ਯੰਗੂਨ, 13 ਅਗਸਤ (ਪੋਸਟ ਬਿਊਰੋ)- ਦੱਖਣ ਪੂਰਬੀ ਮਿਆਂਮਾਰ 'ਚ ਜ਼ਮੀਨ ਖਿਸਕਣ ਕਾਰਨ ਦਰਜਨ ਦੇ ਕਰੀਬ ਘਰ ਇਸ ਦੇ ਹੇਠ ਦੱਬੇ ਗਏ ਹਨ, ਜਿਸ ਕਾਰਨ ਮੌਤਾਂ ਦੀ ਗਿਣਤੀ 56 ਤੱਕ ਪਹੁੰਚ ਗਈ ਹੈ।
ਸ਼ੁੱਕਰਵਾਰ ਨੂੰ ਪੌਂਗ ਕਸਬੇ 'ਚ ਢਿੱਗਾਂ ਡਿੱਗਣ ਕਾਰਨ ਇਕ ਪਿੰਡ ਪ੍ਰਭਾਵਿਤ ਹੋਇਆ ਸੀ। ਪੌਂਗ ਤੋਂ ਪਾਰਲੀਮੈਂਟ ਦੇ ਮੈਂਬਰ ਜਾ ਜਾ ਹਟੂ ਨੇ ਹਫਤੇ ਦੇ ਅੰਤ ਵਿੱਚ ਘਟਨਾ ਸਥਾਨ ਦਾ ਦੌਰਾ ਕਰਦਿਆਂ ਕਿਹਾ ਕਿ ਕੱਲ੍ਹ ਰਾਹਤ ਕਰਮੀਆਂ ਨੇ ਤਿੰਨ ਹੋਰ ਲਾਸ਼ਾਂ ਬਰਾਮਦ ਕੀਤੀਆਂ ਹਨ, ਜਿਸ ਨਾਲ ਮੌਤਾਂ ਦੀ ਗਿਣਤੀ 56 ਹੋ ਗਈ ਹੈ। ਮੋਨ ਸੂਬੇ ਦੇ ਅਧਿਕਾਰੀ ਆਈ ਜ਼ਾਨ ਨੇ ਭਾਰੀ ਮੀਂਹ ਕਾਰਨ ਹੜ੍ਹ ਪ੍ਰਭਾਵਿਤ ਇਲਾਕਿਆਂ 'ਚੋਂ ਕੱਢ ਕੇ ਰਾਹਤ ਕੈਂਪਾਂ 'ਚ ਰਹਿ ਰਹੇ ਲੋਕਾਂ ਦਾ ਹਾਲ ਜਾਣਿਆ ਅਤੇ ਪ੍ਰਭਾਵਿਤ ਪਿੰਡਾਂ ਦਾ ਦੌਰਾ ਵੀ ਕੀਤਾ। ਯੂ ਐਨ ਰਿਪੋਰਟ ਅਨੁਸਾਰ ਪਿਛਲੇ ਇਕ ਹਫਤੇ 'ਚ ਮਾਨਸੂਨ ਦੇ ਭਾਰੀ ਮੀਂਹ ਕਾਰਨ ਆਏ ਹੜ੍ਹਾਂ ਕਾਰਨ ਮੋਨ ਸੂਬੇ 'ਚ ਘੱਟੋ-ਘੱਟ 7000 ਲੋਕਾਂ ਨੂੰ ਆਪਣੇ ਘਰ ਛੱਡਣੇ ਪਏ ਹਨ। ਜ਼ਮੀਨ ਖਿਸਕਣ ਕਾਰਨ ਪੌਂਗ 'ਚ ਘਰ ਅਤੇ ਸਕੂਲ ਨੁਕਸਾਨੇ ਗਏ ਅਤੇ ਸੜਕਾਂ ਬੰਦ ਹੋ ਗਈਆਂ ਅਤੇ ਕਾਫੀ ਪਿੰਡ ਹੜ੍ਹਾਂ 'ਚ ਘਿਰ ਗਏ ਹਨ। ਮਿਆਂਮਾਰ 'ਚ ਪਿਛਲੇ ਇਕ ਹਫਤੇ 'ਚ 12 ਹਜ਼ਾਰ ਲੋਕਾਂ ਨੂੰ ਆਪਣੇ ਘਰ ਛੱਡਣੇ ਪਏ ਹਨ। ਯੂ ਐਨ ਨੇ ਕਿਹਾ ਕਿ ਰਾਹਤ ਕੇਂਦਰਾਂ 'ਚ ਲੋਕਾਂ ਦੀ ਗਿਣਤੀ 38 ਹਜ਼ਾਰ ਹੋ ਗਈ ਹੈ।