* ਲੱਖਾਂ ਰੁਪਏ ਦੀ ਭਾਰਤੀ ਤੇ ਵਿਦੇਸ਼ੀ ਕਰੰਸੀ ਲੁੱਟ ਕੇ ਲੈ ਗਏ
ਜਲੰਧਰ, 24 ਅਪ੍ਰੈਲ (ਪੋਸਟ ਬਿਊਰੋ)- ਥਾਣਾ ਰਾਮਾ ਮੰਡੀ ਹੇਠਲੇ ਲੱਧੇਵਾਲੀ ਦੀ ਯੂਨੀਵਰਸਿਟੀ ਰੋਡ ਉੱਤੇ ਰੰਧਾਵਾ ਕਾਲੋਨੀ ਵਿੱਚ ਰਹਿੰਦੇ ਇੱਕ ਐਨ ਆਰ ਆਈ ਪਰਵਾਰ ਦੇ ਘਰ ਰਾਤ 1:30 ਵਜੇ ਦਾਖਲ ਹੋਏ ਤਿੰਨ ਲੁਟੇਰਿਆਂ ਨੇ ਐਨ ਆਰ ਆਈ ਨੂੰ ਗੋਲੀ ਮਾਰ ਕੇ ਗੰਭੀਰ ਜ਼ਖਮੀ ਕਰ ਦਿੱਤਾ ਅਤੇ ਲੱਖਾਂ ਰੁਪਏ ਦੀ ਭਾਰਤੀ ਤੇ ਵਿਦੇਸ਼ੀ ਕਰੰਸੀ ਲੁੱਟ ਲਈ।ਇਨ੍ਹਾਂ ਲੁਟੇਰਿਆਂ ਨੇ ਐਨ ਆਰ ਆਈ ਦੀ ਨੂੰਹ ਨੂੰ ਬੰਦੀ ਬਣਾ ਕੇ ਜਬਰੀ ਉਸ ਦੇ ਸੋਨੇ ਦੇ ਗਹਿਣੇ ਲੁਹਾ ਲਏ ਤੇ ਫਰਾਰ ਹੋ ਗਏ। ਇਸ ਬਾਰੇ ਪੁਲਸ ਜਾਂਚ ਪੜਤਾਲ ਕਰ ਰਹੀ ਹੈ।
ਗੰਭੀਰ ਜ਼ਖਮੀ ਐਨ ਆਰ ਆਈ ਮਲਕੀਤ ਸਿੰਘ ਦੀ ਪਤਨੀ ਹਰਬੰਸ ਕੌਰ ਨੇ ਦੱਸਿਆ ਕਿ ਉਹ ਦੋਵੇਂ (ਪਤੀ-ਪਤਨੀ) ਅਤੇ ਉਨ੍ਹਾਂ ਦੀ ਨੂੰਹ ਅਮਨਦੀਪ ਕੌਰ ਵੱਖ-ਵੱਖ ਕਮਰਿਆਂ ਵਿੱਚ ਸੁੱਤੇ ਪਏ ਸੀ। ਅੱਧੀ ਰਾਤ ਨੂੰ ਘਰ ਦੀ ਛੱਤ ਤੋਂ ਆਏ ਲੁਟੇਰਿਆਂ ਨੇ ਉਨ੍ਹਾਂ ਦੋਵਾਂ ਪਤੀ-ਪਤਨੀ ਨਾਲ ਧੱਕਾ-ਮੁੱਕਾ ਸ਼ੁਰੂ ਕਰ ਦਿੱਤੀ। ਉਨ੍ਹਾਂ ਦੇ ਰੌਲਾ ਪਾਉਣ ਉੱਤੇ ਉਨ੍ਹਾਂ ਦੀ ਨੂੰਹ ਅਮਨਦੀਪ ਕੌਰ ਆਪਣੇ ਕਮਰੇ ਵਿੱਚੋਂ ਬਾਹਰ ਨਿਕਲੀ ਤਾਂ ਉਸ ਨੂੰ ਲੁਟੇਰਿਆਂ ਨੇ ਬੰਦੀ ਬਣਾ ਕੇ ਉਸ ਵੱਲੋਂ ਪਹਿਨੇ ਗਹਿਣੇ, ਚੇਨੀ ਅਤੇ ਵਾਲੀਆਂ ਲੁਹਾ ਲਈਆਂ।ਵਿਰੋਧ ਕਰਨ ਉੱਤੇ ਇੱਕ ਲੁਟੇਰੇ ਨੇ ਆਪਣੀ ਪਿਸੌਤਲ ਕੱਢੀ ਅਤੇ ਮਲਕੀਤ ਸਿੰਘ ਨੂੰ ਗੋਲੀ ਮਾਰ ਦਿੱਤੀ। ਵਾਰਦਾਤ ਪਿਛੋਂ ਉਹ ਛੱਤ ਤੋਂ ਫਰਾਰ ਹੋ ਗਏ। ਫਿੰਗਰ ਪ੍ਰਿੰਟ ਮਾਹਰ ਅਤੇ ਡਾਗ ਸਕੁਐਡ ਸਮੇਤ ਕਈ ਜਾਂਚ ਟੀਮਾਂ ਵੀ ਐਨ ਆਰ ਆਈ ਮਲਕੀਤ ਸਿੰਘ ਦੇ ਘਰ ਵਿੱਚ ਜਾਂਚ ਕਰ ਰਹੀਆਂ ਹਨ।