ਚੰਡੀਗੜ੍ਹ, 18 ਸਤੰਬਰ (ਪੋਸਟ ਬਿਊਰੋ)- ਆਪਣੀ ਨੱਬੇ ਸਾਲ ਦੀ ਮਾਂ ਦੀ ਦੇਖਭਾਲ ਨਾ ਕਰਨਾ ਦੋ ਬੇਟੀਆਂ ਨੂੰ ਮਹਿੰਗਾ ਪੈ ਗਿਆ ਹੈ। ਮਾਂ ਨੇ ਦੋਵਾਂ ਧੀਆਂ ਦੇ ਨਾਂਅ ਜਿਹੜੀ ਜਾਇਦਾਦ ਟਰਾਂਸਫਰ ਕੀਤੀ ਸੀ, ਉਹ ਦੋਬਾਰਾ ਮਾਂ ਨੂੰ ਦਿੱਤੇ ਜਾਣ ਦੇ ਹੁਕਮਾਂ ਉੱਤੇ ਹਾਈ ਕੋਰਟ ਨੇ ਵੀ ਮੋਹਰ ਲਗਾ ਦਿੱਤੀ ਹੈ।
ਵਰਨਣ ਯੋਗ ਹੈ ਕਿ ਫਾਜ਼ਿਲਕਾ ਦੀ ਇੱਕ ਮਹਿਲਾ ਨੇ ਆਪਣੀਆਂ ਦੋ ਦੀਆਂ ਦੇ ਨਾਂਅ ਆਪਣੀ ਜਾਇਦਾਦ ਤਬਦੀਲ ਕੀਤੀ ਸੀ, ਪਰ ਜਦੋਂ ਮਾਂ ਨੇ ਬੇਟੀਆਂ ਦੇ ਨਾਂਅ ਜਾਇਦਾਦ ਕਰ ਦਿੱਤੀ, ਉਨ੍ਹਾਂ ਨੇ ਆਪਣੀ ਮਾਂ ਦੀ ਦੇਖਭਾਲ ਕਰਨਾ ਤਾਂ ਦੂਰ ਉਸ ਦਾ ਹਾਲ ਤੱਕ ਪੁੱਛਣਾ ਜ਼ਰੂਰੀ ਨਹੀਂ ਸਮਝਿਆ। ਜਾਇਦਾਦ ਮਿਲਣ ਤੋਂ ਪਹਿਲਾਂ ਦੋਵੇਂ ਧੀਆਂ ਆਪਣੀ ਮਾਂ ਨੂੰ ਆ ਕੇ ਮਿਲਦੀਆਂ ਅਤੇ ਇਲਾਜ ਅਤੇ ਹੋਰ ਖਰਚ ਲਈ ਪੈਸੇ ਵੀ ਦਿੰਦੀਆਂ ਸਨ। ਇਸੇ ਦੌਰਾਨ ਮਹਿਲਾ ਨੇ ਆਪਣੀਆਂ ਧੀਆਂ ਦੇ ਪਿਆਰ ਵਿੱਚ ਆਪਣੀ ਜ਼ਮੀਨ-ਜਾਇਦਾਦ ਤੇ ਹੋਰ ਪ੍ਰਾਪਰਟੀ 65 ਅਤੇ 73 ਸਾਲ ਦੀਆਂ ਦੋ ਧੀਆਂ ਦੇ ਨਾਂਅ ਕਰ ਦਿੱਤੀ। ਇਸ ਪਿੱਛੋਂ ਉਨ੍ਹਾਂ ਨੇ ਉਸ ਕੋਲ ਆਉਣਾ ਛੱਡ ਦਿੱਤਾ ਤੇ ਕਿਸੇ ਵੀ ਤਰ੍ਹਾਂ ਦਾ ਖਰਚ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਮਾਈ ਜਦ ਮੋਹਤਾਜ ਹੋ ਗਈ ਤਾਂ ਉਸ ਨੇ ਮੈਂਟੇਨੈਂਸ ਆਫ ਪੇਰੈਂਟਸ ਐਂਡ ਸੀਨੀਅਰ ਸਿਟੀਜਨ ਐਕਟ ਦੇ ਤਹਿਤ ਸ਼ਿਕਾਇਤ ਦੇ ਕੇ ਪ੍ਰਾਪਰਟੀ ਦੀ ਟਰਾਂਸਫਰ ਡੀਡ ਰੱਦ ਕਰਨ ਦੀ ਅਪੀਲ ਕੀਤੀ। ਅਥਾਰਟੀ ਨੇ ਮਹਿਲਾ ਦੀ ਮੰਗ ਰੱਦ ਕਰ ਦਿੱਤੀ, ਪਰ ਦੋਵਾਂ ਧੀਆਂ ਨੂੰ ਆਪਣੀ ਮਾਂ ਨੂੰ ਦੋ-ਦੋ ਹਜ਼ਾਰ ਰੁਪਏ ਮਹੀਨਾ ਗੁਜ਼ਾਰਾ ਭੱਤਾ ਦੇਣ ਦੇ ਹੁਕਮ ਦੇ ਦਿੱਤੇ। ਮਹਿਲਾ ਨੇ ਇਸ ਦੇ ਖਿਲਾਫ ਐਪੀਲੇਟ ਅਥਾਰਟੀ ਵਿੱਚ ਅਪੀਲ ਕਰ ਦਿੱਤੀ। ਅਥਾਰਟੀ ਨੇ ਮਹਿਲਾ ਦੀ ਅਪੀਲ ਨੂੰ ਪ੍ਰਵਾਨ ਕਰਦੇ ਹੋਏ ਮਹਿਲਾ ਵੱਲੋਂ ਆਪਣੀਆਂ ਦੋਵਾਂ ਧੀਆਂ ਦੇ ਨਾਂਅ ਕੀਤੀ ਟਰਾਂਸਫਰ ਡੀਡ ਰੱਦ ਕੀਤੇ ਜਾਣ ਦੇ ਹੁਕਮ ਦੇ ਦਿੱਤੇ ਹਨ। ਇਸ ਫੈਸਲੇ ਨੂੰ ਦੋਵਾਂ ਧੀਆਂ ਨੇ ਹਾਈ ਕੋਰਟ ਵਿੱਚ ਚੁਣੌਤੀ ਦਿੱਤੀ ਸੀ, ਪਹਿਲਾਂ ਸਿੰਗਲ ਬੈਂਚ ਤੇ ਫਿਰ ਡਬਲ ਬੈਂਚ ਨੇ ਵੀ ਦੋਵਾਂ ਧੀਆਂ ਦੀ ਅਪੀਲ ਰੱਦ ਕਰਦੇ ਹੋਏ ਅਪੀਲੇਟ ਅਥਾਰਟੀ ਵੱਲੋਂ ਟਰਾਂਸਫਰ ਕਰਦੇ ਹੋਏ ਅਪੀਲੇਟ ਅਥਾਰਟੀ ਵੱਲੋਂ ਟਰਾਂਸਫਰ ਡੀਡ ਰੱਦ ਕਰਨ ਦੇ ਫੈਸਲੇ ਨੂੰ ਕਾਇਮ ਰੱਖਿਆ ਅਤੇ ਕਿਹਾ, ਜੋ ਧੀਆਂ ਨੱਬੇ ਸਾਲ ਦੀ ਮਾਂ ਦੀ ਦੇਖਭਾਲ ਨਹੀਂ ਕਰ ਸਕਦੀਆਂ, ਉਨ੍ਹਾਂ ਨੂੰ ਕਿਸੇ ਵੀ ਸੂਰਤ ਵਿੱਚ ਰਾਹਤ ਨਹੀਂ ਦਿੱਤੀ ਜਾ ਸਕਦੀ ਹੈ।