* ਸੁਸਾਇਟੀ ਉੱਤੇ ਜਾਅਲੀ ਬਿੱਲ ਕਲੇਮ ਕਰਨ ਦਾ ਦੋਸ਼
ਧਰਮਗੜ੍ਹ, 19 ਅਗਸਤ (ਪੋਸਟ ਬਿਊਰੋ)- ਪੰਜਾਬ ਸਿੱਖਿਆ ਵਿਕਾਸ ਬੋਰਡ ਵੱਲੋਂ ਨਿੱਜੀ ਭਾਈਵਾਲੀ ਪ੍ਰਬੰਧ ਸਕੀਮ ਅਧੀਨ ਪੰਜਾਬ ਵਿੱਚ 25 ਆਦਰਸ਼ ਸਕੂਲ ਚਲਾਏ ਜਾ ਰਹੇ ਹਨ, ਜਿਨ੍ਹਾਂ ਵਿੱਚੋਂ ਛੇ ਜ਼ਿਲਿਆਂ ਦੇ ਅੱਠ ਆਦਰਸ਼ ਸਕੂਲ ਮਨਾਵਾਂ (ਮੋਗਾ), ਕਾਲੇਕੇ (ਬਰਨਾਲਾ), ਬੋਹਾ ਅਤੇ ਭੁਪਾਲ (ਮਾਨਸਾ), ਗੰਢੂਆਂ ਅਤੇ ਬਾਲਦ ਖੁਰਦ (ਸੰਗਰੂਰ), ਮੱਲ੍ਹਾ (ਫਰੀਦਕੋਟ) ਅਤੇ ਪਥਰਾਲਾ (ਬਠਿੰਡਾ), ਜਿਹੜੇ ਸ਼ਹੀਦ ਊਧਮ ਸਿੰਘ ਐਜੂਕੇਸ਼ਨ ਐਂਡ ਵੈਲਫੇਅਰ ਸੁਸਾਇਟੀ ਨੂੰ ਸੌਂਪੇ ਗਏ ਸਨ, ਪੰਜਾਬ ਸਿੱਖਿਆ ਵਿਕਾਸ ਬੋਰਡ ਨੇ ਵਾਪਸ ਲੈ ਲਏ ਹਨ।
ਇਸ ਸੰਬੰਧ ਵਿੱਚ ਡਾਇਰੈਕਟਰ ਜਨਰਲ ਆਫ ਸਕੂਲ ਐਜੂਕੇਸ਼ਨ (ਡੀ ਜੀ ਐਸ ਈ) ਮੁਹੰਮਦ ਤਾਇਬ ਆਈ ਏ ਐਸ ਵੱਲੋਂ ਜਾਰੀ ਕੀਤੇ ਪੱਤਰ ਅਨੁਸਰ ਸ਼ਹੀਦ ਊਧਮ ਸਿੰਘ ਐਜੂਕੇਸ਼ਨ ਐਂਡ ਵੈਲਫੇਅਰ ਸੁਸਾਇਟੀ ਖਿਲਾਫ ਬੋਰਡ ਨੂੰ ਸ਼ਿਕਾਇਤਾਂ ਮਿਲੀਆਂ ਸਨ ਅਤੇ ਬੋਰਡ ਨੇ ਉਸ ਸੁਸਾਇਟੀ ਨੂੰ ਕਾਰਨ ਦੱਸੋ ਨੋਟਿਸ ਵੀ ਜਾਰੀ ਕੀਤਾ ਸੀ, ਪ੍ਰੰਤੂ ਸੁਸਾਇਟੀ ਇਸ ਦਾ ਕੋਈ ਤਸੱਲੀ ਬਖਸ਼ ਜਵਾਬ ਨਹੀਂ ਦੇ ਸਕੀ। ਵੱਖ-ਵੱਖ ਜ਼ਿਲਾ ਸਿੱਖਿਆ ਅਫਸਰਾਂ ਨੇ ਇਸ ਸੁਸਾਇਟੀ ਅਧੀਨ ਚੱਲਦੇ ਸਕੂਲਾਂ ਦੀ ਪੜਤਾਲ ਪਿੱਛੋਂ ਬੋਰਡ ਨੂੰ ਲਿਖ ਕੇ ਭੇਜਿਆ ਕਿ ਇਸ ਸੁਸਾਇਟੀ ਵੱਲੋਂ ਚਲਾਏ ਜਾਂਦੇ ਕਿਸੇ ਵੀ ਸਕੂਲ ਵਿੱਚ 117 ਕਰਮਚਾਰੀ ਉਪਲਬਧ ਨਹੀਂ ਹਨ। ਬੋਰਡ ਵੱਲੋਂ ਆਪਣੇ ਹਿੱਸੇ ਦੀ 70 ਫੀਸਦੀ ਰਕਮ ਤਾਂ ਸੁਸਾਇਟੀ ਵੱਲੋਂ ਚਲਾਏ ਜਾਂਦੇ ਵੱਖ-ਵੱਖ ਸਕੂਲਾਂ ਦੇ ਸਟਾਫ ਨੂੰ ਅਦਾ ਕਰ ਦਿੱਤੀ ਗਈ, ਪ੍ਰੰਤੂ ਉਕਤ ਸੁਸਾਇਟੀ ਨੇ ਆਪਣੀ ਬਣਦੀ 30 ਫੀਸਦੀ ਅਦਾਇਗੀ ਸਟਾਫ ਨੂੰ ਨਹੀਂ ਸੀ ਕੀਤੀ। ਇਸ ਮਾਮਲੇ ਬਾਰੇ ਡੀ ਜੀ ਐਸ ਈ ਮੁਹੰਮਦ ਤਾਇਬ ਦਾ ਕਹਿਣਾ ਹੈ ਕਿ ਸੁਸਾਇਟੀ ਵਿਰੁੱਧ ਸ਼ਿਕਾਇਤਾਂ ਬਾਰੇ ਜ਼ਿਲਾ ਸਿੱਖਿਆ ਅਫਸਰਾਂ ਅਤੇ ਡਿਪਟੀ ਕਮਿਸ਼ਨਰਾਂ ਵੱਲੋਂ ਕੀਤੀ ਪੜਤਾਲ ਦੀ ਰਿਪੋਰਟ ਵੇਖਣ ਪਿੱਛੋਂ ਪਤਾ ਲੱਗਾ ਕਿ ਉਸ ਸੁਸਾਇਟੀ ਵੱਲੋਂ ਨਿੱਜੀ ਭਾਈਵਾਲੀ ਪ੍ਰਬੰਧ ਸਕੀਮ ਹੇਠ ਆਪਣੇ ਪ੍ਰਬੰਧ ਵਾਲੇ ਆਦਰਸ਼ ਸਕੂਲ ਸਮਝੌਤੇ ਦੀਆਂ ਸ਼ਰਤਾਂ ਅਨੁਸਾਰ ਨਹੀਂ ਚਲਾਏ ਜਾ ਰਹੇ ਅਤੇ ਸੁਸਾਇਟੀ ਵੱਲੋਂ ਜਾਅਲੀ ਕਰਮਚਾਰੀ ਵਿਖਾ ਕੇ ਪੰਜਾਬ ਸਿੱਖਿਆ ਵਿਕਾਸ ਬੋਰਡ ਤੋਂ ਬਿਲ ਕਲੇਮ ਕਰਕੇ ਧੋਖਾ ਕੀਤਾ ਗਿਆ ਹੈ, ਜਿਸ ਕਰ ਕੇ ਉਨ੍ਹਾਂ ਨੇ ਇਸ ਸੁਸਾਇਟੀ ਵੱਲੋਂ ਚਲਾਏ ਜਾਂਦੇ ਛੇ ਜ਼ਿਲਿਆਂ ਦੇ ਅੱਠ ਸਕੂਲ ਵਾਪਸ ਲਏ ਹਨ।