ਨਵੀਂ ਦਿੱਲੀ, 14 ਅਗਸਤ (ਪੋਸਟ ਬਿਊਰੋ)- ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਮਨਜਿੰਦਰ ਸਿੰਘ ਸਿਰਸਾ ਨੇ ਆਪਣੇ ਨਿੱਜੀ ਲਾਭ ਲਈ ਗੁਰੂ ਹਰਿਕ੍ਰਿਸ਼ਨ ਪਬਲਿਕ ਸਕੂਲ ਬਸੰਤ ਵਿਹਾਰ ਦੀ ਕਮੇਟੀ ਨੂੰ ਹਨੇਰੇ ਵਿੱਚ ਰੱਖ ਕੇ 22000 ਵਰਗ ਫੁੱਟ ਵਿੱਚ ਕਲੱਬ ਖੁੱਲ੍ਹਵਾ ਦਿੱਤਾ ਹੈ, ਜਿਸ ਦਾ ਅੱਜ ਦਾ ਬਾਜ਼ਾਰ ਕਿਰਾਇਆ 20 ਕਰੋੜ ਰੁਪਏ ਹੁੰਦਾ ਹੈ, ਪਰ ਕਮੇਟੀ ਦੇ ਖਾਤੇ ਵਿੱਚ ਇੱਕ ਪਾਈ ਵੀ ਜਮ੍ਹਾ ਨਹੀਂ ਹੋਈ ਹੈ, ਕਿਉਂਕਿ ਕਲੱਬ ਚਲਾ ਰਹੇ ਲਾਈਫ ਸਟਾਈਲ ਸਵਿਮ ਐਂਡ ਜਿਮ ਕੰਪਨੀ ਨਾਲ ਸਿਰਸਾ ਨੇ ਕੀ ਸਮਝੌਤਾ ਕੀਤਾ ਹੈ, ਇਸ ਦੀ ਭਿਣਕ ਕਮੇਟੀ ਨੂੰ ਨਹੀਂ ਹੈ। ਇਹ ਦਾਅਵਾ ਦਿੱਲੀ ਗੁਰਦੁਆਰਾ ਕਮੇਟੀ ਦੇ ਸਾਬਕਾ ਪ੍ਰਧਾਨ ਮਨਜੀਤ ਸਿੰਘ ਜੀ ਕੇ ਨੇ ਕੀਤਾ ਹੈ।
ਇਸ ਸੰਬੰਧ ਵਿੱਚ ਮਨਜੀਤ ਸਿੰਘ ਜੀ ਕੇ ਨੇ ਕਿਹਾ ਕਿ ਕੁਝ ਸਮਾਂ ਪਹਿਲਾਂ ਪਟੀਸ਼ਨਰ ਤੇ ਸਾਬਕਾ ਕਮੇਟੀ ਮੈਂਬਰ ਦਲਜੀਤ ਕੌਰ ਖਾਲਸਾ ਨੇ ਮੈਨੂੰ ਦੱਸਿਆ ਕਿ ਬਸੰਤ ਵਿਹਾਰ ਸਕੂਲ ਵਿੱਚ ਬੀਤੇ ਚਾਰ ਸਾਲਾਂ ਤੋਂ ਇੱਕ ਕੰਪਨੀ ਸਵੀਮਿੰਗ ਦੇ ਨਾਂਅ ਉੱਤੇ ਕਲੱਬ ਚਲਾ ਰਹੀ ਹੈ, ਜਿਸ ਦੀ ਮੋਟੀ ਫੀਸ ਲਈ ਜਾ ਰਹੀ ਹੈ। ਨਾਲ ਵਿਟਾਮਿਨ ਸਪਲੀਮੈਂਟ, ਸਪੋਰਟਸ ਸ਼ੂਜ਼ ਸਮੇਤ ਹੋਰ ਸਾਮਾਨ ਦੀ ਵਿਕਰੀ ਦੇ ਨਾਲ ਚਾਹ, ਕੌਫੀ, ਡਰਿੰਕਸ ਅਤੇ ਮੂਵੀ ਨਾਈਟ, ਪਾਰਟੀ, ਡੀ ਜੇ ਆਦਿ ਕਲੱਬ ਦੇ ਮੈਂਬਰਾਂ ਨੂੰ ਪਰੋਸਿਆ ਜਾਂਦਾ ਹੈ। ਉਨ੍ਹਾਂ ਦੱਸਿਆ ਕਿ ਸਵੇਰੇ ਪੰਜ ਵਜੇ ਤੋਂ ਰਾਤ 10 ਵਜੇ ਤੱਕ ਕਲੱਬ ਖੁੱਲ੍ਹਾ ਰਹਿੰਦਾ ਹੈ। ਕਮੇਟੀ ਨੇ ਇਸ ਦੇ ਲਈ ਬਾਕਾਇਦਾ ਨਿੱਜੀ ਕੰਪਨੀ ਨਾਲ ਸਮਝੌਤਾ ਕੀਤਾ ਹੋਇਆ ਹੈ, ਜਿਸ ਬਾਰੇ ਪਿਛਲੇ ਚਾਰ ਸਾਲ ਤੋਂ ਉਹ ਅਦਾਲਤ ਦੇ ਚੱਕਰ ਕੱਟ ਰਹੀ ਹੈ। ਮਨਜੀਤ ਸਿੰਘ ਜੀ ਕੇ ਨੇ ਕਿਹਾ ਕਿ ਦਲਜੀਤ ਕੌਰ ਖਾਲਸਾ ਦੀ ਗੱਲ ਸੁਣ ਕੇ ਮੈਨੂੰ ਹੈਰਾਨੀ ਹੋਈ ਕਿਉਂਕਿ ਕਮੇਟੀ ਦੇ ਜਨਰਲ ਹਾਊਸ ਦਾ ਇੱਕ ਮਹੱਤਵ ਪੂਰਨ ਹਿੱਸਾ ਲੀਜ਼ ਉਤੇ ਦੇਣ ਦਾ ਕੋਈ ਮਤਾ ਮੇਰੀ ਪ੍ਰਧਾਨਗੀ ਵੇਲੇ ਨਹੀਂ ਆਇਆ ਅਤੇ ਨਾ ਸਕੂਲ ਸੋਸਾਇਟੀ ਦੀ ਕਿਸੇ ਮੀਟਿੰਗ ਵਿੱਚ ਇਹ ਮਤਾ ਰੱਖਿਆ ਗਿਆ ਸੀ। ਉਨ੍ਹਾਂ ਕਿਹਾ ਕਿ ਦਲਜੀਤ ਕੌਰ ਖਾਲਸਾ ਵੱਲੋਂ ਹਾਈ ਕੋਰਟ ਵਿੱਚ ਪਾਏ ਕੇਸ ਦੀ ਫਾਈਲ ਵੀ ਕਮੇਟੀ ਦੀ ਲੀਗਲ ਸੈੱਲ ਵਿੱਚ ਮੈਂ ਨਹੀਂ ਵੇਖੀ। ਇਸ ਕਾਰਨ ਅੱਜ ਤੱਕ ਇਸ ਕੇਸ ਵਿੱਚ ਧਿਰ ਹੋਣ ਦੇ ਬਾਵਜੂਦ ਕਮੇਟੀ ਜਾਂ ਸੋਸਾਇਟੀ ਵੱਲੋਂ ਉਸ ਦਾ ਕੋਈ ਰੈਗੂਲਰ ਵਕੀਲ ਵੀ ਕੋਰਟ ਵਿੱਚ ਨਹੀਂ ਗਿਆ, ਕਿਉਂਕਿ ਮਨਜਿੰਦਰ ਸਿੰਘ ਸਿਰਸਾ ਸਭ ਨੂੰ ਬਾਈਪਾਸ ਕਰ ਕੇ ਆਪਣੇ ਆਪ ਨਿੱਜੀ ਕੰਪਨੀ ਦੇ ਰੱਖਿਅਕ ਦੀ ਭੂਮਿਕਾ ਵਿੱਚ ਬਾਹਰ ਤੋਂ ਕੇਸ ਲੜਵਾ ਰਹੇ ਸਨ।
ਮਨਜੀਤ ਸਿੰਘ ਜੀ ਕੇ ਨੇ ਕਿਹਾ ਕਿ ਜਦੋਂ ਅਸੀਂ ਮਾਮਲੇ ਦੀ ਤਹਿ ਤੱਕ ਜਾਣ ਲਈ ਆਪਣੀ ਟੀਮ ਲਾਈ ਤਾਂ ਕਈ ਨਵੇਂ ਖੁਲਾਸੇ ਹੋ ਗਏ। ਪਤਾ ਲੱਗਾ ਕਿ 1982 ਵਿੱਚ ਏਸ਼ੀਆਈ ਖੇਡਾਂ ਸਮੇਂ ਸਕੂਲ ਵਿੱਚ ਸਵੀਮਿੰਗ ਪੂਲ ਨੂੰ ਬੰਦ ਕਰ ਕੇ ਉਸ ਦੇ ਸਟਾਫ ਤੋਂ ਹੋਰ ਕੋਈ ਕੰਮ ਕਰਵਾਏ ਜਾ ਰਹੇ ਸਨ। ਫਿਰ 2015 ਵਿੱਚ ਜਦੋਂ ਸਵੀਮਿੰਗ ਪੂਲ ਮੁਰੰਮਤ ਪਿੱਛੋਂ ਸ਼ੁਰੂ ਹੋਇਆ ਤਾਂ ਕਮੇਟੀ ਨੂੰ ਹਨੇਰੇ ਵਿੱਚ ਰੱਖ ਕੇ ਸਿਰਸਾ ਨੇ ਨਿੱਜੀ ਕੰਪਨੀ ਨੂੰ ਕਲੱਬ ਚਲਾਉਣ ਦਾ ਬਾਹਰ ਤੋਂ ਸਮਝੌਤਾ ਕਰ ਲਿਆ, ਪਰ ਕੀ ਸਮਝੌਤਾ ਹੋਇਆ, ਇਸ ਦੀ ਜਾਣਕਾਰੀ ਕਮੇਟੀ ਦੇ ਰਿਕਾਰਡ ਵਿੱਚ ਨਹੀਂ ਹੈ। ਜੀ ਕੇ ਨੇ ਦਾਅਵਾ ਕੀਤਾ ਕਿ ਪਟੀਸ਼ਨਰ ਅਨੁਸਾਰ ਕਲੱਬ ਨਾਲ ਸਿਰਸੇ ਦੇ ਨਿੱਜੀ ਅਤੇ ਵਪਾਰਕ ਹਿੱਤ ਜੁੜੇ ਹੋਏ ਹਨ। ਏਸੇ ਲਈ ਮਨਜਿੰਦਰ ਸਿੰਘ ਸਿਰਸਾ ਦੀ ਮਨਜ਼ੂਰੀ ਤੇ ਸਰਪ੍ਰਸਤੀ ਵਿੱਚ ਕਲੱਬ ਕਰੋੜਾਂ ਰੁਪਏ ਸਾਲਾਨਾ ਦਾ ਕੰਮ ਕਰਨ ਦੇ ਬਾਵਜੂਦ ਸਕੂਲ ਜਾਂ ਕਮੇਟੀ ਨੂੰ ਇੱਕ ਰੁਪਏ ਨਹੀਂ ਦੇ ਰਿਹਾ ਅਤੇ ਗੁਰੂ ਸਾਹਿਬ ਦੇ ਨਾਂਅ 'ਤੇ ਬਣੇ ਸਕੂਲ ਵਿੱਚ ਗੰਦੇ ਗਾਣੇ ਉਤੇ ਨਾਚ ਹੋ ਰਿਹਾ ਹੈ।