ਕੋਟਕਪੂਰਾ, 11 ਨਵੰਬਰ (ਪੋਸਟ ਬਿਊਰੋ)- ਏਥੋਂ ਨੇੜਲੇ ਪਿੰਡ ਢਿੱਲਵਾਂ ਕਲਾਂ ਦੇ ਗੁਰਦੁਆਰਾ ਗੋਦਾਵਰੀਸਰ ਪਾਤਸ਼ਾਹੀ ਦਸਵੀਂ ਵਿਖੇ ਨਾਬਾਲਗ ਲੜਕੇ-ਲੜਕੀਆਂ ਨੇ ਨਾਟਕੀ ਢੰਗ ਨਾਲ ਇੱਕ ਵਿਆਂਹਦੜ ਜੋੜੇ ਦੇ ਆਨੰਦ ਕਾਰਜ ਮੌਕੇ ਕਰੀਬ ਤਿੰਨ ਲੱਖ ਰੁਪਿਆ ਨਕਦ ਤੇ ਸੋਨੇ ਦੇ ਗਹਿਣੇ ਚੋਰੀ ਕਰ ਲਏ। ਸਥਾਨਕ ਸਦਰ ਥਾਣੇ ਦੀ ਪੁਲਸ ਨੇ 14-15 ਸਾਲ ਅਤੇ 16-17 ਸਾਲ ਦੇ ਜਾਪਦੇ ਨਾਬਾਲਗ ਕ੍ਰਮਵਾਰ ਲੜਕੀ ਅਤੇ ਲੜਕੇ ਵਿਰੁੱਧ ਕੇਸ ਦਰਜ ਕਰ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਅਤੇ ਦੋਸ਼ੀਆਂ ਨੂੰ ਛੇਤੀ ਲੱਭ ਲੈਣ ਦਾ ਦਾਅਵਾ ਕੀਤਾ ਹੈ।
ਬੀਤੀ ਨੌਂੇ ਨਵੰਬਰ ਨੂੰ ਬਾਅਦ ਦੁਪਹਿਰ ਹੋਈ ਇਸ ਘਟਨਾ ਦੇ ਤੀਹ ਘੰਟੇ ਵਾਪਰਨ ਪਿੱਛੋਂ ਵੀ ਪੁਲਸ ਨੂੰ ਅਜੇ ਤੱਕ ਕੋਈ ਸੁਰਾਗ ਨਹੀਂ ਲੱਗਾ। ਪੀੜਤ ਪੱਖ ਦੇ ਅਨੁਸਾਰ ਉਨ੍ਹਾਂ ਦਾ 10 ਲੱਖ ਰੁਪਏ ਤੋਂ ਵੱਧ ਨੁਕਸਾਨ ਹੋ ਗਿਆ ਹੈ। ਪੁਲਸ ਨੂੰ ਦਿੱਤੇ ਬਿਆਨਾਂ ਵਿੱਚ ਨਰਿੰਦਰ ਸਿੰਘ ਵਾਸੀ ਬਠਿੰਡਾ ਨੇ ਕਿਹਾ ਕਿ ਉਸ ਦੀ ਬੇਟੀ ਰੁਪਿੰਦਰ ਕੌਰ ਦਾ ਵਿਆਹ ਪੁਸ਼ਪਿੰਦਰ ਸਿੰਘ ਪੁੱਤਰ ਕਰਮਜੀਤ ਸਿੰਘ ਭਲੂਰੀਆ ਵਾਸੀ ਕੋਟਕਪੂਰਾ ਨਾਲ ਸ਼ਹਿਨਸ਼ਾਹ ਪੈਲੇਸ ਵਿਖੇ ਹੋਇਆ ਤਾਂ ਉਹ ਰਿਸ਼ਤੇਦਾਰਾਂ ਸਮੇਤ ਗੁਰਦੁਆਰਾ ਸਾਹਿਬ ਢਿੱਲਵਾਂ ਵਿਖੇ ਆਨੰਦ ਕਾਰਜ ਕਰਾਉਣ ਚਲੇ ਗਏ। ਓਥੋਂ ਵਿਹਲੇ ਹੋਣ ਪਿੱਛੋਂ ਇੱਕ ਨਾਬਾਲਗ ਲੜਕੀ ਨੇ ਉਸ ਦੀ ਪਤਨੀ ਅੰਮ੍ਰਿਤ ਕੌਰ ਦੇ ਕੱਪੜਿਆਂ ਉੱਤੇ ਸੌਸ ਪਾ ਕੇ ਖੁਦ ਹੀ ਕਿਹਾ ਕਿ ਉਨ੍ਹਾਂ ਦੇ ਕੱਪੜੇ ਸੌਸ ਨਾਲ ਖਰਾਬ ਹੋ ਗਏ ਹਨ। ਜਦ ਉਹ ਨਕਦੀ ਤੇ ਗਹਿਣਿਆਂ ਵਾਲਾ ਪਰਸ ਰੱਖ ਕੇ ਪਿੱਛੋਂ ਆਪਣਾ ਸੂਟ ਦੇਖਣ ਲੱਗੀ ਤਾਂ ਅੱਖ ਦੇ ਫੇਰ ਨਾਲ ਉਕਤ ਲੜਕੀ ਅਤੇ ਨਾਭੀ ਸ਼ਰਟ ਵਾਲੇ ਸਿਰੋਂ ਮੋਨੇ ਲੜਕੇ ਨੇ ਉਹ ਪਰਸ ਚੁੱਕਿਆ ਅਤੇ ਫਰਾਰ ਹੋ ਗਏ। ਇਸ ਬਾਰੇ ਬਲਕਾਰ ਸਿੰਘ ਸੰਧੂ ਡੀ ਐੱਸ ਪੀ ਕੋਟਕਪੂਰਾ ਦੀ ਅਗਵਾਈ 'ਚ ਪੁੱਜੀ ਪੁਲਸ ਪਾਰਟੀ ਨੇ ਮੌਕੇ ਦਾ ਜਾਇਜ਼ਾ ਲਿਆ ਅਤੇ ਦੱਸਿਆ ਕਿ ਸੀ ਸੀ ਟੀ ਵੀ ਕੈਮਰਿਆਂ ਦੀ ਫੁਟੇਜ ਮੁਤਾਬਕ ਚੋਰੀ ਕਰਨ ਵਾਲੇ ਲੜਕਾ ਤੇ ਲੜਕੀ ਨਾਬਾਲਗ ਹਨ। ਡੀ ਐੱਸ ਪੀ ਅਨੁਸਾਰ ਚੋਰਾਂ ਦੀ ਭਾਲ ਲਈ ਹਰ ਸੰਭਵ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।