* 10 ਭਾਸ਼ਾਵਾਂ ਦੇ 100 ਤੋਂ ਵੀ ਘੱਟ ਜਾਣਕਾਰ ਹਨ ਭਾਰਤ ਵਿੱਚ
ਨਵੀਂ ਦਿੱਲੀ, 11 ਅਗਸਤ (ਪੋਸਟ ਬਿਊਰੋ)- ਭਾਰਤ ਵਿੱਚ ਕਰੀਬ 450 ਜੀਵਿਤ ਭਾਸ਼ਾਵਾਂ ਹਨ ਅਤੇ ਦੇਸ਼ ਦੀ ਖੁਸ਼ਹਾਲ ਭਾਸ਼ਾਈ ਵਿਰਾਸਤ ਸਾਂਭਣ ਅਤੇ ਮਾਣ ਕਰਨ ਲਾਇਕ ਮੰਨੀ ਜਾ ਸਕਦੀ ਹੈ। ਸ਼ੁੱਕਰਵਾਰ ਨੂੰ ਦੁਨੀਆ ਨੇ ਦੇਸ਼ੀ ਭਾਸ਼ਾਵਾਂ ਦਾ ਅੰਤਰਰਾਸ਼ਟਰੀ ਦਿਵਸ ਮਨਾਇਆ ਤਾਂ ਇਸ ਮੌਕੇ ਇਹ ਚਿੰਤਾਜਨਕ ਹੈ ਗੱਲ ਪਤਾ ਲੱਗੀ ਹੈ ਕਿ ਦੇਸ਼ ਦੀਆਂ 10 ਤੋਂ ਵੱਧ ਭਾਸ਼ਾਵਾਂ ਨੂੰ ਬੋਲਣ ਵਾਲੇ 100 ਤੋਂ ਵੀ ਘੱਟ ਲੋਕ ਬਚੇ ਹਨ।
ਦੁਨੀਆ ਦੀ ਖਤਰੇ ਵਿੱਚ ਪਈਆਂ ਹੋਈਆਂ ਭਾਸ਼ਾਵਾਂ ਦੇ ਯੁਨੈਸਕੋ ਐਟਲਸ ਦੇ ਆਨਲਾਈਨ ਚੈਪਟਰ ਦੇ ਮੁਤਾਬਕ ਭਾਰਤ ਵਿੱਚ 197 ਭਾਸ਼ਾਵਾਂ ਜਾਂ ਤਾਂ ਅਸੁਰੱਖਿਅਤ ਜਾਂ ਗਾਇਬ ਹਨ। ਗਾਇਬ ਹੋ ਰਹੀਆਂ ਭਾਸ਼ਾਵਾਂ ਵਿੱਚ ਅਹੋਮ, ਐਡਰੋ, ਰੰਗਕਾਸ, ਸੇਂਗਮਈ, ਲੋਚਤਾ ਤੇ ਹੋਰ ਸ਼ਾਮਲ ਹਨ। ਇਹ ਸਾਰੀਆਂ ਭਾਸ਼ਾਵਾਂ ਹਿਮਾਲੀਅਨ ਬੈਲਟ ਵਿੱਚ ਬੋਲੀਆਂ ਜਾਂਦੀਆਂ ਹਨ। 81 ਭਾਰਤੀ ਭਾਸ਼ਾਵਾਂ ਦੀ ਸਥਿਤੀ ਬਹੁਤ ਚੰਗੀ ਨਹੀਂ ਹੈ, ਜਿਨ੍ਹਾਂ ਵਿੱਚ ਮਣੀਪੁਰੀ, ਬੋਡੋ, ਗੜਵਾਲੀ, ਲੱਦਾਖੀ, ਮਿਜ਼ੋ, ਸ਼ੇਰਪਾ ਅਤੇ ਸਪਿਤੀ ਸ਼ਾਮਲ ਹਨ, ਪਰ ਉਹ ਅਜੇ ਕਮਜ਼ੋਰ ਸ਼ਰੇਣੀ ਵਿੱਚ ਹਨ ਅਤੇ ਇਨ੍ਹਾਂ ਨੂੰ ਸੰਭਾਲਣ ਲਈ ਸਾਂਝੇ ਯਤਨ ਕਰਨ ਦੀ ਲੋੜ ਹੈ। ਦੁਨੀਆ ਭਰ ਵਿੱਚ ਕਰੀਬ 7000 ਭਾਸ਼ਾਵਾਂ ਹਨ। ਯੂਨੈਸਕੋ ਦੇ ਮੁਤਾਬਕ ਦੁਨੀਆ ਦੀ ਕਰੀਬ 97 ਫੀਸਦੀ ਆਬਾਦੀ ਇਨ੍ਹਾਂ ਵਿੱਚੋਂ ਕੇਵਲ ਚਾਰ ਫੀਸਦੀ ਭਾਸ਼ਾਵਾਂ ਦੀ ਜਾਣਕਾਰੀ ਰੱਖਦੀ ਹੈ, ਪਰ ਦੁਨੀਆ ਦੇ ਕੇਵਲ ਤਿੰਨ ਫੀਸਦੀ ਲੋਕ ਬਾਕੀ ਦੇ 96 ਫੀਸਦੀ ਭਾਸ਼ਾਵਾਂ ਦੀ ਜਾਣਕਾਰੀ ਰੱਖਦੇ ਹਨ।