ਰਿਆਦ, 23 ਅਗਸਤ (ਪੋਸਟ ਬਿਊਰੋ)- 38 ਸਾਲ ਦੇ ਡਾ. ਐਂਜਲੋ ਗ੍ਰਬਿਸਿਕ ਵਲੋਂ ਮੰਗਲਵਾਰ ਸਾਊਦੀ ਅਰਬ ਵਿਚ ਲਾਇਆ ਜੰਪ ਉਨ੍ਹਾਂ ਦਾ ਆਖਰੀ ਜੰਪ ਸਾਬਤ ਹੋਇਆ। ਆਯੋਜਿਤ ਪ੍ਰੋਗਰਾਮ ਹੇਠ ਉਹ ਸਭ ਤੋਂ ਪਸੰਦੀਦਾ ਕੰਮ ਯਾਨੀ ਛਲਾਂਗ ਲਾਉਣ ਲੱਗੇ ਤਾਂ ਇਹ ਉਨ੍ਹਾਂ ਦੀ ਆਖਰੀ ਉਡਾਣ ਸਾਬਿਤ ਹੋਈ ਤੇ ਉਨ੍ਹਾਂ ਦੀ ਮੌਤ ਹੋ ਗਈ।
ਗ੍ਰਬਿਸਿਕ (ਐਸਟ੍ਰੋਨਾਟੀਕਲ ਇੰਜੀਨੀਅਰਿੰਗ) ਨੇ ਸਾਊਥੈਂਪਟਨ ਯੂਨੀਵਰਸਿਟੀ ਵੱਲੋਂ ਇਕ ਵਿੰਗਸੂਟ ਡਿਜ਼ਾਈਨ ਟੀਮ ਦੀ ਅਗਵਾਈ ਕੀਤੀ ਸੀ। ਉਨ੍ਹਾਂ ਨੂੰ ਜੁਲਾਈ ਵਿਚ ਬ੍ਰਿਟਿਸ਼ ਵਿੰਗਸੂਟ ਚੈਂਪੀਅਨ ਦਾ ਤਾਜ ਪਹਿਨਾਇਆ ਗਿਆ ਸੀ। ਇਕ ਬਿਆਨ ਵਿਚ ਉਨ੍ਹਾਂ ਦੇ ਪਰਿਵਾਰ ਨੇ ਉਨ੍ਹਾਂ ਨੂੰ ਅਸਾਧਾਰਨ ਰੂਪ ਨਾਲ ਪ੍ਰਤਿਭਾਸ਼ਾਲੀ ਦੱਸ ਕੇ ਕਿਹਾ ਹੈ ਕਿ ਏਂਜਲੋ ਨੇ ਆਪਣਾ ਜੀਵਨ ਉਹੀ (ਵਿੰਗਸੂਟ ਬੇਸ ਜੰਪਿੰਗ) ਕਰਦੇ ਹੋਏ ਗੁਆਇਆ ਹੈ, ਜਿਸ ਨੂੰ ਉਹ ਸਭ ਤੋਂ ਵੱਧ ਪਿਆਰ ਕਰਦਾ ਸੀ। ਅਸੀਂ ਯਕੀਨੀ ਕਰਨਾ ਚਾਹੁੰਦੇ ਹਾਂ ਕਿ ਉਸ ਦੀਆਂ ਪ੍ਰਾਪਤੀਆਂ ਅਤੇ ਉਮੀਦਾਂ ਨੂੰ ਦੁਨੀਆ ਵਿਚ ਜਾਣਿਆ ਜਾਵੇਗਾ ਤੇ ਉਹ ਸਾਡੇ ਸਾਰਿਆਂ ਦੇ ਜੀਵਨ ਵਿਚ ਜੋ ਖੁਸ਼ੀ ਛੱਡ ਕੇ ਗਿਆ, ਉਸ ਦਾ ਜਸ਼ਨ ਮਨਾਇਆ ਜਾਵੇਗਾ। ਉਨ੍ਹਾਂ ਨੇ ਅੱਗੇ ਕਿਹਾ ਕਿ ਏਂਜਲੋ ਨੇ ਹਰ ਉਸ ਇਕ ਵਿਅਕਤੀ ਦੇ ਦਿਲ ਅਤੇ ਦਿਮਾਗ ਵਿਚ ਆਪਣੀ ਛਾਪ ਛੱਡੀ ਸੀ, ਜੋ ਉਨ੍ਹਾਂ ਨਾਲ ਮਿਲਿਆ ਅਤੇ ਜਿਸ ਨੇ ਉਨ੍ਹਾਂ ਨਾਲ ਕੰਮ ਕੀਤਾ ਸੀ।
ਇਸ ਮੌਕੇ ਸਾਉਥੈਂਪਟਨ ਯੂਨੀਵਰਸਿਟੀ ਨੇ ਕਿਹਾ ਕਿ ਅਸੀਂ ਏਂਜਲੋ ਦੀ ਮੌਤ ਤੋਂ ਬਹੁਤ ਦੁਖੀ ਤੇ ਹੈਰਾਨ ਹਾਂ ਅਤੇ ਸਾਡੀ ਹਮਦਰਦੀ ਉਨ੍ਹਾਂ ਦੇ ਪਰਿਵਾਰ ਨਾਲ ਹੈ। ਉਨ੍ਹਾਂ ਕਿਹਾ ਕਿ ਏਂਜਲੋ ਨੇ ਪੁਲਾੜ ਦੇ ਪੱਖੋਂ ਯੂਨੀਵਰਸਿਟੀ ਦੀ ਖੋਜ ਵਿਚ ਕਈ ਯੋਗਦਾਨ ਦਿੱਤੇ ਤੇ ਆਪਣੇ ਵਿਦਿਆਰਥੀਆਂ ਤੇ ਸਾਥੀਆਂ ਵਿਚ ਬੜੇ ਪ੍ਰਸਿੱਧ ਸਨ। 2015 ਵਿਚ ਡਾ. ਗ੍ਰਬਿਸਿਕ ਨੇ ਯੂਨੀਵਰਸਿਟੀ ਵਿਚ ਇਕਾਰੁਸ ਪ੍ਰਾਜੈਕਟ ਸ਼ੁਰੂ ਕੀਤਾ ਸੀ। ਇਹ ਕੋਸ਼ਿਸ਼ ਵਿੰਗਸੂਟ ਡਿਜ਼ਾਈਨ ਕਰਨ ਦੀ ਸੀ, ਜਿਸ ਨੂੰ ਸੁਰੱਖਿਆ ਵਿਚ ਸੁਧਾਰ ਮੰਨਿਆ ਗਿਆ ਸੀ। ਪੰਛੀਆਂ ਵਾਂਗ ਉੱਡਦੇ ਹੋਏ ਸੇਫਟੀ ਨਾਲ ਸਬੰਧਿਤ ਕੋਈ ਦਿੱਕਤ ਨਾ ਹੋਵੇ, ਇਸ ਲਈ ਵਿੰਗਸੂਟ ਡਿਜ਼ਾਈਨ ਕੀਤਾ ਤੇ ਇਸ ਵਿਚ ਸੁਧਾਰ ਕੀਤਾ ਗਿਆ। ਉਨ੍ਹਾਂ ਨੇ ਪਹਿਲਾਂ ਨਾਸਾ ਅਤੇ ਯੂਰਪੀ ਪੁਲਾੜ ਏਜੰਸੀ ਦੋਵਾਂ ਲਈ ਪੁਲਾੜ ਯਾਨ ਦੇ ਪ੍ਰੋਪਲਸ਼ਨ ਉੱਤੇ ਕੰਮ ਕੀਤਾ ਸੀ ਅਤੇ ਉਹ 2018 ਵਿਚ ਯੂਰਪੀ ਪੁਲਾੜ ਏਜੰਸੀ ਦੇ ਮਿਸ਼ਨ ਲਈ ਇਕ ਸਲਾਹਕਾਰ ਇੰਜੀਨੀਅਰ ਸਨ।