ਲੁਧਿਆਣਾ, 15 ਅਕਤੂਬਰ (ਪੋਸਟ ਬਿਊਰੋ)- ਇਥੋਂ ਦੇ ਵੱਖ-ਵੱਖ ਇਲਾਕਿਆਂ 'ਚ ਦੋ ਸੜਕ ਹਾਦਸਿਆਂ ਵਿੱਚ ਪੈਦਲ ਜਾ ਰਹੇ ਤਿੰਨ ਬਜ਼ੁਰਗਾਂ ਦੀ ਮੌਤ ਹੋ ਗਈ, ਜਿਸ ਬਾਰੇ ਪੁਲਸ ਕਾਰਵਾਈ ਕਰ ਰਹੀ ਹੈ।
ਪਹਿਲੇ ਮਾਮਲੇ ਵਿੱਚ ਪਿੰਡ ਸਰੀਂਹ ਦੇ ਮੰਗਲਜੀਤ ਸਿੰਘ ਨੇ ਦੱਸਿਆ ਕਿ ਉਸ ਦਾ ਪਿਤਾ ਉਮਰ ਕਰੀਬ 70 ਸਾਲ ਅਤੇ ਪਿੰਡ ਦਾ ਰਹਿਣ ਵਾਲਾ ਪ੍ਰੀਤਮ ਸਿੰਘ ਨਾਮਕ ਵਿਅਕਤੀ ਉਮਰ ਕਰੀਬ 75 ਸਾਲ ਰੋਜ਼ਾਨਾ ਦੀ ਤਰ੍ਹਾਂ ਗੁਰਦੁਆਰਾ ਆਲਮਗੀਰ ਸਾਹਿਬ ਮੱਥਾ ਟੇਕ ਕੇ ਆ ਰਹੇ ਸਨ। ਉਹ ਸੈਰ ਕਰਨ ਲਈ ਉਸ ਰੋਡ 'ਤੇ ਆਪਣੇ ਪਿਤਾ ਤੋਂ ਕਰੀਬ 20 ਕਦਮ ਪਿੱਛੇ ਸੀ ਤਾਂ ਤੜਕੇ ਸਾਢੇ ਤਿੰਨ ਵਜੇ ਸ਼ਹਿਰ ਵੱਲੋਂ ਆਈ ਲੈਂਸਰ ਗੱਡੀ ਦੇ ਚਾਲਕ ਨੇ ਉਸ ਦੇ ਪਿਤਾ ਅਤੇ ਪ੍ਰੀਤਮ ਸਿੰਘ ਵਿੱਚ ਅਣਗਹਿਲੀ ਤੇ ਤੇਜ਼ ਰਫਤਾਰੀ ਵਰਤਦਿਆਂ ਟੱਕਰ ਮਾਰੀ। ਗੱਡੀ ਹਾਦਸੇ ਤੋਂ ਬਾਅਦ ਬੇਕਾਬ ਹੋ ਕੇ ਝਾੜੀਆਂ ਵਿੱਚ ਫਸ ਗਈ ਤੇ ਚਾਲਕ ਗੱਡੀ ਛੱਡ ਕੇ ਫਰਾਰ ਹੋ ਗਿਆ। ਜਦ ਉਸ ਨੇ ਆਪਣੇ ਪਿਤਾ ਅਤੇ ਪ੍ਰੀਤਮ ਸਿੰਘ ਨੂੰ ਕੋਲ ਜਾ ਕੇ ਵੇਖਿਆ ਤਾਂ ਉਨ੍ਹਾਂ ਦੀ ਮੌਕੇ 'ਤੇ ਮੌਤ ਹੋ ਗਈ ਸੀ। ਦੋਸ਼ੀ ਦੀ ਪਛਾਣ ਕਰਮਜੀਤ ਸਿੰਘ ਵਜੋਂ ਹੋਈ।
ਦੂਸਰੇ ਕੇਸ ਵਾਰੇ ਪਿੰਡ ਭੈਣੀ ਵਿੱਚ ਰਹਿਣ ਵਾਲੇ ਰਾਮਲੋਵਿਤ ਯਾਦਵ ਨੇ ਦੱਸਿਆ ਕਿ ਉਸ ਦਾ ਚਾਚਾ ਰਮਸ਼ੀਸ਼ ਯਾਦਵ ਉਮਰ ਕਰੀਬ 65 ਸਾਲ ਬੀਤੇ ਪੰਜ ਛੇ ਸਾਲਾਂ ਤੋਂ ਇਥੋਂ ਦੀ ਫੈਕਟਰੀ ਵਿੱਚ ਸਕਿਓਰਿਟੀ ਗਾਰਡ ਦੀ ਡਿਊਟੀ ਕਰਦਾ ਸੀ। ਪਰਸੋਂ ਉਹ ਡਬਲ ਡਿਊਟੀ ਕਰ ਕੇ ਉਹ ਸੜਕ 'ਤੇ ਪੈਦਲ ਆ ਰਿਹਾ ਸੀ ਜਿਸ ਨੂੰ ਪਿੰਡ ਦੇ ਨੇੜੇ ਹੀ ਉਸ ਦੇ ਵੇਖਦੇ ਵੇਖਦੇ ਇੱਕ ਅਣਪਛਾਤੇ ਮੋਟਰ ਸਾਈਕਲ ਸਵਾਰ ਨੇ ਤੇਜ਼ ਰਫਤਾਰੀ ਤੇ ਅਣਗਹਿਲੀ ਵਰਤਦਿਆਂ ਉਸ ਦੇ ਚਾਚੇ ਵਿੱਚ ਟੱਕਰ ਮਾਰ ਦਿੱਤੀ ਤੇ ਅਣਪਛਾਤਾ ਮੁਲਜ਼ਮ ਮੌਕੇ ਤੋਂ ਫਰਾਰ ਹੋ ਗਿਆ। ਇਸ ਹਾਦਸੇ ਵਿੱਚ ਉਸ ਦੇ ਚਾਚੇ ਦੇ ਕਾਫੀ ਸੱਟਾਂ ਲੱਗੀਆਂ। ਗੰਭੀਰ ਜ਼ਖਮੀ ਨੂੰ ਇਲਾਜ ਲਈ ਪੀ ਜੀ ਆਈ ਹਸਪਤਾਲ ਪਹੁੰਚਾਇਆ ਗਿਆ ਜਿੱਥੇ ਜ਼ੇਰੇ ਇਲਾਜ ਉਸ ਦਾ ਚਾਚਾ ਚਾਰ ਦਿਨ ਬਾਅਦ ਦਮ ਤੋੜ ਗਿਆ। ਦੋਵਾਂ ਕੇਸਾਂ ਵਿੱਚ ਸੰਬੰਧਤ ਥਾਣਿਆਂ ਦੀ ਪੁਲਸ ਨੇ ਸ਼ਿਕਾਇਤ ਕਰਤਾਵਾਂ ਦੇ ਬਿਆਨਾਂ 'ਤੇ ਮੁਲਜ਼ਮਾਂ ਵਿਰੁੱਧ ਕੇਸ ਦਰਜ ਕਰ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।