ਨਾਗਾਸਾਕੀ, 10 ਅਗਸਤ (ਪੋਸਟ ਬਿਊਰੋ)- ਜਾਪਾਨ ਦੇ ਸ਼ਹਿਰ ਨਾਗਾਸਾਕੀ ਨੇ ਕੱਲ੍ਹ ਐਟਮੀ ਹਮਲੇ ਦੀ 74ਵੀਂ ਬਰਸੀ ਮਨਾਈ ਅਤੇ ਇਸ ਮੌਕੇ ਕਰਵਾਏ ਗਏ ਇੱਕ ਪ੍ਰੋਗਰਾਮ ਵਿੱਚ ਇਸ ਸ਼ਹਿਰ ਦੇ ਮੇਅਰ ਨੇ ਦੁਨੀਆ ਭਰ ਦੇ ਦੇਸ਼ਾਂ ਵਿੱਚ ਐਟਮੀ ਹਥਿਆਰਾਂ ਉੱਤੇ ਪਾਬੰਦੀ ਦੀ ਮੰਗ ਕੀਤੀ ਹੈ।
ਵਰਨਣ ਯੋਗ ਹੈ ਕਿ ਦੂਸਰੀ ਵਿਸ਼ਵ ਜੰਗ ਦੌਰਾਨ ਨੌਂ ਅਗਸਤ 1945 ਨੂੰ ਅਮਰੀਕਾ ਨੇ ਇਸ ਸ਼ਹਿਰ ਉਤੇ ‘ਫੈਟ ਮੈਨ' ਐਟਮ ਬੰਬ ਸੁੱਟਿਆ ਸੀ, ਜਿਸ ਨਾਲ ਕਰੀਬ 74 ਹਜ਼ਾਰ ਲੋਕਾਂ ਦੀ ਮੌਤ ਹੋ ਗਈ ਸੀ। ਇਸ ਤੋਂ ਤਿੰਨ ਦਿਨ ਪਹਿਲਾਂ ਅਮਰੀਕਾ ਨੇ ਇਕ ਹੋਰ ਜਾਪਾਨੀ ਸ਼ਹਿਰ ਹੀਰੋਸ਼ੀਮਾ ਉਤੇ ਐਟਮ ਬੰਬ ਸੁੱਟਿਆ ਸੀ। ਸਥਾਨਕ ਪੀਸ ਪਾਰਕ 'ਚ ਵਿਸ਼ਾਲ ਜਨ ਸਮੂਹ ਨੂੰ ਸੰਬੋਧਨ ਕਰਦਿਆਂ ਮੇਅਰ ਤੋਮਿਹੀਸਾ ਟਾਉ ਨੇ ਕਿਹਾ, ਐਟਮੀ ਹਥਿਆਰਾਂ ਉਤੇ ਪਾਬੰਦੀ ਦਾ ਕੰਮ ਛੇਤੀ ਤੋਂ ਛੇਤੀ ਪੂਰਾ ਹੋਣਾ ਚਾਹੀਦਾ ਹੈ। ਇਸ ਦੇ ਲਈ ਯੂ ਐਨ ਵੱਲੋਂ ਲਿਆਂਦੀ ਐਟਮੀ ਪਾਬੰਦੀ ਸੰਧੀ 'ਤੇ ਹਾਲੇ ਤੱਕ 50 ਦੇਸ਼ਾਂ ਨੇ ਹਸਤਾਖਰ ਨਹੀਂ ਕੀਤੇ, ਜਿਸ ਨਾਲ ਇਹ ਟੀਚਾ ਅਧੂਰਾ ਹੈ। ਜਾਪਾਨ ਵੀ ਇਨ੍ਹਾਂ 50 ਦੇਸ਼ਾਂ 'ਚ ਸ਼ਾਮਲ ਹੈ। ਇਸ ਪ੍ਰੋਗਰਾਮ ਵਿੱਚ ਜਾਪਾਨ ਦੇ ਪ੍ਰਧਾਨ ਮੰਤਰੀ ਸ਼ਿੰਜੋ ਅਬੇ ਤੋਂ ਇਲਾਵਾ ਯੂ ਐਨ, ਯੂਰਪੀ ਯੂਨੀਅਨ ਅਤੇ ਐਟਮੀ ਹਥਿਆਰਾਂ ਵਾਲੇ ਦੇਸ਼ਾਂ ਅਮਰੀਕਾ, ਰੂਸ, ਬ੍ਰਿਟੇਨ, ਫਰਾਂਸ ਤੇ ਚੀਨ ਦੇ ਪ੍ਰਤੀਨਿਧ ਵੀ ਮੌਜੂਦ ਸਨ। ਪ੍ਰਧਾਨ ਮੰਤਰੀ ਸਿ਼ੰਜੋ ਅਬੇ ਨੇ ਇਸ ਮੌਕੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਐਟਮੀ ਸ਼ਕਤੀ ਸੰਪੰਨ ਦੇਸ਼ ਤੇ ਹੋਰਨਾਂ ਦੇਸ਼ਾਂ ਵਿਚਕਾਰ ਵਿਚੋਲਗੀ ਦਾ ਕੰਮ ਕਰੇਗੀ ਤਾਂ ਕਿ ਐਟਮੀ ਹਥਿਆਰਾਂ ਦਾ ਪ੍ਰਸਾਰ ਰੋਕਿਆ ਜਾ ਸਕੇ। ਅਬੇ ਨੇ ਹਾਲਾਂਕਿ ਐਟਮੀ ਸੰਧੀ ਨੂੰ ਲੈ ਕੇ ਕੁਝ ਨਹੀਂ ਕਿਹਾ।