ਨਵੀਂ ਦਿੱਲੀ, 18 ਅਗਸਤ (ਪੋਸਟ ਬਿਊਰੋ)- 46 ਸਾਲ ਦੇ ਇੱਕ ਵਿਅਕਤੀ ਨੂੰ ਵਿਆਹ ਕਰਾਉਣ ਵਾਲੀ ਵੈੱਬਸਾਈਟ 'ਤੇ 20 ਔਰਤਾਂ ਨੂੰ ਧੋਖਾ ਦੇਣ ਦੇ ਦੋਸ਼ ਵਿੱਚ ਮੇਰਠ ਤੋਂ ਗ੍ਰਿਫਤਾਰ ਕੀਤਾ ਗਿਆ ਹੈ।
ਪੁਲਸ ਨੇ ਕੱਲ੍ਹ ਏਥੇ ਦੱਸਿਆ ਕਿ ਦੋਸ਼ੀ ਦਾ ਨਾਂਅ ਗੌਰਵ ਧਮੀਜਾ ਹੈ, ਜੋ ਕਾਰ ਦੇ ਪਾਰਟਸ ਵੇਚਣ ਦਾ ਕੰਮ ਕਰਦਾ ਹੈ। ਇਹ ਮੁੱਖ ਤੌਰ 'ਤੇ ਵਿਧਵਾ ਅਤੇ ਤਲਾਕ ਸ਼ੁਦਾ ਔਰਤਾਂ ਨੂੰ ਆਪਣਾ ਸ਼ਿਕਾਰ ਬਣਾਉਂਦਾ ਸੀ ਅਤੇ ਸਾਈਟ 'ਤੇ ਆਪਣੇ ਆਪ ਨੂੰ ਇੱਕ ਹੈਂਡਸਮ ਪੁਰਸ਼ ਦੀ ਤਰ੍ਹਾਂ ਦਿਖਾਉਂਦਾ ਸੀ ਜੋ ਸਾਲ ਵਿੱਚ 25-30 ਲੱਖ ਰੁਪਏ ਕਮਾਉਂਦਾ ਹੈ। ਸਾਈਬਰ ਸੈੱਲ ਦੇ ਡੀ ਸੀ ਪੀ ਅਨਿਵੇਸ਼ ਰਾਏ ਨੇ ਕਿਹਾ, ਇਸ ਦੇ ਖਿਲਾਫ ਸਾਈਬਰ ਕਰਾਈਮ ਯੂਨਿਟ ਵਿੱਚ ਸ਼ਿਕਾਇਤ ਮਿਲੀ ਸੀ ਜਿਸ ਵਿੱਚ ਇੱਕ ਮਹਿਲਾ ਨੇ ਕਿਹਾ ਕਿ ਉਸ ਨੇ ਇਸ ਸ਼ਖਸ ਵੱਲ ਰੁਚੀ ਦਿਖਾਈ ਸੀ ਜਿਸ ਦੇ ਬਾਅਦ ਇਸ ਨੇ ਮਹਿਲਾ ਤੋਂ ਆਪਣੇ ਖਾਤੇ ਵਿੱਚ ਪੈਸੇ ਪਵਾਏ ਸਨ। ਧਮੀਜਾ ਨੇ ਫਿਰ ਮਹਿਲਾ ਨੂੰ ਭਾਵਨਾਵਾਂ ਦੇ ਜਾਲ ਵਿੱਚ ਫਸਾਇਆ ਤੇ ਕਿਹਾ ਕਿ ਉਹ ਆਪਣੀ ਪਤਨੀ ਤੋਂ ਪੀੜਤ ਹੈ ਤੇ ਮਹਿਲਾ ਨਾਲ ਵਾਅਦਾ ਕੀਤਾ ਕਿ ਉਹ ਮਹਿਲਾ ਨੂੰ ਮਹਿੰਗੇ ਤੋਹਫੇ ਦੇਵੇਗਾ। ਪੁਲਸ ਨੇ ਦੱਸਿਆ ਕਿ ਇੱਕ ਵਾਰ ਜਦ ਪੀੜਤ ਔਰਤ ਧਮੀਜਾ ਦੇ ਝਾਂਸੇ ਵਿੱਚ ਫਸ ਗਈ ਤਾਂ ਇਸ ਨੇ ਵੱਖ-ਵੱਖ ਬਹਾਨੇ ਕਰ ਕੇ ਉਸ ਤੋਂ ਪੈਸੇ ਮੰਗਣੇ ਸ਼ੁਰੂ ਕਰ ਦਿੱਤੇ, ਜਿਵੇਂ ਮਾਤਾ ਪਿਤਾ ਦਾ ਇਲਾਜ, ਕਾਰੋਬਾਰ ਵਿੱਚ ਨਿਵੇਸ਼ ਅਤੇ ਹੋਰ ਬਹਾਨੇ। ਪੁਲਸ ਨੇ ਕਿਹਾ ਕਿ ਸ਼ਿਕਾਇਤ ਪਿੱਛੋਂ ਉਸ ਉੱਤੇ ਕੇਸ ਦਰਜ ਕਰ ਲਿਆ ਗਿਆ ਹੈ ਅਤੇ ਜਾਂਚ ਜਾਰੀ ਹੈ।