* ਪਾਕਿ ਨੌਜਵਾਨ ਨੇ ਕਿਹਾ: ‘ਤੁਸੀਂ ਚੋਰ ਹੋ`
ਵਾਸ਼ਿੰਗਟਨ, 13 ਅਗਸਤ (ਪੋਸਟ ਬਿਊਰੋ)- ਭਾਰਤ ਸਰਕਾਰ ਵੱਲੋਂ ਧਾਰਾ 370 ਹਟਾਉਣ ਦੇ ਬਾਅਦ ਪਾਕਿਸਤਾਨ ਦੁਨੀਆ ਭਰ ਦੇ ਨੇਤਾਵਾਂ ਦਾ ਸਾਥ ਲੈਣ ਦੀ ਕੋਸ਼ਿਸ ਕਰ ਰਿਹਾ ਹੈ। ਇਸ ਕੋਸ਼ਿਸ਼ ਵਿਚ ਪਾਕਿਸਤਾਨ ਨੇ ਹਰ ਪਾਸਿਉਂ ਮੂੰਹ ਦੀ ਖਾਧੀ ਹੈ। ਤਾਜ਼ਾ ਕੇਸ ਨਿਊਯਾਰਕ ਵਿਚ ਯੂ ਐੱਨ ਦੇ ਇਕ ਪ੍ਰੋਗਰਾਮ ਦਾ ਹੈ, ਜਿੱਥੇ ਇਕ ਪਾਕਿਸਤਾਨੀ ਸ਼ਖਸ ਨੇ ਪਾਕਿਸਤਾਨ ਦੀ ਪੱਕੀ ਦੂਤ ਮਲੀਹਾ ਲੋਧੀ ਦੀ ਬੇਇੱਜ਼ਤੀ ਕਰ ਦਿੱਤੀ ਹੈ।
ਮਲੀਹਾ ਲੋਧੀ ਨੂੰ ਓਦੋਂ ਇਕ ਪ੍ਰੋਗਰਾਮ ਤੋਂ ਬਾਹਰ ਜਾਣਾ ਪਿਆ, ਜਦੋਂ ਉਨ੍ਹਾਂ ਉੱਤੇ ਇਕ ਸ਼ਖਸ ਨੇ ਭ੍ਰਿਸ਼ਟਾਚਾਰ ਦਾ ਦੋਸ਼ ਲਾਇਆ ਅਤੇ ਕਿਹਾ, ਤੁਸੀਂ ਖੁਦ ਚੋਰ ਹੋ। ਤੁਹਾਨੂੰ ਪਾਕਿਸਤਾਨ ਦੀ ਨੁਮਾਇੰਦਗੀ ਦਾ ਹੱਕ ਨਹੀਂ। ਵੀਡੀਓ ਵਿਚ ਮਲੀਹਾ ਲੋਧੀ ਪਾਕਿਸਤਾਨੀ ਨਾਗਰਿਕ ਦੇ ਸਵਾਲਾਂ ਦੇ ਜਵਾਬ ਦੇਣ ਤੋਂ ਬਚਦੀ ਨਜ਼ਰ ਆ ਰਹੀ ਹੈ। ਉਹ ਜਿੱਥੇ ਮੀਡੀਆ ਨੂੰ ਸੰਬੋਧਤ ਕਰਦੀ ਹੈ, ਓਥੇ ਇਕ ਸ਼ਖਸ ਗੁੱਸੇ ਵਿਚ ਖੜ੍ਹਾ ਉਨ੍ਹਾਂ ਨੂੰ ਕਹਿੰਦਾ ਹੈ, ਕੀ ਉਨ੍ਹਾਂ ਕੋਲ ਉਸ ਦੇ ਸਵਾਲਾਂ ਦਾ ਜਵਾਬ ਦੇਣ ਲਈ ਇੱਕ ਮਿੰਟ ਦਾ ਵੀ ਸਮਾਂ ਨਹੀਂ। ਇਸ ਦੇ ਬਾਅਦ ਉਹ ਬਿਨਾਂ ਉਸ ਦੇ ਜਵਾਬ ਦਾ ਉਡੀਕ ਕੀਤੇ ਇਹ ਕਹਿੰਦਾ ਹੈ, ਤੁਸੀਂ ਪਿਛਲੇ 15-20 ਮਿੰਟ ਤੋਂ ਕੀ ਕਰ ਰਹੀ ਹੋ। ਤੁਸੀਂ ਸਾਡੀ ਨੁਮਾਇੰਦਗੀ ਨਹੀਂ ਕਰ ਰਹੇ।
ਡਿਪਲੋਮੈਟ ਮਲੀਹਾ ਲੋਧੀ ਨੇ ਕਿਹਾ ਕਿ ਉਹ ਉਸ ਦੇ ਸਵਾਲਾਂ ਦੇ ਜਵਾਬ ਨਹੀਂ ਦੇਵੇਗੀ। ਜਦੋਂ ਮਲੀਹਾ ਓਥੋਂ ਜਾਣ ਲੱਗੀ ਤਾਂ ਉਸ ਆਦਮੀ ਨੇ ਦੂਜਾ ਸਵਾਲ ਕੀਤਾ ਕਿ ਤੁਸੀਂ ਸਾਡਾ ਪੈਸਾ ਚੋਰੀ ਕਰਦੇ ਹੋ। ਤੁਸੀਂ ਚੋਰ ਹੋ। ਤੁਸੀਂ ਸਾਡੀ ਨੁਮਾਇੰਦਗੀ ਦੇ ਹੱਕਦਾਰ ਨਹੀਂ। ਇਸ ਪਿੱਛੋਂ ਉਸ ਨੇ ਬਾਹਰ ਜਾਂਦੀ ਮਲੀਹਾ ਲੋਧੀ ਦਾ ਪਿੱਛਾ ਕਰਨ ਦੀ ਕੋਸ਼ਿਸ਼ ਕੀਤੀ। ਪ੍ਰੋਗਰਾਮ ਵਿਚ ਮੌਜੂਦ ਲੋਕਾਂ ਨੇ ਉਸ ਨੂੰ ਸ਼ਾਂਤ ਕਰਨ ਦੀ ਕੋਸ਼ਿਸ਼ ਕੀਤੀ। ਜਦੋਂ ਮਲੀਹਾ ਲੋਧੀ ਪ੍ਰੋਗਰਾਮ ਤੋਂ ਬਾਹਰ ਨਿਕਲੀ ਤਾਂ ਉਸ ਆਦਮੀ ਨੇ ਕਿਹਾ, ਤੁਹਾਨੂੰ ਸ਼ਰਮ ਆਉਣੀ ਚਾਹੀਦੀ ਹੈ। ਇੰਨੇ ਸਾਲਾਂ ਵਿਚ ਤੁਸੀਂ ਸਾਡਾ ਪੈਸਾ ਖਾ ਰਹੇ ਹੋ। ਟਵਿੱਟਰ ਉੱਤੇ ਲੋਕਾਂ ਨੇ ਮਲੀਹਾ ਲੋਧੀ ਨੂੰ ਸਵਾਲ ਕਿਹਾ ਕਿ ਉਹ ਅਮਰੀਕਾ ਵਿਚ ਚੋਖਾ ਰਹਿ ਚੁੱਕੀ ਹੈ। ਉਨ੍ਹਾਂ ਨੂੰ ਵਾਪਸ ਪਾਕਿਸਤਾਨ ਭੇਜ ਦੇਣਾ ਚਾਹੀਦਾ ਹੈ।
ਵਰਨਣ ਯੋਗ ਹੈ ਕਿ ਮਲੀਹਾ ਲੋਧੀ ਅਮਰੀਕਾ ਵਿਚ ਪਾਕਿਸਤਾਨ ਦੀ ਰਾਜਦੂਤ ਰਹਿ ਚੁੱਕੀ ਹੈ। ਕੁਝ ਲੋਕਾਂ ਨੇ ਉਨ੍ਹਾਂ ਨੂੰ ਟੈਕਸ ਦੇਣ ਵਾਲਿਆਂ ਦੇ ਪੈਸੇ ਦੀ ਦੁਰਵਰਤੋਂ ਕਰਨ ਵਾਲੀ ਕਿਹਾ। ਟਵਿੱਟਰ ਉੱਤੇ ਕਿਸੇ ਨੇ ਸਵਾਲ ਪੁੱਛਣ ਵਾਲੇ ਨੂੰ ਸਲਾਮ ਕਰ ਕੇ ਕਿਹਾ, ‘ਸਲਾਮ ਹੈ ਭਰਾ, ਜਿਸ ਨੇ ਸਵਾਲ ਕੀਤਾ।` ਇਕ ਹੋਰ ਯੂਜ਼ਰ ਨੇ ਲਿਖਿਆ, ‘ਉਹ ਬੰਦਾ ਬਿਲਕੁਲ ਸਹੀ ਹੈ। ਮਲੀਹਾ ਨੇ ਪਿਛਲੇ 15 ਸਾਲਾਂ ਤੋਂ ਯੂ ਐੱਨ ਵਿਚ ਸਾਡੇ ਲਈ ਕੁਝ ਨਹੀਂ ਕੀਤਾ ਹੈ।’