ਨਵੀਂ ਦਿੱਲੀ, 18 ਸਤੰਬਰ, (ਪੋਸਟ ਬਿਊਰੋ)- ਭਾਰਤ ਦੀ ਸਰਕਾਰੀ ਕੰਟਰੋਲ ਵਾਲੀ ਹਵਾਈ ਕੰਪਨੀ ਏਅਰ ਇੰਡੀਆ ਦੇ ਕਾਫੀ ਲੰਬੇ ਸਮੇਂ ਤੋਂ ਪੈਸਿਆਂ ਦੀ ਕਮੀ ਅਤੇ ਕਰਜ਼ ਦੇ ਬੋਝ ਵਿੱਚ ਦੱਬੀ ਹੋਣ ਦੀ ਚਰਚਾ ਚੱਲ ਰਹੀ ਸੀ। ਇਸ ਨੂੰ ਬੀਤੇ ਸਾਲ 2018-19 ਵਿੱਚ 8,400 ਕਰੋੜ ਰੁਪਏ ਘਾਟਾ ਪਿਆ ਅਤੇ ਪਤਾ ਲੱਗਾ ਹੈ ਕਿ ਜਹਾਜ਼ਾਂ ਨੂੰ ਚਲਾਉਣ ਤੇ ਉਨ੍ਹਾਂ ਦੀ ਸੰਭਾਲਅਤੇ ਵਟਾਂਦਰੇਕਾਰਨ ਵੀ ਘਾਟਾ ਝੱਲਣਾ ਪੈ ਰਿਹਾ ਹੈ। ਏਅਰ ਇੰਡੀਆ ਨੂੰ ਇੱਕ ਸਾਲ ਵਿੱਚ ਜਿੰਨਾ ਘਾਟਾ ਪਿਆ ਹੈ, ਓਨੇ ਪੈਸੇ ਨਾਲ ਇੱਕ ਨਵੀਂ ਏਅਰਲਾਈਨ ਸ਼ੁਰੂ ਕੀਤੀ ਜਾ ਸਕਦੀ ਹੈ।
ਵਰਨਣਯੋਗ ਹੈ ਕਿ ਭਾਰਤ ਵਿੱਚ ਸਫ਼ਲਤਾ ਨਾਲ ਚੱਲਦੀਆਂ ਏਅਰਲਾਈਨਜ਼ ਦੀ ਬਾਜ਼ਾਰੀ-ਪੂੰਜੀ ਮਸਾਂ 7,892 ਕਰੋੜ ਰੁਪਏ ਹੈ, ਭਾਵ ਕਿ 8,000 ਕਰੋੜ ਰੁਪਏ ਤੋਂ ਘੱਟ ਰਕਮ ਨਾਲ ਇਹ ਏਅਰਲਾਈਨਜ਼ ਖ਼ਰੀਦੀ ਜਾ ਸਕਦੀ ਹੈ। ਸਾਲ 2018-19 ਦੌਰਾਨ ਏਅਰ ਇੰਡੀਆ ਨੂੰ 4,600 ਕਰੋੜ ਰੁਪਏ ਦਾ ਆਪਰੇਟਿੰਗ ਨੁਕਸਾਨ ਹੋਇਆ ਹੈ। ਤੇਲ ਦੀਆਂ ਵਧੀਆਂ ਕੀਮਤਾਂ ਤੇ ਪਾਕਿਸਤਾਨ ਵੱਲੋਂ ਭਾਰਤੀ ਹਵਾਈ ਜਹਾਜ਼ਾਂ ਲਈ ਏਅਰ-ਸਪੇਸ ਬੰਦ ਕਰਨ ਨਾਲ ਕੰਪਨੀ ਨੂੰ ਰੋਜ਼ਾਨਾ 3 ਤੋਂ 4 ਕਰੋੜ ਰੁਪਏ ਦਾ ਘਾਟਾ ਉਠਾਉਣਾ ਪੈ ਰਿਹਾ ਹੈ।
ਏਅਰ ਇੰਡੀਆ ਦੇ ਇੱਕ ਸੀਨੀਅਰ ਅਫਸਰ ਨੇ ਖਬਰ ਏਜੰਸੀ ਨੂੰ ਦੱਸਿਆ ਕਿ ਜੂਨ ਵਿੱਚ ਖ਼ਤਮ ਹੋਈ ਤਿਮਾਹੀ ਵਿੱਚ ਸਿਰਫ਼ ਪਾਕਿਸਤਾਨੀ ਏਅਰ-ਸਪੇਸ ਬੰਦ ਹੋਣ ਨਾਲ ਏਅਰ ਇੰਡੀਆ ਨੂੰ 175 ਤੋਂ 200 ਕਰੋੜ ਰੁਪਏ ਆਪਰੇਟਿੰਗ ਨੁਕਸਾਨ ਹੋਇਆ ਹੈ। ਕੁੱਲ ਮਿਲਾ ਕੇ ਪਾਕਿਸਤਾਨੀ ਏਅਰ-ਸਪੇਸ ਬੰਦ ਹੋਣ ਪਿੱਛੋਂਸਰਕਾਰੀ ਅੰਕੜਿਆਂ ਮੁਤਾਬਕ ਬੀਤੀ 2 ਜੁਲਾਈ ਤੱਕ ਏਅਰ ਇੰਡੀਆ ਨੂੰ 491 ਕਰੋੜ ਰੁਪਏ ਦਾ ਨੁਕਸਾਨ ਹੋ ਚੁੱਕਾ ਹੈ। ਵਰਨਣਯੋਗ ਹੈ ਕਿ ਪਾਕਿਸਤਾਨ ਨੇ ਪਹਿਲਾਂ ਫ਼ਰਵਰੀ ਮਹੀਨੇ ਬਾਲਾਕੋਟ ਹਵਾਈ ਹਮਲੇ ਤੋਂ ਬਾਅਦ ਆਪਣਾ ਆਕਾਸ਼ ਬੰਦ ਕਰ ਦਿੱਤਾ ਸੀ ਤੇ ਉਸ ਨੂੰ ਜੁਲਾਈ ਵਿੱਚ ਖੋਲ੍ਹਿਆ ਸੀ। ਜੰਮੂ-ਕਸ਼ਮੀਰ ਨੂੰ ਵਿਸ਼ੇਸ਼ ਦਰਜਾ ਦੇਣ ਦੀ ਧਾਰਾ-370 ਖ਼ਤਮ ਹੋਣਮਗਰੋਂ ਪਾਕਿਸਤਾਨ ਨੇ ਅਗਸਤ ਮਹੀਨੇ ਦੇ ਅੰਤ ਵਿੱਚ ਫਿਰ ਆਪਣੇ ਏਅਰਸਪੇਸ ਬੰਦ ਕਰ ਦਿੱਤੇ ਸਨ।