤੇਲ ਟੈਂਕਰ ਪਲਟ ਗਿਆ। ਇਸ ਦੇ 9 ਕਰੂ ਮੈਂਬਰਾਂ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ ਹੈ। ਇਨ੍ਹਾਂ ਵਿੱਚੋਂ 8 ਭਾਰਤੀ ਹਨ। ਬਚਾਇਆ ਗਿਆ ਇੱਕ ਹੋਰ ਨਾਗਰਿਕ ਸ੍ਰੀਲੰਕਾ ਦਾ ਹੈ।
ਜਹਾਜ਼ 'ਚ ਕੁੱਲ 16 ਲੋਕ ਸਵਾਰ ਸਨ, ਜਿਨ੍ਹਾਂ 'ਚੋਂ 7 ਹਾਲੇ ਵੀ ਲਾਪਤਾ ਹਨ। 5 ਭਾਰਤੀਆਂ ਅਤੇ 2 ਸ਼੍ਰੀਲੰਕਾਈ ਨਾਗਰਿਕਾਂ ਦੀ ਭਾਲ ਹਾਲੇ ਵੀ ਜਾਰੀ ਹੈ।
ਜਾਣਕਾਰੀ ਮੁਤਾਬਕ ਪ੍ਰੇਸਟੀਜ ਫਾਲਕਨ ਨਾਂ ਦਾ ਤੇਲ ਟੈਂਕਰ ਦੁਬਈ ਦੇ ਹਮਰੀਆ ਬੰਦਰਗਾਹ ਤੋਂ ਰਵਾਨਾ ਹੋਇਆ ਸੀ। ਇਸ ਉੱਤੇ ਕੋਮੋਰੋਸ ਦਾ ਝੰਡਾ ਲਗਾਇਆ ਗਿਆ ਸੀ। ਇਹ ਯਮਨ ਦੇ ਅਦਨ ਬੰਦਰਗਾਹ ਜਾ ਰਿਹਾ ਸੀ। ਤੇਲ ਟੈਂਕਰ ਸੋਮਵਾਰ ਨੂੰ ਡੂਕਮ ਦੇ ਬੰਦਰਗਾਹ ਸ਼ਹਿਰ ਨੇੜੇ ਰਾਸ ਮਦਰਕਾਹ ਤੋਂ ਲਗਭਗ 46 ਕਿਲੋਮੀਟਰ ਦੱਖਣ-ਪੂਰਬ ਵਿਚ ਪਲਟ ਗਿਆ।
ਓਮਾਨ ਦੇ ਸਮੁੰਦਰੀ ਸੁਰੱਖਿਆ ਕੇਂਦਰ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਓਮਾਨ ਵਿੱਚ ਤੇਲ ਟੈਂਕਰ ਦੇ ਡੁੱਬਣ ਦੀ ਸੂਚਨਾ ਮਿਲਦੇ ਹੀ ਭਾਰਤੀ ਜਲ ਸੈਨਾ ਨੇ ਜੰਗੀ ਬੇੜੇ ਆਈਐੱਨਐੱਸ ਤੇਗ ਅਤੇ ਜਹਾਜ਼ ਪੀ-8ਆਈ ਨੂੰ ਰਾਹਤ ਅਤੇ ਬਚਾਅ ਕਾਰਜਾਂ ਲਈ ਭੇਜਿਆ।
ਓਮਾਨੀ ਦੇ ਜਹਾਜ਼ਾਂ ਦੇ ਨਾਲ ਇਹ ਜੰਗੀ ਬੇੜੇ ਅਦਨ ਬੰਦਰਗਾਹ ਨੇੜੇ ਸਰਚ ਮੁਹਿੰਮ 'ਚ ਲੱਗੇ ਹੋਏ ਹਨ।