ਬਰਮਿੰਘਮ, 17 ਸਤੰਬਰ (ਪੋਸਟ ਬਿਊਰੋ)- ਅਮਰੀਕੀ ਰਾਸ਼ਟਰਪਤੀ ਚੋਣਾਂ ਲਈ ਡੈਮੋਕਰੇਟ ਉਮੀਦਵਾਰ ਜੋਅ ਬਿਡੇਨ ਨੇ ਗੈਰ-ਗੋਰੇ ਅਮਰੀਕੀਆਂ ਦੇ ਮਨੁੱਖੀ ਹੱਕਾਂ ਲਈ ਚੱਲੇ ਅੰਦੋਲਨ ਦੌਰਾਨ ਬੰਬ ਧਮਾਕਿਆਂ ਦਾ ਸ਼ਿਕਾਰ ਬਣਾਏ ਗਏ ਚਰਚ ਦਾ ਕੱਲ੍ਹ ਦੌਰਾ ਕੀਤਾ ਅਤੇ ਇਸ ਮੌਕੇ ਕਿਹਾ ਕਿ ਮੌਜੂਦਾ ਨਸਲੀ ਤਣਾਅ ਲਗਾਤਾਰ ਜਾਰੀ ਸੰਘਰਸ਼ ਦਾ ਹਿੱਸਾ ਹੈ ਤੇ ਇਹ ਮੁਲਕ ਦੀ ਹੋਂਦ ਤੋਂ ਵੀ ਪਹਿਲਾਂ ਦਾ ਹੈ।
ਜੋਅ ਬਿਡੇਨ ਨੇ ਕਿਹਾ ਕਿ ਸਦੀਆਂ ਤੋਂ ਹਿੰਸਾ, ਭੈਅ, ਤਣਾਅ ਗੈਰ-ਗੋਰੇ ਲੋਕਾਂ ਉਤੇ ਥੋਪਿਆ ਗਿਆ ਹੈ। ਉਸ ਨੇ ਇਹ ਵਿਚਾਰ 16ਵੇਂ ਸਟ੍ਰੀਟ ਬੈਪਟਿਸਟ ਚਰਚ 'ਚ ਇਕੱਤਰਤਾ ਮੌਕੇ ਪ੍ਰਗਟਾਏ। ਇਸ ਚਰਚ ਉਤੇ ਹਮਲਾ 1963 ਵਿੱਚ ਕੀਤਾ ਗਿਆ ਸੀ ਤੇ ਚਾਰ ਲੜਕੀਆਂ ਦੀ ਮੌਤ ਹੋ ਗਈ ਸੀ। ਬਿਡੇਨ ਬਜ਼ੁਰਗ ਗੈਰ-ਗੋਰੇ ਵੋਟਰਾਂ ਨੂੰ ਆਪਣੇ ਹੱਕ ਵਿੱਚ ਕਰਨਾ ਚਾਹੁੰਦੇ ਹਨ, ਪਰ ਕੁਝ ਅਫਰੀਕੀ ਅਮਰੀਕੀ ਅਤੇ ਗੈਰ ਗੋਰੇ ਨੌਜਵਾਨ ਆਗੂ ਉਨ੍ਹਾਂ ਦਾ ਵਿਰੋਧ ਵੀ ਕਰ ਰਹੇ ਹਨ। ਉਨ੍ਹਾਂ ਨੂੰ ਇਕ ਗੋਰੇ ਆਗੂ ਵਜੋਂ ਬਿਡੇਨ (76) ਦੇ ਇਰਾਦਿਆਂ ਉਤੇ ਸ਼ੱਕ ਹੈ ਕਿ ਉਹ ਦੇਸ਼ ਵਿਚਲੀ ਢਾਂਚਾਗਤ ਨਸਲੀ ਨਫਰਤ ਨਾਲ ਨਜਿੱਠਣ ਦੇ ਚਾਹਵਾਨ ਤੇ ਸਮਰੱਥ ਹਨ ਕਿ ਨਹੀਂ। 20 ਮਿੰਟ ਦੇ ਭਾਸ਼ਨ ਵਿੱਚ ਬਿਡੇਨ ਨੇ ਸੰਸਥਾਗਤ ਨਸਲੀ ਨਫਰਤ ਦੀ ਨਿਖੇਧੀ ਕੀਤੀ ਅਤੇ ਕਿਹਾ ਕਿ ਦੇਸ਼ ਕਦੇ ਵੀ ਸਮਾਨਤਾ ਦੇ ਆਦਰਸ਼ਾਂ ਲਈ ‘ਆਸ ਮੁਤਾਬਕ' ਨਹੀਂ ਲੜਿਆ। ਇਸ ਦੇ ਨਾਲ ਉਨ੍ਹਾਂ ਆਪਣੇ ਵਿਰੋਧੀਆਂ ਨੂੰ ਨਿਸ਼ਾਨੇ 'ਤੇ ਲੈਂਦਿਆਂ ਕਿਹਾ ਕਿ ‘ਜਿਹੜੇ ਗੋਰੇ ਹਨ, ਕੋਸ਼ਿਸ਼ ਕਰਨ ਪਰ ਅਸੀਂ ਫਿਰ ਵੀ ਸ਼ਾਇਦ ਕਦੇ ਪੂਰੀ ਤਰ੍ਹਾਂ ਨਹੀਂ ਸਮਝ ਸਕਾਂਗੇ।'