ਪਾਨੀਪਤ, 13 ਅਗਸਤ (ਪੋਸਟ ਬਿਊਰੋ)- ਹਰਿਆਣਾ ਦੇ ਪਾਨੀਪਤ ਵਿੱਚ ਪੰਜਾਬ ਐਂਡ ਸਿੰਧ ਬੈਂਕ ਵਿੱਚ ਹੈਰਾਨੀ ਵਾਲੀ ਚੋਰੀ ਦਾ ਪਤਾ ਲੱਗਾ ਹੈ। ਐਤਵਾਰ 11 ਅਗਸਤ ਨੂੰ ਛੁੱਟੀ ਦਾ ਲਾਭ ਉਠਾ ਕੇ ਚੋਰਾਂ ਨੇ ਛੱਤ ਦਾ ਲੈਂਟਰ ਤੋੜਿਆ ਅਤੇ ਬੈਂਕ ਵਿੱਚੋਂ ਲਾਕਰ ਤੋੜ ਕੇ ਚੋਰੀ ਕਰ ਲਈ। ਚੋਰ ਗਹਿਣੇ ਅਤੇ 1.30 ਕਰੋੜ ਰੁਪਏ ਦੀ ਨਕਦੀ ਲੁੱਟ ਕੇ ਲੈ ਗਏ।
ਪੁਲਸ ਅਧਿਕਾਰੀਆਂ ਦੇ ਦੱਸਣ ਮੁਤਾਬਕ ਪਾਨੀਪਤ ਦੇ ਸਨੌਲੀ ਰੋਡ ਦੇ ਗੁਰਦੁਆਰੇ ਵਿੱਚ ਸਕੂਲ ਦੇ ਹੇਠਾਂ ਪੰਜਾਬ ਐਂਡ ਸਿੰਧ ਬੈਂਕ ਹੈ। ਸੋਮਵਾਰ ਜਦੋਂ ਸਕੂਲ ਦਾ ਸੁਰੱਖਿਆ ਗਾਰਡ ਆਇਆ ਤਾਂ ਉਸ ਨੇ ਪਹਿਲੀ ਮੰਜ਼ਲ ਉੱਤੇ ਦੇਖਿਆ ਕਿ ਲੈਂਟਰ ਕੱਟਿਆ ਹੋਇਆ ਅਤੇ ਟਾਟ-ਪੱਟੀ ਲਟਕੀ ਸੀ। ਉਸ ਨੇ ਸਕੂਲ ਇੰਚਾਰਜ ਅਧਿਆਪਕਾ ਅਤੇ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਦੱਸਿਆ। ਐੱਸ ਪੀ ਸੁਮਿਤ ਕੁਮਾਰ ਅਤੇ ਪੰਚਕੂਲਾ ਤੋਂ ਪੰਜਾਬ ਐਂਡ ਸਿੰਧ ਬੈਂਕ ਹੈੱਡਕੁਆਰਟਰ ਦੇ ਸੀਨੀਅਰ ਮੈਨੇਜਰ ਪ੍ਰਦੀਪ ਮੌਕੇ ਉੱਤੇ ਪੁੱਜੇ। ਚੋਰੀ ਪਿੱਛੋਂ ਬਦਮਾਸ਼ ਮੌਕੇ ਉੱਤੇ ਡਰਿੱਲ ਮਸ਼ੀਨ, ਰਾਡ, ਹਥੌੜਾ, ਰੱਸੀ ਤੇ ਹੋਰ ਸਾਮਾਨ ਓਥੇ ਛੱਡ ਗਏ ਸਨ। ਪਤਾ ਲੱਗਾ ਹੈ ਕਿ ਬਦਮਾਸ਼ ਸਟ੍ਰਾਂਗ ਰੂਮ ਵਿੱਚ ਦਾਖਲ ਹੋਏ, 6 ਲਾਕਰ ਤੋੜੇ ਅਤੇ ਚੋਰੀ ਕਰ ਲਈ। ਚੋਰੀ ਕਦੋਂ ਹੋਈ, ਇਸ ਦਾ ਪਤਾ ਅਜੇ ਨਹੀਂ ਲੱਗ ਸਕਿਆ। ਐਤਵਾਰ ਛੁੱਟੀ ਸੀ ਤੇ ਛੱਤ ਦਾ ਲੈਂਟਰ ਕੱਟਣ ਵਿੱਚ ਉਨ੍ਹਾਂ ਨੂੰ ਕਾਫੀ ਸਮਾਂ ਲੱਗਾ ਹੋਵੇਗਾ। ਪੁਲਸ ਨੇ ਦੱਸਿਆ ਕਿ ਚੋਰ ਪਾਈਪ ਦੇ ਸਹਾਰੇ ਸਕੂਲ ਦੇ ਕਮਰੇ ਦੀ ਖਿੜਕੀ ਤਕ ਪਹੁੰਚੇ ਅਤੇ ਖਿੜਕੀ ਕੱਟ ਕੇ ਬੈਂਕ ਉੱਪਰਲੇ ਕਮਰੇ ਵਿਚ ਵੜੇ। ਇਹ ਲਾਕਰ ਰੂਮ ਦੇ ਉੱਪਰਲਾ ਕਮਰਾ ਸੀ। ਫਿਰ ਉਨ੍ਹਾਂ ਨੇ ਕਟਰ ਦੀ ਮਦਦ ਨਾਲ ਲੈਂਟਰ ਕੱਟਿਆ ਤੇ ਸਕੂਲ ਵਿੱਚ ਰੱਖੇ ਟਾਟ-ਪੱਟੀ ਦੇ ਸਹਾਰੇ ਹੇਠਾਂ ਉਤਰ ਕੇ ਲਾਕਰ ਰੂਮ ਵਿੱਚ ਚੋਰੀ ਕੀਤੀ। ਪੁਲਸ ਨੇ ਅਣਪਛਾਤੇ ਬਦਮਾਸ਼ਾਂ ਉੱਤੇ ਕੇਸ ਦਰਜ ਕਰ ਲਿਆ ਅਤੇ ਉਨ੍ਹਾਂ ਨੂੰ ਫੜਨ ਲਈ 5 ਟੀਮਾਂ ਲਾਈਆਂ ਹਨ। ਪਤਾ ਲੱਗਾ ਹੈ ਕਿ ਬੈਂਕ ਦੀ ਸੁਰੱਖਿਆ ਵਿੱਚ ਕਾਫੀ ਖਾਮੀ ਸੀ। ਸਟ੍ਰਾਂਗ ਰੂਮ ਵੀ ਨਿਯਮ ਮੁਤਾਬਕ ਨਹੀਂ ਬਣਿਆ ਸੀ।