-ਮੈਂਬਰ ਪੰਚਾਇਤ ਤੋਂ ਮੈਂਬਰ ਪਾਰਲੀਮੈਂਟ ਤੱਕ ਤਿੰਨ ਵਾਰ ਤੋਂ ਵੱਧ ਨਾ ਚੋਣ ਲੜ ਸਕੇ ਕੋਈ ਵੀ ਉਮੀਦਵਾਰ : ਬਾਵਾ
-ਲੋੜ ਹੈ ਅਸੀਂ ਵੀ ਅਮਰੀਕਾ ਦਾ ਚੋਣ ਸਿਸਟਮ ਦੀ ਨਕਲ ਕਰੀਏ ਤਦ ਹੀ ਸ਼ਹੀਦਾਂ ਦੇ ਸੁਪਨੇ ਸਾਕਾਰ ਹੋਣਗੇ
ਮੁੱਲਾਂਪੁਰ ਦਾਖਾ, 2 ਜੁਲਾਈ (ਪੋਸਟ ਬਿਊਰੋ): ਅੱਜ ਦੇਸ਼ ਭਗਤ ਯਾਦਗਾਰੀ ਸੁਸਾਇਟੀ ਪੰਜਾਬ ਦੇ ਪ੍ਰਧਾਨ ਕ੍ਰਿਸ਼ਨ ਕੁਮਾਰ ਬਾਵਾ ਦੇ ਨਾਲ ਉੱਤਰ ਪ੍ਰਦੇਸ਼ ਅਤੇ ਪੰਜਾਬ ਤੋਂ ਆਏ ਵੱਖ-ਵੱਖ ਵਰਗਾਂ ਦੇ ਲੋਕਾਂ ਨਾਲ ਵਿਚਾਰ ਕਰਨ ਤੋਂ ਬਾਅਦ ਇਹ ਵਿਚਾਰ ਸਾਹਮਣੇ ਆਇਆ ਕਿ ਮਹਿੰਗੇ ਮੁੱਲ ਮਿਲੀ ਆਜ਼ਾਦੀ ਨੂੰ ਸਾਡਾ ਸਿਆਸੀ ਸਿਸਟਮ ਬਰਬਾਦੀ ਵੱਲ ਲਿਜਾ ਰਿਹਾ ਹੈ। ਉਹਨਾਂ ਕਿਹਾ ਕਿ ਮਹਾਨ ਦੇਸ਼ ਭਗਤਾਂ ਨੇ ਫਾਂਸੀ ਦੇ ਰੱਸੇ ਇਸ ਲਈ ਨਹੀਂ ਚੁੰਮੇ ਕਿ ਕੁਝ ਪਰਿਵਾਰ ਹੀ ਕੁੰਡਲੀਆਂ ਮਾਰ ਕੇ (ਸੱਪਾਂ ਦੀ ਤਰ੍ਹਾਂ) ਵਿਧਾਨ ਸਭਾ, ਪਾਰਲੀਮੈਂਟ ਅਤੇ ਬਾਕੀ ਚੋਣ ਅਦਾਰਿਆਂ 'ਤੇ ਕਾਬਜ਼ ਹੋਏ ਰਹਿਣ। ਇਸ ਸਮੇਂ ਹਾਜ਼ਰ ਜਸਪਾਲ ਦਾਸ ਬਾਵਾ, ਸੁਭਾਸ਼ ਬਾਵਾ, ਤਰਲੋਚਨ ਬਾਵਾ, ਜੁਗਰਾਜ ਸ਼ਹਿਣਾ, ਬਲਵੀਰ ਬਾਵਾ, ਸਤਬੀਰ ਬਾਵਾ, ਪ੍ਰੀਤਮ ਸਿੰਘ, ਹਰਜਿੰਦਰ ਸਿੰਘ, ਵਿਸ਼ਵਪ੍ਰੀਤ ਬਾਵਾ, ਐਡਵੋਕੇਟ ਸੁਰਿੰਦਰ ਬਾਵਾ, ਸੀਮਾ ਬਾਵਾ, ਗੁਰਜੰਟ ਬਾਵਾ, ਪਰਮਜੀਤ ਬਾਵਾ ਅਤੇ ਅਮਰਜੀਤ ਬਾਵਾ ਨੇ ਸਾਂਝੇ ਤੌਰ ਤੇ ਕਿਹਾ ਕਿ ਮੈਂਬਰ ਪੰਚਾਇਤ ਤੋਂ ਲੈ ਕੇ ਮੈਂਬਰ ਪਾਰਲੀਮੈਂਟ ਅਤੇ ਹੋਰ ਚੋਣ ਅਦਾਰਿਆਂ ਵਿੱਚ ਤਿੰਨ ਵਾਰ ਤੋਂ ਵੱਧ ਸੂਬਾ ਚੋਣ ਕਮਿਸ਼ਨ ਅਤੇ ਭਾਰਤ ਦਾ ਚੋਣ ਕਮਿਸ਼ਨ ਚੋਣ ਲੜਨ ਦਾ ਮੌਕਾ ਨਾ ਦੇਵੇ। ਉਮੀਦਵਾਰ ਜਿੱਤੇ ਜਾਂ ਹਾਰੇ ਕੋਈ ਸ਼ਰਤ ਨਾ ਹੋਵੇ।
ਬਾਵਾ ਨੇ ਕਿਹਾ ਕਿ ਪਹਿਲਾਂ ਆਮ ਕੋਈ ਵੀ ਨੇਤਾ ਵਿਧਾਇਕ ਜਾਂ ਮੈਂਬਰ ਪਾਰਲੀਮੈਂਟ ਬਣਦਾ ਹੈ ਫਿਰ ਉਹ ਚਾਰ-ਪੰਜ ਵਾਰ ਇਲੈਕਸ਼ਨ ਲੜ ਕੇ ਆਪਣੇ ਬੇਟੇ ਜਾਂ ਸੁਪਤਨੀ ਨੂੰ ਚੋਣ ਲੜਾ ਦਿੰਦਾ ਹੈ ਜੋ ਸਿਆਸੀ ਖੇਤਰ ਨਾਲ ਜੁੜੇ ਹਰ ਉਸ ਵਰਕਰ ਨਾਲ ਅੰਨਿਆ ਹੈ, ਜਿਸ ਦਾ ਬਾਪ ਨੇਤਾ ਨਹੀਂ। ਦੇਖਿਆ ਜਾਂਦਾ ਹੈ ਕਿ ਅਪਰਾਧਿਕ ਪਿਛੋਕੜ ਵਾਲੇ ਨੇਤਾਵਾਂ ਨੂੰ ਸਿਆਸੀ ਪਾਰਟੀਆਂ ਟਿਕਟਾਂ ਦੇ ਕੇ ਜਿਆਦਾ ਮਾਣ ਬਖਸ਼ਦੀਆਂ ਹਨ। ਇਸ ਲਈ ਹੀ ਆਮ ਲੋਕਾਂ ਦਾ ਭਾਰਤ ਦੀ ਚੋਣ ਪ੍ਰਕਿਰਿਆ ਤੋਂ ਵਿਸ਼ਵਾਸ਼ ਉੱਠਦਾ ਜਾ ਰਿਹਾ ਹੈ।
ਉਹਨਾਂ ਕਿਹਾ ਕਿ ਅਸੀਂ ਅਮਰੀਕਾ ਦੇ ਚੋਣ ਸਿਸਟਮ ਨੂੰ ਸਮਝਿਆ ਜਿੱਥੇ ਦੋ ਵਾਰ ਤੋਂ ਵੱਧ ਰਾਸ਼ਟਰਪਤੀ ਨਹੀਂ ਬਣ ਸਕਦਾ। ਲੋੜ ਹੈ ਸਿਆਸੀ ਜਗੀਰਦਾਰੀ ਸਿਸਟਮ ਖਤਮ ਕੀਤਾ ਜਾਵੇ ਅਤੇ ਵੋਟਾਂ ਦੇਣ ਵਾਲੇ ਲੋਕ ਵੀ ਨਸ਼ੇ ਅਤੇ ਪੈਸਿਆਂ ਦਾ ਲਾਲਚ ਤਿਆਗ ਕੇ ਦੇਸ਼ ਭਗਤ, ਚੰਗੇ ਕਿਰਦਾਰ ਵਾਲੇ ਲੋਕਾਂ ਦੀ ਚੋਣ ਕਰਨ। ਰਾਸ਼ਟਰਪਿਤਾ ਮਹਾਤਮਾ ਗਾਂਧੀ, ਲਾਲ ਬਹਾਦਰ ਸ਼ਾਸਤਰੀ, ਡਾ. ਅਬਦੁਲ ਕਲਾਮ ਅਤੇ ਡਾ. ਮਨਮੋਹਨ ਸਿੰਘ ਦਾ ਜੀਵਨ ਵੀ ਸਾਨੂੰ ਇਸ ਖੇਤਰ ਵਿੱਚ ਰੌਸ਼ਨੀ ਦਿੰਦਾ ਹੈ ਜਿਸ ਨੂੰ ਸੋਚਣ, ਸਮਝਣ, ਵਿਚਾਰਨ ਅਤੇ ਮਨ ਅੰਦਰ ਵਸਾਉਣ ਦੀ ਲੋੜ ਹੈ। ਲੋਕਾਂ ਦਾ ਨੌਟਾ ਨੂੰ ਵੋਟ ਪਾਉਣਾ ਸਾਡੇ ਗੌਰਵਮਈ ਲੋਕਤੰਤਰ ਨੂੰ ਕਲੰਕਿਤ ਕਰਨ ਵਾਲੀ ਗੱਲ ਹੈ। ਉਹਨਾਂ ਦੱਸਿਆ ਕਿ ਦੇਸ਼ ਭਗਤ ਯਾਦਗਾਰੀ ਸੋਸਾਇਟੀ 1925 ਵਿੱਚ ਹੋਂਦ ਵਿੱਚ ਆਈ ਅਤੇ ਦੇਸ਼ ਭਗਤ ਹੀ ਇਸ ਦੇ ਅਹੁਦੇਦਾਰ ਰਹੇ ਹਨ।