ਲੰਡਨ, 11 ਅਕਤੂਬਰ (ਪੋਸਟ ਬਿਊਰੋ)- ਲੰਡਨ ਵਿਚ ਪੜ੍ਹਾਈ ਕਰ ਰਹੀ ਯੁਗਾਂਡਾ ਦੀ ਮਹਿਲਾ ਨੇ ਇੱਕ ਅਨੋਖਾ ਕਦਮ ਚੁੱਕਿਆ, ਜਿਸ ਕਾਰਨ ਉਹ ਚਰਚਾ ਵਿਚ ਆ ਗਈ ਹੈ। 32 ਸਾਲਾ ਆਕਸਫੋਰਡ ਦੀ ਵਿਦਿਆਰਥਣ ਨੇ ਪਰਿਵਾਰ ਅਤੇ ਦੋਸਤਾਂ ਦੇ ਵਿਆਹ ਸਬੰਧੀ ਸਵਾਲ ਦਾ ਜਵਾਬ ਦੇਣ ਲਈ ਅਨੋਖਾ ਰਸਤਾ ਲੱਭਿਆ।
ਇਕ ਅੰਗਰੇਜ਼ੀ ਅਖਬਾਰ ਦੀ ਖਬਰ ਮੁਤਾਬਕ ਲੁਲੁ ਜੇਮਿਮਾ ਨੇ ਵਿਆਹ ਦੀ ਪੂਰੀ ਤਿਆਰੀ ਕੀਤੀ। ਦੋਸਤਾਂ ਅਤੇ ਪਰਿਵਾਰ ਵਾਲਿਆਂ ਨੂੰ ਸੱਦਿਆ ਅਤੇ ਫਿਰ ਖੁਦ ਨਾਲ ਹੀ ਵਿਆਹ ਕਰ ਕੇ ਇਸ ਸਵਾਲ ਦਾ ਜਵਾਬ ਸਾਰਿਆਂ ਨੂੰ ਦਿੱਤਾ। ਜੇਮਿਮਾ ਆਕਸਫੋਰਡ ਯੂਨੀਵਰਸਿਟੀ ਵਿਚ ਰਚਨਾਤਮਕ ਲੇਖਨ ਦੀ ਪੜ੍ਹਾਈ ਕਰ ਰਹੀ ਹੈ। ਉਸ ਨੇ ਨਿੱਜੀ ਆਜ਼ਾਦੀ `ਤੇ ਬਣਾਏ ਜਾ ਰਹੇ ਦਬਾਅ ਦਾ ਜ਼ਬਰਦਸਤ ਜਵਾਬ ਦਿੰਦਿਆਂ ਖੁਦ ਨਾਲ ਵਿਆਹ ਕਰਨ ਦਾ ਫੈਸਲਾ ਲਿਆ। ਉਸ ਨੇ ਆਪਣੇ ਵਿਆਹ ਦੀ ਪੂਰੀ ਤਿਆਰੀ ਕੀਤੀ ਅਤੇ ਇਸ ਲਈ ਖਾਸ ਵੈਡਿੰਗ ਗਾਊਨ ਵੀ ਬਣਾਇਆ। ਵਿਆਹ ਸਥਾਨ ਤੱਕ ਜੇਮਿਮਾ ਰਵਾਇਤੀ ਅੰਦਾਜ਼ ਵਿਚ ਗਈ। ਓਥੇ ਆਏ ਸਾਰੇ ਲੋਕ ਉਦੋਂ ਹੈਰਾਨ ਰਹਿ ਗਏ ਜਦੋਂ ਉਨ੍ਹਾਂ ਨੇ ਦੇਖਿਆ ਕਿ ਇਸ ਵਿਆਹ ਵਿਚ ਕੋਈ ਲਾੜਾ ਨਹੀਂ ਸੀ। ਜੇਮਿਮਾ ਨੇ ਆਕਸਫੋਰਡ ਦੀ ਪੜ੍ਹਾਈ ਪੂਰੀ ਕਰਨ ਲਈ ਖੁਦ ਨਾਲ ਹੀ ਵਿਆਹ ਕਰ ਲਿਆ। ਵਿਆਹ ਮਗਰੋਂ ਉਹ ਬਾਈਕ `ਤੇ ਬੈਠ ਕੇ ਵਿਦਾ ਹੋਈ। ਜਿਵੇਂ ਰਵਾਇਤੀ ਕ੍ਰਿਸ਼ਚੀਅਨ ਵਿਆਹ ਵਿਚ ਹੁੰਦਾ ਹੈ, ਜੇਮਿਮਾ ਨੇ ਕਿਹਾ, ‘ਖੁਦ ਨਾਲ ਵਿਆਹ ਕਰਨਾ ਦਾ ਮੇਰਾ ਫੈਸਲਾ ਪਰਿਵਾਰ ਤੇ ਦੋਸਤਾਂ ਨੂੰ ਨਿਰਾਸ਼ ਕਰਨ ਵਾਲਾ ਸੀ। ਮੈਨੂੰ ਲੱਗਦਾ ਹੈ ਕਿ ਮੇਰੇ ਲਈ ਇਹ ਬਿਲਕੁੱਲ ਠੀਕ ਫੈਸਲਾ ਹੈ। ਮੈਂ ਆਪਣੇ ਨਾਲ ਕੀਤੇ ਵਚਨ ਦੀ ਜਾਣਕਾਰੀ ਸਾਰਿਆਂ ਨੂੰ ਦੇ ਦਿੱਤੀ।`
ਇਸ ਮੌਕੇ ਜੇਮਿਮਾ ਨੇ ਦੱਸਿਆ ਕਿ ਉਸ ਦੇ ਵਿਆਹ ਵਿਚ ਕੁੱਲ ਖਰਚ 2 ਪੌਂਡ ਆਇਆ, ਜੋ ਵਿਆਹ ਸਥਾਨ ਤੱਕ ਪਹੁੰਚਣ ਦਾ ਟੈਕਸੀ ਕਿਰਾਇਆ ਸੀ। ਉਸ ਨੇ ਦੱਸਿਆ ਕਿ ਇਸ ਵਿਆਹ ਦੇ ਫੈਸਲੇ ਤੋਂ ਉਸ ਦੇ ਮਾਤਾ-ਪਿਤਾ ਖੁਸ਼ ਨਹੀਂ ਹਨ। ਉਸ ਨੇ ਕਿਹਾ, ‘ਯੁਗਾਂਡਾ ਵਿਚ ਮੇਰੇ ਮਾਤਾ-ਪਿਤਾ ਤੇ ਦੋਸਤ ਹਮੇਸ਼ਾ ਪੁੱਛਦੇ ਸਨ ਕਿ ਮੈਂ ਵਾਪਸ ਆ ਕੇ ਵਿਆਹ ਕਦੋਂ ਕਰਾਂਗੀ। ਜਦੋਂ ਮੈਂ ਆਪਣੇ ਮਾਤਾ-ਪਿਤਾ ਨੂੰ ਇਸ ਵਿਆਹ ਬਾਰੇ ਦੱਸਿਆ ਤਾਂ ਉਹ ਜ਼ਿਆਦਾ ਖੁਸ਼ ਨਹੀਂ ਹੋਏ। ਮੈਂ ਆਪਣੇ ਵਿਆਹ ਦੀਆਂ ਤਸਵੀਰਾਂ ਉਨ੍ਹਾਂ ਨੂੰ ਭੇਜੀਆਂ ਹਨ।`