ਲੁਧਿਆਣਾ, 11 ਅਗਸਤ (ਪੋਸਟ ਬਿਊਰੋ)- ਆਪਣੀ ਨੂੰਹ ਅਤੇ ਉਸ ਦੇ ਪੇਕਿਆਂ ਤੋਂ ਤੰਗ ਆ ਕੇ ਟੂਸੇ ਪਿੰਡ ਦੇ ਬਜ਼ੁਰਗ ਨੇ ਜ਼ਹਿਰੀਲਾ ਪਦਾਰਥ ਨਿਗਲ ਕੇ ਖੁਦਕੁਸ਼ੀ ਕਰ ਲਈ ਹੈ। ਉਸ ਕੋਲੋਂ ਮਿਲੇ ਸੁਸਾਈਡ ਨੋਟ ਵਿੱਚ ਨੂੰਹ ਦਲਬੀਰ ਕੌਰ, ਉਸ ਦਾ ਪਿਤਾ ਕਮਿਕਰ ਸਿੰਘ, ਮਾਂ ਕੁਲਵਿੰਦਰ ਕੌਰ, ਭੈਣ ਰਾਜਵੀਰ ਕੌਰ ਅਤੇ ਭਰਾ ਪਵਨਾ ਸਿੰਘ ਦੇ ਨਾਂਅ ਲਿਖ ਕੇ ਆਪਣੀ ਮੌਤ ਦਾ ਜ਼ਿੰਮੇਵਾਰ ਦੱਸਿਆ ਗਿਆ ਹੈ। ਪੁਲਸ ਨੇ ਮ੍ਰਿਤਕ ਦੇ ਬੇਟੇ ਸੰਦੀਪ ਸਿੰਘ ਦੇ ਬਿਆਨਾਂ ਉੱਤੇ ਥਾਣਾ ਸਦਰ ਜਗਰਾਓਂ ਦੀ ਚੌਕੀਮਾਨ ਵਿੱਚ ਪੰਜਾਂ ਦੇ ਖਿਲਾਫ ਕੇਸ ਦਰਜ ਕਰ ਲਿਆ ਹੈ।
ਸੰਦੀਪ ਸਿੰਘ ਨੇ ਪੁਲਸ ਨੂੰ ਦੱਸਿਆ ਕਿ ਪਿੰਡ ਕੈਂਡ ਦੇ ਕਮਿਕਰ ਸਿੰਘ ਦੀ ਬੇਟੀ ਦਲਬੀਰ ਕੌਰ ਨਾਲ ਉਸ ਦੇ ਰਿਸ਼ਤੇ ਦੀ ਗੱਲ ਚੱਲ ਰਹੀ ਸੀ। ਇਸੇ ਦੌਰਾਨ ਦਲਬੀਰ ਕੌਰ ਦੇ ਪਰਵਾਰ ਨੇ ਕਿਹਾ ਕਿ ਦਲਬੀਰ ਕੌਰ ਦਾ ਨਿਊਜ਼ੀਲੈਂਡ ਦਾ ਵੀਜ਼ਾ ਲੱਗਾ ਹੋਇਆ ਹੈ, ਜਿਸ ਨੂੰ ਜਾਣ ਲਈ ਪਹਿਲਾਂ 14 ਲੱਖ 50 ਹਜ਼ਾਰ ਰੁਪਏ ਦਾ ਖਰਚ ਆਏਗਾ ਤੇ ਤੁਹਾਨੂੰ ਹੀ ਕਰਨਾ ਪਵੇਗਾ। ਇਸ ਦੇ ਬਾਅਦ ਉਨ੍ਹਾਂ ਨੇ ਰੁਪਏ ਉਨ੍ਹਾਂ ਨੂੰ ਦੇ ਦਿੱਤੇ। ਫਿਰ ਦਲਬੀਰ ਕੌਰ ਦਾ ਪਰਵਾਰ ਕਹਿਣ ਲੱਗਾ ਕਿ ਵਿਆਹ ਉੱਤੇ ਹੋਣ ਵਾਲਾ ਖਰਚ ਵੀ ਤੁਹਾਡਾ ਹੋਵੇਗਾ, ਜਿਸ ਦੇ ਬਾਅਦ ਸੰਦੀਪ ਸਿੰਘ ਦਾ ਵਿਆਹ ਦਲਬੀਰ ਦੇ ਨਾਲ 12 ਜੂਨ 2015 ਨੂੰ ਹੋ ਗਿਆ। ਕੁਝ ਦਿਨ ਬਾਅਦ ਦਲਬੀਰ ਕੌਰ ਨੇ ਕਿਹਾ ਕਿ ਉਸ ਦੀ ਫਾਈਲ ਰਿਜੈਕਟ ਹੋ ਗਈ ਹੈ। ਉਸ ਦੇ ਬਾਅਦ ਦਲਬੀਰ ਕੌਰ ਨੇ ਸਿੰਗਾਪੁਰ ਜਾਣ ਦੀ ਮੰਗ ਕੀਤੀ, ਜਿਸ 'ਤੇ ਸੱਤ ਲੱਖ ਰੁਪਏ ਖਰਚ ਹੋਏ। ਪਰਵਾਰ 10 ਲੱਖ ਰੁਪਏ ਦੀ ਮੰਗ ਕਰਨ ਲੱਗਾ ਅਤੇ ਰੁਪਏ ਦੇਣ ਦੀ ਥਾਂ ਲਖਬੀਰ ਸਿੰਘ ਉੱਤੇ ਦਾਜ ਦਾ ਕੇਸ ਦਰਜ ਕਰਵਾ ਕੇ ਤੰਗ ਕਰਨ ਲੱਗ ਪਏ, ਜਿਸ ਦੇ ਬਾਅਦ ਉਨ੍ਹਾਂ ਨੇ ਜਗਰਾਓਂ ਦੇ ਥਾਣਾ ਵੂਮੈਨ ਸੈੱਲ ਵਿੱਚ ਦਲਬੀਰ ਕੌਰ ਨੂੰ ਦਾਜ ਲਈ ਤੰਗ ਕਰਨ ਤੇ 10 ਲੱਖ ਰੁਪਏ ਦੀ ਮੰਗ ਕਰਨ ਦੀ ਸ਼ਿਕਾਇਤ ਦਿੱਤੀ। ਇਸ ਤੋਂ ਉਸ ਦੇ ਪਿਤਾ ਲਖਬੀਰ ਸਿੰਘ ਪਰੇਸ਼ਾਨ ਰਹਿਣ ਲੱਗਾ ਤੇ ਸ਼ੁੱਕਰਵਾਰ ਸ਼ਾਮ ਘਰ ਵਿੱਚ ਕੋਈ ਜ਼ਹਿਰੀਲਾ ਪਦਾਰਥ ਨਿਗਲ ਲਿਆ। ਉਨ੍ਹਾਂ ਨੂੰ ਨੇੜਲੇ ਪ੍ਰਾਈਵੇਟ ਹਸਪਤਾਲ ਲਿਜਾਇਆ ਗਿਆ, ਜਿੱਥੋਂ ਉਸ ਨੂੰ ਸੀ ਐੱਮ ਸੀ ਹਸਪਤਾਲ ਰੈਫਰ ਕਰ ਦਿੱਤਾ ਗਿਆ, ਓਥੇ ਉਨ੍ਹਾਂ ਦੀ ਮੌਤ ਹੋ ਗਈ।